މި އަހަރު ދިވެހި ހައްޖުވެރިންނަށް މިނާގައި ދެވޭ ޚިދުމަތްތައް އިތުރަށް ފުރިހަމަވާނެ ކަމަށް ހައްޖު ކޯޕަރޭޝަނުން ބުނެފިއެވެ. 

ސަންގުޓީވީގެ ޕްރޮގްރާމެއްގައި ވާހަކަދައްކަވަމުން ހައްޖު ކޯޕަރޭޝަންގެ ޑީއެމްޑީ ޢަލީ ޝަރީފް ވިދާޅުވީ، މި ސަރުކާރު އައި ފަހުން، ކުރެވުނު ފުރަތަމަ ހައްޖު ދަތުރުގެ ތަޖުރިބާއިން، އެ ދަތުރުގެ ކަންކަން އިތުރަށް ފުރިހަމަ ކުރެވޭނެކަން އެނގިގެންދިޔަ ކަމަށެވެ. އެގޮތުން، ރަނގަޅު ކުރަންޖެހޭ ކަންކަން ފާހަގަކޮށް އެކަންކަން ރަނގަޅު ކުރުމުގެ މަސައްކަތް ސައުދީ ސަރުކާރާއި ދިވެހި ސަރުކާރާއި ގުޅިގެން ފެށި ކަމަށް އޭނާ ވިދާޅުވިއެވެ.

އެ މަސައްކަތުން ނިމިދިޔަ އަހަރުގެ ހައްޖުގެ ކަންކަން ފުރިހަމަކޮށް، މީގެ ކުރިން ހައްޖުގެ އަޅުކަމުގައި ދިވެހިންނަށް ދެވިފައި ނުވާފަދަ ފުރިހަމަ ޚިދުމަތެއް ދެވިފައިވާ ކަން އޭނާ ފާހަގަކުރެއްވިއެވެ.

ޝަރީފް ވިދާޅުވީ، މި އަހަރުގެ ހައްޖުގައި މިނާގައި ދިވެހިންނަށް ދެވޭ ޚިދުމަތްތައް މިދިޔަ ފަހަރަށްވުރެވެސް ފުރިހަމަވާނެ ކަމަށެވެ.

ޝަރީފް އިތުރަށް ވިދާޅުވީ، ހައްޖުގެ އަޅުކަމުގައި އެހީތެރިންގެ ގޮތިގައިދާ މީހުންނަށްވެސް އިތުރު ޓްރެއިނިން ތަކެއް ދިނުމުގެ މަސައްކަތް މިހާރު ކުރިއަށްދާ ކަމަށެވެ. 

ހައްޖު ކޯޕަރޭޝަނުންގެ އެމްޑީ ދާދިފަހުން ވަނީ، ހައްޖުގެ އަޅުކަމަށް ތައްޔާރުވުމަށް ވާންޖެހޭ ތައްޔާރީތަކުގެ ބޮޑުބައެއް ނިމިފައިވާކަމަށް ވިދާޅުވެފައެވެ. 

އެގޮތުން، މިއަހަރުގެ ހައްޖުވެރިން ތިބުމަށް ހަމަޖެހިފައިވާ ހޮޓްލަތަކަށް ފައިސާ ދައްކާ، މީގެ ކުރިން 2 ސްޓަރ ފެންވަރުގެ ހޮޓެލްތައް މިހާރު 4 ސްޓަރ ފެންވަރަށް ހެދުމުގެ މަސައްކަތްވެސް ކޮށް، މައްކާއާއި މަދީނާގެ އެކޮމޮޑޭޝަން ގެ ހުރިހާ ކަމެއް މިހާރު ވަނީ ނިމިފައިކަމަށް ޝަކީލް ވިދާޅުވިއެވެ.

ޝަކީލް ވިދާޅުވީ ހައްޖާޖީންގެ ރައްކާތެރިކަން ކަށަވަރުކުރުމަށްޓަކާވެސް މުހިންމު އެތައް ފިޔަވަޅެއް އެ ކޮޕަރޭޝަނުން އަޅާފައިވާކަމަށެވެ. އެގޮތުން، ފަސްޓްު އެއިޑް އާއި އޮކްސިޖަން ނެގުމަށް ބޭނުންވާ މެޝިންތަކާއި އޮކްސިޖަން ސިލިންޑަރު ކަހަލަ ހުރިހާ ތަކެއްޗެއް ދަތުުރުފަތުރުކުރާއިރު ބަހުގައިވެސް ހުންނާނެކަމަށާއި، މި ވަގުތު ރާއްޖޭގައި  ރާއްޖޭގައި އެންމެ ފެންވަރުގެ ތަމްރީނު ލިބިފައިވާ އެ ކޯޕަރޭޝަންގެ މުވައްޒަފުންނާއި ޑޮކްޓަރުންނާއި ނަރުހުންނަށް ކޮންމެ ތަނެއްގައިވެސް ސިއްހީ ހިދުމަތް ފޯރުކޮށްދެވޭނެކަމަށާއި، ސިއްހީ ރައްކާތެރިކަން ކަށަވަރު ކުރުމަށްޓަކައި ސައުދީ އަރަބިއާގެ ނެޝަނަލް ހޮސްޕިޓަލްގެ ދަށުން ހިންގާ އަބީރު ހޮސްޕިޓަލާއި އެކުވެސް އެއްބަސްވުމެއް ހެދިފައިވާކަމަށް އޭނާ ވިދާޅުވިއެވެ. 

މީގެ އިތުރުން، ހައްޖުވެރިންގެ ކަރުގައި އަޅާފައި އޮންނަ ފާހާއި އެކު އިލެކްޓްރޮނިކް ޓްރެކިންގ ޑިވައިސްއެއް އޮންނާނެ ކަމަށާއި، މި ޑިވައިސް މެދުވެރިކޮށް ހައްޖުވެރިން އަދި އުމްރާވެރިން އުޅުއްވާ ހުރިހާ ހިސާބެއް 24 ބެލޭނެކަމަށްވެސް މައުލޫމާތުދެއްވިއެވެ.