ބަންގްލަދޭޝްގައި މިދިޔަ ބުރާސްފަތި ދުވަހު ބޭއްވި 13 ވަނަ އިންތިޚާބު، ބަންގްލަދޭޝް ނޭޝަނަލިސްޓް ޕާޓީ (ބީއެންޕީ) އިން ބޮޑު އަޣުލަބިއްޔަތަކުން ކާމިޔާބުކުރުމާ ގުޅިގެން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެ ޕާޓީގެ ލީޑަރު ތާރިގް ރަޙްމާނަށް މަރުޙަބާ ވިދާޅުވެއްޖެއެވެ.

ރައީސް މުޢިއްޒު އެކްސްގައި ކުރެއްވި ޕޯސްޓެއްގައި، ބީއެންޕީން ހޯދި ފާހަގަކޮށްލެވޭ ކާމިޔާބީއަށް މަރުޙަބާ ދަންނަވައި، ދިވެހިރާއްޖެއާއި ބަންގްލަދޭޝްއާ ދެމެދު އޮތް ގާތް ގުޅުން އިތުރަށް ބަދަހިކުރުމަށް އެކުގައި މަސައްކަތްކުރެއްވުމަށް އުންމީދުކުރައްވާ ކަމަށް ވިދާޅުވިއެވެ.

އަދި ކުރިއަށް އޮތް އަހަރުތަކުގައި ދެ ގައުމުގެ ބައިވެރިވުން އިތުރަށް ވަރުގަދަވެގެންދާނެ ކަމުގެ ޔަގީންކަން ރައީސް ވަނީ ދެއްވާފައެވެ.

ބަންގްލަދޭޝްގެ ކުރީގެ ބޮޑުވަޒީރު ޝައިޚް ހަސީނާގެ ވެރިކަން ޒުވާނުންގެ ވަރުގަދަ އިހުތިޖާޖުތަކަކަށްފަހު ވެއްޓުނު ފަހުން ބޭއްވި މި ފުރަތަމަ އާންމު އިންތިޚާބުގެ ނަތީޖާ ދައްކާގޮތުން، 300 ގޮނޑި ހިމެނޭ ގާނޫނު ހަދާ މަޖިލިސް ނުވަތަ 'ޖާތިޔާ ސަންގްސަދު' ގެ 209 ގޮނޑި ކާމިޔާބުކޮށްފައިވަނީ ބީއެންޕީ ހިމެނޭ އިއްތިހާދުންނެވެ. މިއީ މަޖިލީހުގެ ތިންބައިކުޅަ ދެބައި އަޣުލަބިއްޔަތެކެވެ. ބީއެންޕީއާ އެންމެ ގާތުން ވާދަކުރި ޖަމާއަތޭ އިސްލާމީ ޕާޓީއަށް ލިބިފައިވަނީ 68 ގޮނޑިއެވެ.

175 މިލިއަން މީހުންގެ އާބާދީއެއް އޮންނަ ބަންގްލަދޭޝްގެ ސިޔާސީ ހަމަޖެހުމަށް މި އިންތިޚާބަކީ ނުހަނު މުހިންމު އިންތިޚާބެކެވެ. ޚާއްސަކޮށް، ހަސީނާގެ ސަރުކާރާ ދެކޮޅަށް ކުރި މުޒާހަރާތަކުގައި ގައުމުގެ އިގްތިސާދަށާއި ސިނާޢަތްތަކަށް ލިބުނު ގެއްލުންތަކުން އަރައިގަތުމަށް މި ނަތީޖާ މުހިންމު ދައުރެއް އަދާކުރާނެ ކަމަށް ބެލެވެއެވެ.

އިންތިޚާބުގެ ކާމިޔާބީއާ ގުޅިގެން ބީއެންޕީގެ ލީޑަރު ތާރިގް ރަޙްމާން ވަނީ ރައްޔިތުންނަށް ޝުކުރު އަދާކުރައްވާފައެވެ. ނަމަވެސް، ކާމިޔާބީ ފާހަގަކުރުމަށް އެއްވެސް ހިނގާލުމެއް ނުވަތަ އެއްވުމެއް ނުބޭއްވުމަށާއި، އޭގެ ބަދަލުގައި ގައުމުގެ ސަލާމަތާއި ކުރިއެރުމަށް އެދި ހުކުރު ދުވަހު މިސްކިތްތަކުގައި ޚާއްސަ ދުޢާއެއް ކުރުމަށް އެ ޕާޓީން ވަނީ އިލްތިމާސްކޮށްފައެވެ.

ބީއެންޕީގެ މައިގަނޑު ވައުދުތަކުގެ ތެރޭގައި، ފަގީރު އާއިލާތަކަށް މާލީ އެހީތެރިކަން ފޯރުކޮށްދިނުމާއި، އެކަކަށް ބޮޑުވަޒީރުކަން ކުރެވޭނީ ގިނަވެގެން 10 އަހަރު ކަމަށް ކަނޑައެޅުމުގެ އިތުރުން ކޮރަޕްޝަނާ ދެކޮޅަށް ވަރުގަދަ ފިޔަވަޅުތަކެއް އެޅުން ހިމެނެއެވެ.