މާލެއާއި، ސިނަމާލެ ބްރިޖް އަދި ހައިވޭ ހިމެނޭ ސަރަޙައްދުގައި މި ހިނގާ ފެބުރުވަރީ މަހުގެ ފުރަތަމަ ހަފްތާގެ ތެރޭގައި ޖުމްލަ 63 އެކްސިޑެންޓެއް ހިނގާފައިވާކަމަށް ފުލުހުންގެ ހިސާބުތަކުން ދައްކައިފިއެވެ.

މީގެ ތެރެއިން އެންމެ ގިނަ ހާދިސާ ހިނގާފައިވަނީ މާލޭގައެވެ. އެއީ 47 އެކްސިޑެންޓެވެ.

ތަފާސްހިސާބުތަކަށް ބަލާއިރު، އެއް ދުވަހެއްގެ ތެރޭގައި އެންމެ ގިނަ އެކްސިޑެންޓް ހިނގާފައިވަނީ ފެބުރުވަރީ 5 ވަނަ ދުވަހުއެވެ. އެ ދުވަހު 16 ހާދިސާއެއް ހިނގާފައިވާއިރު، ފެބުރުވަރީ 1 ވަނަ ދުވަހު 12 ހާދިސާއެއް ހިނގާފައިވެއެވެ. މި އެކްސިޑެންޓްތަކުގެ ތެރެއިން ގިނަ ހާދިސާތައް ހިނގާފައިވަނީ ދުވާލުގެ ވަގުތުތަކުގައެވެ.

މި މުއްދަތުގައި އެންމެ ގިނައިން ހިނގާފައިވަނީ ސައިކަލުތައް ހިމެނޭ އެކްސިޑެންޓްތަކެވެ. އޭގެ ތެރޭގައި ދެ ސައިކަލު ޖެހިގެން ހިނގި 23 ހާދިސާއަކާއި، ސައިކަލަކާއި ކާރެއް ޖެހިގެން ހިނގި 15 ހާދިސާއެއް ހިމެނެއެވެ. މި އެކްސިޑެންޓްތަކާ ގުޅިގެން 62 މީހަކަށް ކުދި އަނިޔާ ލިބިފައިވާއިރު، އެކަކަށް ސީރިއަސް އަނިޔާތަކެއް ލިބިފައިވާކަމަށް ފުލުހުން ހާމަކޮށްފައިވެއެވެ. 

މަގުމަތީގެ ސަލާމަތާއި ރައްކާތެރިކަން ކަށަވަރުކުރުމަށްޓަކައި، ޓްރެފިކް ގަވާއިދުތަކަށް ފުރިހަމައަށް ބޯލަނބައި، ދުއްވާއިރު ސަމާލުކަން އިތުރުކުރުމަށް ހުރިހާ ފަރާތްތަކަށް ވެސް ފުލުހުން ވަނީ އިލްތިމާސްކޮށްފައެވެ.