އެނދި ހޮޅިތައް މަރާމާތުކުރަމުން ދާއިރުވެސް ބޮލަށް ނަޖިސް ފްލަޝްކުރާ މައްސަލަ ބޮޑުވެއްޖެ
ހިޔާ ފްލެޓުތަކުގެ 5 ވަނަ ޓަވަރުގައި، މިދިޔަ ހުކުރު ދުވަހު ހިނގި އަލިފާނުގެ ހާދިސާގައި އަނދާފައިވާ، ނުވަތަ ގެއްލުންލިބިފައިވާ ފާހާނާ ހޮޅިތައް މަރާމާތުކުރުމުގެ މަސައްކަތުގައި އުޅޭ މީހުންގެ ގަޔަށް ނަޖިސް ފްލަޝް ކުރަމުންދާ މައްސަލަ ބޮޑުވެއްޖެއެވެ.
އެޗްޑީސީއިން ވަނީ މި މަސައްކަތްތައް ކުރިއަށްދާ ވަގުތުގައި ފާހަނާ ބޭނުންނުކުރުމަށްވެސް އަންގާފައެވެ. ނަމަވެސް މި ވަގުތުތަކުގައިވެސް ފާހަނާ ބޭނުންކުރަމުންދާތީ މި މަސައްކަތުގައި އުޅޭ މީހުންނަށް ބޮޑެތި އުނގަގޫތަކަކާވަނީ ކުރިމަތިލާން ޖެހިފައެވެ. އަދި މިކަމުގެ ސަބަބުން މަސައްކަތް ލަސްވަމުންދާކަމަށްވެސް އެޗްޑީސީއިން ބުނެއެވެ.
އެގޮތުން އިއްޔެ އެ މަސައްކަތާއި ގުޅޭގޮތުން މައުލޫމާތު ދެމުންވެސް މަސައްކަތުގައި އުޅޭ މީހުން ވަނީ އެކަމުގެ ކަންބޮޑުވުން ފާޅުކޮށްފައެވެ.
”ނަޖިސް ފްލަޝް ކުރުމުގެ ސަބަބުން މިއަދުވެސް ތިން ފަހަރަށް ފެންވަރައި އެއިން ތާހިރުވާން ޖެހިއްޖެ. އެފަދަ ކަންކަމުގެ ސަބަބުން މަސައްކަތް އިތުރަށް ލަސްވޭ“ މަސައްކަތުގައި އުޅޭ މީހަކު ބުނެފައިވެއެވެ.
މި އަލިފާނުގެ ހާދިސާގައި، 38 ފްލެޓެއްގެ ނަރުދަމާ ހޮޅި އަނދާފައިވެއެވެ. އަދި އެތަނުގައި ހަރުކޮށްފައި ހުރި 34 އޭސީ އައުޓްޑޯ ޔުނިޓާއި ވައިގޮޅިއަށް ކަނޑާފައިވާ ކުޑަ ދޮރުތައް ވެސް ވަނީ އެއްކޮށް ހަލާކުވެފަ އެވެ.
އެހެންކަމުން، ނޭޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން ވަނީ އަލިފާނުގެ ހާދިސާގައި ގެއްލުންވި 7 އެޕާޓްމަންޓެއްގެ 37 މީހަކަށް ވަގުތީ ބޯހިޔާވަހިކަން ފޯރުކޮށްދީފަ އެވެ.
Advertisement
This content is created and paid for by advertisers and does not involve Voice Journalists
