ފަލަސްތީނުގެ މިނިވަން ދައުލަތުން ހުޅަނގު އައްސޭރި ވަކިނުކުރެވޭނެ: ޖަރުމަނު
އިސްރާއީލުން ކިތަންމެ ވަރަކަށް ފަލަސްތީނުގެ ބިންތަކަށް އަތްގަދަކުރަމުންދިޔަ ނަމަވެސް، ފަލަސްތީނުގެ މިނިވަން ދައުލަތުގެ ކިބައިން ހުޅަނގު އައްސޭރި ވަކި ނުކުރެވޭނޭކަމަށް ޖަރުމަނުވިލާތުން ބުނެފިއެވެ.
އިސްރާއީލުން ހުލަނގު އައްސޭރީގެ ބިންތައް ވެރިކުރަމުންދާ މައްސަލާގައި އެޤައުމުގައި ހުންނަވާ ޖަރުމަނު ސަފީރު ސްޓެފަން ސައިބަރޓް ވަނީ ރުޅިގަނޑު ފަޅައިގެންގޮސް ސޯޝަލް މީޑިއާގައި އިހްސާސްތައް ބޭރުކޮށްލާފައެވެ.
އެކްސްގައި ކުރެއްވި ޕޯސްޓެއްގައި ވިދާޅުވީ، އިސްރާއީލުން ފަލަސްތީނުގެ ބިންތައް ވެރިކުރުމަށް ފަށާފައިވާ މަސައްކަތްތަކުގެ ދަށުން ގައުމުގެ ސެކިއުރިޓީ ކެބިނެޓުން އެންމެ ފަހުން ނިންމާފައިވާ ނިންމުންތަކަކީ، ބައިނަލްއަގުވާމީ ގާނޫނުތަކާ މުޅިން ހިލާފަށް ނިންމާފައިވާ ނިންމުންތަކެއްކަމަށެވެ. އެ ނިންމުންތައް އެޤައުމަށް ނުނިންމޭނޭކަމަށް އޭނާ ވަނީ ފާހަގަކުރައްވާފައެވެ.
އިސްރާއީލްގައި ހުންނަވާ ޖަރުމަނު ސަފީރު މިފަދަ ޕޯސްޓެއް ކުރައްވާފައިމިވަނީ، ރާމައްﷲގައި ހުންނަ ޖަރުމަނުވިލާތުގެ މަންދޫބު އަންކޭ ޝްލިމް ކުރެއްވި ޕޯސްޓަކާ ގުޅުވާފައެވެ. ޝްލިމް ވިދާޅުވީ އިސްރާއީލުން ހުޅަނގު އައްސޭރީގެ ހިފާފައިވާ ބިންތައް އަމިއްލަ ފަރާތްތަކަށް ގަނެވޭގޮތް ހެދުމާއި އެ ސަރަހައްދުގެ އިދާރީ ކަންކަމަށް އަތްގަދަކުރަން އުޅުމަކީ ބައިނަލްއަޤްވާމީ ޤާނޫނާ އަދި ޤަވާއިދުތަކާ މުޅިން ފުށުއަރާ ކަމެއްކަމަށެވެ.
ފަލަސްތީނުގެ ވެސްޓްބޭންކަށް އިސްރާއީލުން އަތްގަދަކުރަމުންދާ މައްސަލާގައި އެމެރިކާގެ ރައީސް ޑޮނާލްޑް ޓްރަމްޕްވެސް ވަނީ އެ ކަންތަކުގައި އެޤައުމަށް އެއްބާރުލުން ދެވެން ނެތްކަމަށް ވިދާޅުވެފައެވެ.
ވެސްޓްބޭންކްގައި އިސްރާއީލުން ޔަހޫދީން އާބާދުކުރަމުންދަނީ ބައިނަލްއަޤްވާމީގޮތުން ހެދިފައިހުރި ޤާނޫނުތަކާއި ގަވާއިދުތަކުގެ އިމުން ބޭރުންކަމަށް ބައިނަލްއަޤްވާމީ މުޖުތަމައުން މީގެ ކުރިންވެސް ވަނީ ފާހަގަކޮށްފައެވެ. އިސްރާއީލުން ބޭނުންވަނީ ވެސްޓްބޭންކް އެމީހުންގެ ބާރުގެ ދަށަށް ގެނެސް އެތަނުގައި ދިރިއުޅެމުންދާ ފަލަސްތީނުގެ ރައްޔިތުންގެ ރަށްވެރިކަން އިސްރާއީލަށް ބަދަލުކުރުމަށެވެ.
Advertisement
This content is created and paid for by advertisers and does not involve Voice Journalists
