މިމަހުގެ 6 ވަނަ ދުވަހާއި 7 ވަނަ ދުވަހު، 48 ގަޑިއިރު ތެރޭ ހުޅުމާލޭއިން 38 އުޅަނދު ޖޫރިމަނާ ކޮށްފައިވާކަމަށް ފުލުހުން މައުލޫމާތުދީފިއެވެ. 

ފުލުހުން އާންމުކުރި ހިސާބުތަކުގައި ވާގޮތުން ހުޅުމާލެއިން ޖޫރިމަނާ މި ކުރެވުނު 38 އުޅަނދުގެ ތެރޭގައި ހިމެނެނީ 2 ފުރޮޅުލީ 32 އުޅަނދާއި، 4 ފުރޮޅުލީ 3 އުޅަނދެވެ.

މީގެ އިތުރުން، މި ހިސާބުތަކުގައި ވާގޮތުން މި ދެދުވަހު ހުޅުމާލެއިން ޖުމުލަ 26 އުޅަނދެއް ވަނީ ޓޯވ ކޮށްފައެވެ. މީގެ ތެރޭގައި ހިމެނެނީ ލައިސެންސް ނެތި ދުއްވައިގެން ޖުމްލަ 2 ފުރޮޅުލީ 16 އުޅަނދަކާއި 4 ފުރޮޅުލީ 1 އުޅަނދެވެ. ނުރައްކާތެރިކޮށް ދުއްވައިގެން 2 ފުރޮޅު ލީ 4 އުޅަނދު އަދި ރަޖިސްޓްރީ ނަންބަރު ބަދަލުކޮށްގެން ދުއްވުމުން 2 ފުރޮޅުލީ 1 އުޅަނދަާއި 4 ފުރޮޅުލީ 2 އުޅަނދު ޓޯވ ކޮށްފައިވެއެވެ. މީގެ އިތުރުން، އެކްސިޑެންޓު ފަދަ ތަހުގީގުކުރާ މައްސަލަތަކަށް 2 ފުރޮޅުލީ 2 އުޅަނދު ވެސް ޓޯވ ކޮށްފައިވެއެވެ. 

ފުލުހުން ގެންދަނީ މާލެއާއި، ހުޅުމާލޭގެ މަގުތަކުގައި އާއްމު ރައްޔިތުންނަށް އުނދަގޫވާގޮތަށް ޕާކުކޮށްފައި ހުންނަ އުޅަނދުތައް ޓޯވ ކުރުމުގެ މަސައްކަތް އެކި ވަގުތުތަކުގައި ހަރުދަނާ ކަމާއިއެކު ކުރަމުންނެވެ. އަދި ޓޯވ ކުރެވޭ އުޅަނދުތަކުގެ ތަފާސްހިސާބު ހިއްސާކުރަމުންނެވެ.