އަންނަ މާޗު މަހުން ފެށިގެން، ވިއްސަށްވުރެ މަދު އަދަދެއްގެ ބިދޭސީން ގެންގުޅޭ ކުންފުނިތަކުން އަހަރީ ކޯޓާ ފީ ދައްކަން ނުޖެހޭ ގޮތަށް ހަދަން ނިންމާފައިވާ ކަމަށާ، އެކަމަށްޓަކައި ގާނޫނަށް ގެންނަންޖެހޭ އިސްލާހް މަޖިލީހަށް ހުށަހަޅުއްވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެ އެވެ.

މި އަހަރުގެ ރިޔާސީ ބަޔާން އިއްވަމުން ރައީސް ވިދާޅުވީ، ކުދި އަދި މެދުފަންތީގެ ވިޔަފާރިތަކަށް ލުއިފަސޭހަ ކޮށްދިނުމަށް، ކުދި އަދި މެދުފަންތީގެ ކެފޭ ރެސްޓޯރަންޓްތައް ރެޖިސްޓްރީ ކުރުމަށް ނަގަމުންއައި ފީ ކުރިއަށް އޮތް ދެއަހަރު ދުވަހަށް 50 އިންސައަށް ކުޑަކުރެވިފައިވާ ކަމަށެވެ. 

މިއާއެކު ރައީސް މުއިއްޒު ވިދާޅުވީ ކުދި އަދި މެދު ފަންތީގެ ވިޔަފާރިތައް ކުރިއެރުވުމަށްޓަކައި އޮތް އެންމެ ބޮޑު ހުރަހަކީ އަދި ދިމާވާ އެންމެ ބޮޑު އެއް ގޮންޖެހުމަކީ އޮންލައިން ޕޭމަންޓު ނިޒާމައް ރާއްޖޭގައި ގާއިމުވެފައި ނެތުން ކަމަށެވެ.

އެ މައްސަލަ ހައްލު ކުރުމަށް، ޕޭޕަލްގެ ހިދުމަތް ރއްޖޭގައި ތަޢާރަފް ކުރުމުގެ މަސައްކަތް ކުރިއަށްދާ ކަމަށާ، އެ ޚިދުމަތް ރާއްޖޭގައި ބޭނުންކުރެވޭނެ އިންތިޒާމް ދާދި އަވަހަށް ހަމަޖެހިގެންދާނެ ކަމަށް އެމަނިކުފާނު ވިދާޅުވިއެވެ.

ހަމަ އެހެންމެ، ރާއްޖެ އާއި ރާއްޖެއިން ބޭރުގައި ފައިސާގެ މުއާމަލާތްތައް ފަސޭހަ ކަމާއެކު ކުރެވޭނެ އިންތިޒާމް ހަމަޖެއްސުމަށް ދިވެހި މަލްޓި ކަރެންސީ ޑިޖިޓަލް ވޮލެޓު، ސްވައިޕް މިހާރު ތައާރަފު ކޮށްފައިވާ ކަމަށްވެސް މުއިއްޒު ވިދާޅުވި އެވެ.

މީގެ އިތުރުން އަލީބާބާ ގުރޫޕާއެކު ވެވުނު އެއްބަސްވުމުގެ ދަށުން ދިވެހި އުފެއްދުންތައް ބައިނަލްއަގުވާމީ ބާޒާރުގައި ވިއްކުމުގެ ފުރުސަތު ފަހިވެގެންގޮސްފައިވާކަންވެސް އެމަނިކުފާނު ފާހަގަކިރެއްވިއެވެ.