ޣައްޒާއަށް އެހީ ވުމުގެ ނަމުގައި އެމެރިކާއިން އިސްވެ އުފެއްދި "ބޯޑް އޮފް ޕީސް" ނަމަކަށް ކިޔާ ސުލްހައިގެ އެއްބަސްވުމުގައި އިސްރާއީލުން ރަސްމީކޮށް ބައިވެރިވެއްޖެއެވެ.

އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ މި އެއްބަސްވުމުގައި ސޮއިކުރީ މިމަހު 11 ވަނަ ދުވަހު ވޮޝިންޓަނުގައެވެ. މި ނިންމުމާ ގުޅިގެން ފަލަސްތީނުގެ ހައްގުގައި މަސައްކަތްކުރާ ފަރާތްތަކުން އަންނަނީ ވަރަށް ބޮޑަށް ކަންބޮޑުވުން ފާޅުކުރަމުންނެވެ.

ސަބަބަކީ މި ނިންމުމުގެ ސަބަބުން ފަލަސްތީނުގެ ރައްޔިތުންގެ އެދެވޭ އެހީތެރިކަމެއް ނުލިބި، ޣައްޒާގެ މުސްތަގުބަލުގެ މައްޗަށް އިސްރާއީލުގެ ނުފޫޒު ދާއިމީކޮށް ވަރުގަދަވެގެންދާނެއެވެ. މިއީ ޤަތުލްއާއްމަށްފަހު ޣައްޒާގެ ވެރިކަމުގެ  ނިޒާމާއި، ސަލާމަތީ ކަންކަމާއި، އަދި އާރާސްތުކުރުމުގެ މަސައްކަތްތައް ބެލެހެއްޓުމަށް އުފެއްދާފައިވާ، ހަމަޖެހުން ގާއިމުކުރުމަށް އެޅޭ ފިޔަވަޅެއް ކަމަށް ބުނި ނަމަވެސް، މީގެ ސަބަބުން ހަނގުރާމައިގެ އަސަރު އެންމެ ބޮޑަށް ކޮށްފައިވާ ރައްޔިތުންގެ ބަސް ހޯދުމުގެ ފުރުސަތު ވެސް ގެއްލިގެންދާނެއެވެ. 

ބައިނަލްއަގުވާމީ މީޑިއާތަކުން ރިޕޯޓްކުރާ ގޮތުގައި، "ބޯޑް އޮފް ޕީސް" އަކީ ހަނގުރާމަ ހުއްޓާލުމަށާއި ޣައްޒާގެ ހަލާކުވެފައިވާ އުމްރާނީ ވަސީލަތްތައް އަލުން ބިނާކުރުމަށް ބޭނުންވާ އެހީއަށް، ޑޮލަރު މެނޭޖްކުރުމަށް އެކުލަވާލާފައިވާ ބޮޑު އޮނިގަނޑެކެވެ.

ނަމަވެސް، ފަލަސްތީނުގެ ރައްޔިތުން އަދިވެސް އިސްރާއީލުގެ ހިސާރުގެ ދަށުގައި ތިއްބައި، ޣައްޒާގެ ސިޔާސީ އަދި އިދާރީ މުސްތަގުބަލު ބައްޓަންކުރުމުގައި އިސްރާއީލަށް ބާރު ދިނުމަކީ، ފަލަސްތީނުގެ އަމިއްލަ މިނިވަންކަމަށް އެޅޭ ބޮޑު ހުރަހެއް ކަމަށް އިންސާނީ ހައްގުތަކަށް މަސައްކަތްކުރާ ފަރާތްތަކުން ތަކުރާރުކޮށް ދަނީ ބުނަމުންނެވެ. 

"ބޯޑް އޮފް ޕީސް" ގެ ފުރަތަމަ ބޮޑު ބައްދަލުވުން މި މަހުގެ ފަހުކޮޅު ވޮޝިންޓަނުގައި ބޭއްވުމަށް ވަނީ ހަމަޖެހިފައެވެ. މި ބައްދަލުވުމުގައި މެންބަރު ގައުމުތަކުން އެ މަޝްރޫއު ތަންފީޒުކުރުމާ ގުޅޭގޮތުން މަޝްވަރާކުރާނެއެވެ. ނަމަވެސް، އިސްރާއީލުގެ ބައިވެރިވުމާ މެދު އުފެދިފައިވާ ހިޔާލުތަފާތުވުންތަކުން ހާމަވަނީ ހަނގުރާމައަށްފަހު ޣައްޒާ ބަލަހައްޓާނެ ގޮތަކާ މެދު ބައިނަލްއަގުވާމީ މުޖުތަމައުގައި އޮތް ބޮޑު ބައިބައިވުމެވެ.