އުރީދޫ މޯލްޑިވްސްގެ ޑިރެކްޓަރުންގެ ބޯޑުން 2025 ވަނަ އަހަރުގެ ފައިދާގެ ތެރެއިން ހިއްސާދާރުންނަށް ބަހާނެ ޑިވިޑެންޑްގެ ގޮތުގައި ހިއްސާއަކަށް 3 ރުފިޔާ 54 ލާރި ދިނުމަށް ނިންމައިފިއެވެ.
މި ގޮތަށް ނިންމާފައިވަނީ އިއްޔެ ބޭއްވުނު އުރީދޫގެ ޑިރެކްޓަރުންގެ ބޯޑު ޖަލްސާގައެވެ. މި ޖަލްސާގައި 2025 ވަނަ އަހަރުގެ އޮޑިޓްކޮށްފައިވާ މާލީ ހިސާބުތަކާއި އަހަރީ ރިޕޯޓު ވެސް ވަނީ ފާސްކޮށްފައެވެ.
ކުންފުނިން ހާމަކޮށްފައިވާ ގޮތުގައި، 2025 ވަނަ އަހަރުގެ ޑިވިޑެންޑް ލިބުމުގެ ހައްގު ލިބިގެންވަނީ 12 ފެބްރުއަރީ 2026 ވާ ބުރާސްފަތި ދުވަހުގެ މެންދުރު 2:00 ގެ ކުރިން އުރީދޫ މޯލްޑިވްސްގެ ހިއްސާދާރުންގެ ދަފުތަރުގައި ހިމެނިފައިވާ ފަރާތްތަކަށެވެ.
ޑިރެކްޓަރުންގެ ބޯޑުން ފާސްކުރި 2025 ވަނަ އަހަރުގެ މާލީ ހިސާބުތަކާއި އަހަރީ ރިޕޯޓު، މި މަހުގެ 17 ވާ އަންގާރަ ދުވަހުގެ ނިޔަލަށް އާންމުކޮށް ޝާއިޢުކުރުމަށް ވަނީ ހަމަޖެހިފައެވެ. އަދި ހަމަ އެ ތާރީޚުގެ ކުރިން، އަންނަ މާރިޗު މަހު ބޭއްވުމަށް ހަމަޖެހިފައިވާ އަހަރީ އާންމު ޖަލްސާގެ ނޯޓިސް އާއި އެޖެންޑާ ވެސް ކުންފުނީގެ ވެބްސައިޓުގައި އާންމުކުރާނެ ކަމަށް އުރީދޫއިން ބުނެއެވެ.
މި އަހަރުގެ މާރިޗު މަހު ބާއްވާ އަހަރީ އާންމު ޖަލްސާއަށް، ބޯޑުން ހުށަހަޅާފައިވާ ޑިވިޑެންޑާއި މާލީ ހިސާބުތައް ފާސްކުރުމަށް ހިއްސާދާރުންނަށް ހުށަހެޅޭނެއެވެ. ހިއްސާދާރުން މި ޑިވިޑެންޑް ފާސްކޮށްފިނަމަ، މާރިޗު މަހުގެ ތެރޭގައި ޑިވިޑެންޑް ބެހުމުގެ މަސައްކަތް ފެށިގެންދާނެއެވެ.
ކުންފުނިން ބުނި ގޮތުގައި، އަހަރީ އާންމު ޖަލްސާ ބާއްވާނެ ތާރީޚާއި، ގަޑި އަދި ވޯޓުލުމާ ގުޅޭ ތަފުސީލުތައް ވެސް 17 ފެބްރުއަރީގައި އާންމުކުރާ ނޯޓިސްއާއެކު ހިއްސާދާރުންނަށް ލިބިގެންދާނެއެވެ.
Advertisement
This content is created and paid for by advertisers and does not involve Voice Journalists
