އެމެރިކާގެ ކުރީގެ ރައީސް ބިލް ކްލިންޓަނާއި، ކުރީގެ ސެކްރެޓަރީ އޮފް ސްޓޭޓް ހިލަރީ ކްލިންޓަން، ޖެފްރީ އެޕްސްޓީންގެ މައްސަލާގައި ކޮންގްރެސްއަށް ބަޔާން ދިނުމަށް އެއްބަސްވެއްޖެއެވެ.

ކްލިންޓަންގެ ދެމަފިރިން މިކަމަށް އެއްބަސްވެފައިވަނީ، ހައުސް އޯވަސައިޓް ކޮމިޓީއަށް ހާޒިރުވުމަށް އިންކާރު ކުރަމުންދާތާ މަސްތަކެއް ވުމަށްފަހު، އެ ދެމީހުން މަޖިލީހުގެ ހުރުމަތް ކެނޑިކަމަށް ވޯޓެއް ނަގަން ކުޑަ ދުވަސްކޮޅަކަށް ވެފައި ވަނިކޮށެވެ. މިއީ 1983 ވަނަ އަހަރު ޖެރަލްޑް ފޯޑަށްފަހު، އެމެރިކާގެ ކުރީގެ ރައީސަކު ކޮންގްރެސްގެ ޕެނަލަކަށް ހެކިބަސްދޭ ފުރަތަމަ ފަހަރެވެ.

ބިލް ކްލިންޓަންގެ ޑެޕިއުޓީ ޗީފް އޮފް ސްޓާފް އެންޖެލް އުރޭނާ އެކްސްގައި ކުރެއްވި ޕޯސްޓެއްގައި ވިދާޅުވީ، ކޮމިޓީން ސިޔާސީ މަންފާއަށް މަސައްކަތް ކުރި ނަމަވެސް، ކުރީގެ ރައީސާއި ކުރީގެ ސެކްރެޓަރީ އޮފް ސްޓޭޓް ހެކިބަސް ދެއްވުމަށް ހާޒިރުވާނެ ކަމަށެވެ.

ބިލް ކްލިންޓަނަކީ އެޕްސްޓީންއާ ގާތް ގުޅުމެއް އޮތް ބޭފުޅެއް ނަމަވެސް، އެޕްސްޓީން ހިންގި ކުޑަކުދިންނަށް ޖިންސީ ގޯނާ ކުރުމުގެ ކުށްތަކުގެ އެއްވެސް މައުލޫމާތެއް ނޭނގޭ ކަމަށާއި، މީގެ ވިއްސަކަށް އަހަރު ކުރިން އެ ގުޅުން ކަނޑާލާފައިވާ ކަމަށް އޭނާ ބުނެއެވެ.

ނަމަވެސް، އެޕްސްޓީންގެ އަމިއްލަ ޖެޓްގެ ލޮގްތަކުން ދައްކާ ގޮތުގައި 2002 އަދި 2003 ވަނަ އަހަރު ކްލިންޓަން ވަނީ އެ ޖެޓުގައި ބައިނަލްއަގުވާމީ ހަތަރު ދަތުރެއް ކޮށްފައެވެ. މީގެ އިތުރުން، އެޕްސްޓީންގެ ގޭގައި ކްލިންޓަން ނަގާފައިވާ ބައެއް ފޮޓޯތައްވެސް ދާދި ފަހުން ވަނީ އާންމުވެފައެވެ.

ކްލިންޓަންގެ ދެމަފިރިން މީގެ ކުރިން ބުނެފައިވަނީ، މިއީ ކުރީގެ ރައީސް ޑޮނަލްޑް ޓްރަމްޕްގެ އިރުޝާދުގެ ދަށުން ސިޔާސީ ވާދަވެރިން ލަދުގަންނުވާލުމަށް ހިންގާ ކަމެއް ކަމަށެވެ. ނަމަވެސް، ކޮމިޓީގެ މުގައްރިރު ޖޭމްސް ކޯމާ ވިދާޅުވީ ގާނޫނަށްވުރެ މަތީގައި އެކަކުވެސް ނުހުންނާނެ ކަމަށާއި، މި ނިންމުން ނިންމީ ނެރެފައިވަނީ ދެ ޕާޓީގެ މެންބަރުންގެ ތާއީދާއެކު ކަމަށެވެ