ކުރިއަށް އޮތް ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތް ކުރާ ކޮމެޓީގެ އިންތިހާބުގައި ތ. ވިލުފުށީން އިންތިހާބު ކުރާ 8 ގޮނޑިއަކަަށް ސަރުކާރު ހިންގާ ޕީއެންސީން ކުރިމަތިލީ ކެންޑިޑޭޓުން ވޯޓެއް ނެތި ހޮވިއްޖެ އެވެ.

އަންނަ އޭޕްރީލް މަހު އޮންނަ ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތް ކުރާ ކޮމެޓީގެ އިންތިހާބުގައި ވާދަކުރަން ބޭނުންވާ ކެންޑިޑޭޓުންނަށް ހުޅުވާލި ފުރުސަތު ވަނީ ހަމަވެފަ އެވެ. އިންތިހާބުގައި 2،993 ކެންޑިޑޭޓުން ވާދަ ކުރާނެ އެވެ.

ނަމަވެސް އިންތިހާބު ކުރަން ޖެހޭ އަދަދަށް ކުރިމަތިލުމުގެ ސަބަބުން އިންތިހާބުގެ ކުރީން ވޯޓެއް ނެތި ބައެއް ކެންޑިޑޭޓުންނަށް ވަނީ ގޮނޑި ކަށަވަރު ވެފަ އެވެ.

ވިލުފުށީ ކައުންސިލަށް ރައީސް ހިމެނޭހެން ފަސް މެންބަރުން އަދި އެ ރަށު އަންހެނުންގެ ތަރައްގީއަށް މަސައްކަތް ކުރާ ކޮމެޓީއަށް ވެސް ރައީސާ ހިމެނޭހެން ފަސް މެންބަރުން އިންތިހާބު ކުރާނެ އެވެ.

ނަމަވެސް ކައުންސިލްގެ މެންބަރު ކަމުގެ ހަތަރު މަގާމާއި އަންހެނުންގެ ތަރައްގީއަށް މަސައްކަތް ކުރާ ކޮމެޓީއަށް އިންތިހާބު ކުރަން ޖެހޭ މެންބަރު ކަމުގެ ހަތަރު މަގާމަށް ކުރިމަތިލީ އެ އަދަދަށެވެ. އެއީ މުޅީން ވެސް ޕީއެންސީގެ ކެންޑިޑޭޓުންނެވެ. އެހެން ކަމުން ވޯޓެއް ނެތި އެ ކެންޑިޑޭޓުން އިންތިހާބުވެ ޕީއެންސީއަށް ވަނީ އިތުރު 8 ގޮނޑި ލިބިފަ އެވެ.

ބޮޑު އާބާދީއެއް އޮތް ވިލުފުށީގައި ވޯޓް އޮންނާނީ ކައުންސިލަށް ރައީސަކު ހޮވުމަށާއި އަންހެނުންގެ ތަރައްގީއަށް މަސައްކަތް ކުރާ ކޮމެޓީއަށް ރައީސާއަކު ހޮވުމަށެވެ.

އެ ދެ މަގާމަށް ޕީއެންސީގެ ދެ ކެންޑިޑޭޓުންގެ އިތުރުން ދެން ކުރިމަތިލީ އަމިއްލަ ގޮތުން ދެ ކެންޑިޑޭޓެކެވެ.