2025 ވަނަ އަހަރުގެ ޑިސެންބަރު މަހު އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއަށް ހުށަހެޅުނު މައްސަލަތަކުގެ ތެރެއިން އެންމެ ގިނައީ ކުޑަކުދިންނަށް އިހުމާލުވުމުގެ މައްސަލަތައް ކަމަށް އެ ވުޒާރާގެ ތަފާސްހިސާބުތަކުން ދައްކައިފިއެވެ.

އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއިން އާންމުކޮށްފައިވާ މިދިޔަ ޑިސެންބަރު މަހުގެ ތަފާސްހިސާބުތަކަށް ބަލާއިރު، ކުޑަކުދިންނަށް ކުރާ އެކި ބާވަތުގެ އަނިޔާއާ ގުޅޭ ޖުމްލަ 85 މައްސަލައެއް ވަނީ ރިޕޯޓުކޮށްފައެވެ.

މީގެ ތެރެއިން އެންމެ ގިނައީ އިހުމާލުވުމުގެ މައްސަލަތަކެވެ. އެގޮތުން އިހުމާލުވުމުގެ 25 މައްސަލައެއް ހުށަހެޅިފައިވާއިރު، އޭގެ ތެރޭގައި ހިމެނެނީ އަންހެން ކުދިންނާ ގުޅޭ 14 މައްސަލައާއި، ފިރިހެން ކުދިންނާ ގުޅޭ 10 މައްސަލައެއްގެ އިތުރުން ކޮން ކުއްޖެއްކަން ނޭނގޭ ގޮތަށް ހުށަހަޅާފައިވާ އެއް މައްސަލައެވެ.

ކުޑަކުދިންނަށް ކުރާ އަނިޔާގެ ދެވަނައަށް އެންމެ ގިނައިން ރިޕޯޓުކޮށްފައިވަނީ ޖިސްމާނީ ހާނިއްކައިގެ މައްސަލަތަކެވެ. މި ބާވަތުގެ 15 މައްސަލައެއް ހުށަހެޅިފައިވާއިރު، އޭގެ ތެރޭގައި ފިރިހެން ކުދިންނާ ގުޅޭ 13 މައްސަލައެއް ހިމެނެއެވެ. މީގެ އިތުރުން ޖިންސީ ހާނިއްކައިގެ 14 މައްސަލައަކާއި، ގެވެށި އަނިޔާ ފެނުމުގެ 11 މައްސަލައެއް ވެސް ވަނީ ރިޕޯޓުކޮށްފައެވެ.

ކުދިންގެ އަޚްލާޤީ މައްސަލަތަކަށް ބަލާއިރު، ޖުމްލަ 13 މައްސަލައެއް ވަނީ ހުށަހެޅިފައެވެ. މީގެ ތެރެއިން އެންމެ ގިނައީ ސްކޫލަށް ދާން ބޭނުން ނުވުމުގެ  މައްސަލައެވެ. އެފަދަ 4 މައްސަލައެއް ހުށަހެޅުނެވެ.

މީގެ އިތުރުން އާއިލީ މައްސަލަތަކުގެ 50 މައްސަލައެއް ރިޕޯޓުކޮށްފައިވާއިރު، މީގެ ތެރޭގައި ކުދިން ބެލުމުގައި ޖެހޭ 18 މައްސަލައަކާއި ހަޟާނާގެ 14 މައްސަލައެއް ހިމެނެއެވެ.

ވަކި ޖިންސަކަށް ވީތީ ކުރާ އަނިޔާ އަދި ގެވެށި އަނިޔާގެ މައްސަލަތަކަށް ބަލާއިރު، ޑިސެންބަރު މަހު ޖުމްލަ 53 މައްސަލައެއް ވަނީ ރިޕޯޓުކޮށްފައެވެ. މީގެ ތެރޭގައި ހިމެނެނީ، އަންހެނުންނާއި ގުޅޭ 50 މައްސަލައަކާއި ފިރހެނުންނައި ގުޅޭ 03މައްސަލައެކެވެ. 

މީގެ ތެރެއިން އެންމެ ގިނައީ ޖިންސީ ހާނިއްކައިގެ މައްސަލަތަކެވެ. އެއީ 16 މައްސަލައެވެ. 

ކުޑަކުދިންގެ ހައްޤުތަކާ ގުޅުންހުރި މައްސަލަތަކުގެ ތެރެއިން އެ މަހު ހުށަހެޅިފައިވަނީ އައިޑީ ކާޑު ނުވަތަ އުފަންދުވަހުގެ ސެޓްފިކެޓް ހޯދުމާ ގުޅޭ އެންމެ މައްސަލައެކެވެ.