މާލޭ ވޯޓަރ އެންޑް ސުވަރޭޖް ކޮމްޕެނީ (އެމް.ޑަބްލިޔު.އެސް.ސީ) އިން، ހުޅުމާލޭގައި ދުވާލަކު 5،000 ޓަނުގެ ފެން އުފެއްދުމުގެ ގާބިލުކަން ހުރި އާ އާރު.އޯ ޕްލާންޓެއް ބަހައްޓައި، އޭގެ ހިދުމަތް ރަސްމީކޮށް ފަށައިފިއެވެ.

މިއީ މާލެ ސަރަހައްދުގެ ފެނުގެ ނިޒާމު އިތުރަށް ހަރުދަނާކޮށް، ފެން އުފައްދާ މިންވަރު އިތުރުކުރުމަށްޓަކައި ކުރިއަށްގެންދިޔަ މުހިންމު މަޝްރޫއެކެވެ.

މިއާއިއެކު ކުރިއަށް އޮތް ރަމަޟާން މަހު ފެނުގެ ޑިމާންޑް އިތުރުވެގެންދިޔަކަމުގައި ވިޔަސް، މި ޕްލާންޓާއެކު މާލެ އާއި ހުޅުމާލޭގެ ގޭބިސީތަކާއި ވިޔަފާރިތަކަށް މެދުނުކެނޑި ފެނުގެ ހިދުމަތް ފޯރުކޮށްދިނުމުގެ ގާބިލުކަން އިތުރުވެގެންދާނެއެވެ. އެމް.ޑަބްލިޔު.އެސް.ސީ އިން ހާމަކުރި ގޮތުގައި، މިއީ ހަލުވިކަމާއެކު އިތުރުވަމުންދާ އާބާދީއާއި، އަލަށް ތަރައްގީވަމުންދާ ހައުސިންގ މަޝްރޫއުތަކަށް ބޭނުންވާ ފެން ފޯރުކޮށްދިނުމަށް އެ ކުންފުނިން ގެންގުޅޭ ރޭވުމުގެ ދަށުން ކުރިއަށްގެންދިޔަ މަސައްކަތެކެވެ.

ރާއްޖޭގެ ފެނުގެ ނިޒާމު މައިގަނޑު ގޮތެއްގައި ބިނާވެފައިވަނީ އާރު.އޯ ޓެކްނޮލޮޖީ ބޭނުންކޮށްގެން ކަނޑުގެ ލޮނުފެން މީރުފެނަށް ބަދަލުކުރުމުގެ މައްޗަށެވެ. އެހެންކަމުން، ފެނުގެ ޑިމާންޑް ބޮޑުވާ ވަގުތުތަކުގައާއި ނުވަތަ ދިމާވާ ކުއްލި މައްސަލަތަކުގައިވެސް ހިދުމަތަށް ބުރޫނާރާނެކަން ކަށަވަރުކުރުމަށްޓަކައި މިފަދަ އާ ވަސީލަތްތައް ގާއިމުކުރުމަކީ ކޮންމެހެން ބޭނުންތެރި ކަމެކެވެ. އެގޮތުން، މީގެއިތުރުން އެމްޑަބްލިޔުއެސްސީގެ ފެން ރައްކާކުރުމުގެ ގާބިލްކަން އިތުރުކުރުމަށްޓަކައި މާލޭގައި 13،000 ޓަނުގެ 2 ތާނގީ ބެހެއްޓުމުގެ މަސައްކަތްވެސް ވަނީ ފަށާފައެވެ. މިއީ 26000 ޓަނުގެ ފެން ރައްކާކުރުމުގެ ޤާބިލުކަން ލިބޭނެ ޕްލާންޓްތަކެކެވެ.

އެމް.ޑަބްލިޔު.އެސް.ސީ އިން ވަނީ ރައްޔިތުންނަށް ރައްކާތެރި އަދި އިތުބާރު ހުރި ފެނުގެ ހިދުމަތެއް މެދުނުކެނޑި ފޯރުކޮށްދިނުމަށްޓަކައި، ދުރާލާ ރާވައިގެން އިންފްރާސްޓްރަކްޗަރ ތަރައްގީކުރުމުގައި ދެމިއޮންނާނެ ކަމުގެ ޔަގީންކަން ދީފައެވެ. އަދި މާލެ ސަރަހައްދު ފުޅާވަމުންދާ މިންވަރަށް ބަލައި، ހިދުމަތުގެ ފެންވަރު މަތިކުރުމަކީ އެ ކުންފުނީގެ އެންމެ އިސް އަމާޒު ކަމުގައިވެސް ބުނެފައިވެއެވެ.