މާލޭ އުތުރު ފަރާތު ބޮޑުތަކުރުފާނު މަގު ތަރައްޤީކުރުމުގެ މަޝްރޫޢުގެ ދެވަނަ ފިޔަވަހީގެ މަސައްކަތުގެ 82 އިންސައްތަ މަސައްކަތް މިހާރު ނިމިފައިވާ ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)ން މައުލޫމާތުދީފިއެވެ.

އެކުންފުނިން ބުނީ މި މަޝްރޫޢުގެ ދަށުން ބިން ހިއްކުމާއި، ޝީޓް ޕައިލް ކުރުމާއި، ކޮންކްރީޓް ޕެނަލް ހަރުކުރުމުގެ އިތުރުން، ފެން ހިންދާ ނިޒާމު ގާއިމުކުރުމާއި، ކޭބަލް ޖަންކްޝަންތައް ހެދުމާއި، ފެނާއި ނަރުދަމާގެ މައި ހޮޅިތައް އެޅުމުގެ މަސައްކަތް މިހާރު ވަނީ އެއްކޮށް ނިންމާލެވިފައިކަމަށެވެ. އަދި އެއްގަމު ތޮށީގެ ކެޕިންގް ބީމްގެ އެންމެ ފަހުގެ ކޮންކްރީޓް މަސައްކަތްތައް މިއަދަށް ނިންމުމަށް ވަނީ ތާވަލުކުރެވިފައިކަމަށެވެ.

މީގެ އިތުރުން، މަގުގެ ދުވާރުގެ ކާބްސްޓޯން ޖެހުމާއި، ސެޓްލްމަންޓް ޓޭންކްތައް ބެހެއްޓުމާއި، ފެނާއި ކޭބަލް އެޅުމަށް ބޭނުންވާ ކޮންކްރީޓް ޓްރެންޗްތަކުގެ މަސައްކަތްތައް މިހާރު ބާރުމިނުގައި ކުރިއަށްދާއިރު، މި ހަފުތާގެ ތެރޭގައި މަގުގެ ސަބް-ބޭސް ތައްޔާރުކުރުމާއި ތާރު އެޅުމުގެ މަސައްކަތްތަކަށް ވާންޖެހޭ ތައްޔާރީތައް ވެސް ފެށޭނެކަމަށް އެކުންފުނިން މައުލޫމާތުދެއެވެ. 

އެމްޓީސީސީގެ އަމާޒަކީ ރޯދަ މަހުގެ ކުރިން މި މަގު ހެދުމުގެ ދެވަނަ ފިޔަވަހީގެ މަސައްކަތްތައް ނިންމައި އާންމުންނަށް ހުޅުވާލުމެވެ.

މި މަޝްރޫޢު ނިމުމުން ބާޒާރުމަތީ ސަރަޙައްދުގެ މަގުތަކަކީ ދެކޮޅަށް ދުއްވޭ، ހިނގާ މީހުންނަށް އަމާން އަދި ފެންބޮޑުވުމުގެ މައްސަލައަށް ހައްލެއް ލިބިފައިވާ ޒަމާނީ މަގުތަކަކަށް ވެގެންދާނެ ކަމަށް އެމްޓީސީސީން ބުނެއެވެ.