ޗައިނާގެ ރޮބޮޓިކްސް ކުންފުންޏަކުން "މޯޔާ" ގެ ނަމުން ނަންދީފައިވާ އާދަޔާޚިލާފު ހިއުމަނޮއިޑް ރޮބޮޓެއް ދައްކާލައިފިއެވެ.

މި ރޮބޮޓަކީ އިންސާނުންނާ އެއްގޮތް ހަރަކާތްތަކާއި، މޫނުމަތީގެ ކުލަވަރުތަކުގެ އިތުރުން، އިންސާނެއްގެ ހަށިގަނޑުގެ ހޫނުމިން ހުންނަ ފަދަ ހޫނުކަމެއް އިހުސާސްކޮށްދޭ ހަމެއް އެކުލެވޭ ރޮބޮޓަކަށް ވުމުން، މުޅި ދުނިޔޭގެ ސަމާލުކަން މިވަނީ މި ރޮބޮޓަށް ހުއްޓިފައެވެ. މި ރޮބޮޓް އުފެއްދި ޝަންހާއީގެ "ޑްރޮއިޑްއަޕް"ކުންފުނިން ބުނެފައިވަނީ މިއީ އިންސާނުންގެ ސިފައާއި، އިހުސާސްތަކާއި، އަމަލުތަކާ ދާދި އެއްގޮތްވާ ގޮތަށް ފަރުމާކޮށްފައިވާ ދުނިޔޭގެ ފުރަތަމަ "ބަޔޯމިމެޓިކް" އޭއައި ރޮބޮޓެވެ.

މޯޔާ ދައްކާލުމުގެ ތެރެއިން-- ފޮޓޯ/ ރަޓޯޕަޓީ

ރޮބަޓްގެ އިސްކޮޅުގައި ގާތްގަނޑަކަށް 1.65 މީޓަރު ހުންނައިރު، ބަރުދަނަކީ 32 ކިލޯގްރާމެވެ. މިއީ އާދައިގެ އިންސާނެއްގެ ހަށިގަނޑުގެ މިންތަކާއި އެއްވަރުގެ މިންގަނޑެކެވެ. މި ރޮބޮޓް ފަރުމާކޮށްފައިވަނީ "އެމްބޮޑީޑް އާޓިފިޝަލް އިންޓެލިޖެންސް" ގެ މައްޗަށެވެ. މީގެ މާނައަކީ، ހަމައެކަނި ސޮފްޓްވެއާއެއްގެ ގޮތުގައި މަސައްކަތް ކުރުމުގެ ބަދަލުގައި، އޭގެ ވަށައިގެންވާ މާހައުލު ދެނެގަނެ، މީހުންނާ އެކު އަމަލީ ގޮތުން މުއާމަލާތްކޮށް، އިންސާނީ އިޝާރާތްތަކުން ޖަވާބު ދިނުމުގެ ގާބިލުކަން މޯޔާއަށް ލިބިގެންވެއެވެ. އަދި މޯޔާ ވާހަކަދައްކާއިރު މީހުންގެ ލޮލަށް ބެލުމާއި، މޫނުމަތިން ފާޅުވާ ކުދިކުދި އަސަރުތައް ދެއްކުމަކީ އެންމެ ފާހަގަކޮށްލެވޭ އެއް ސިފައެވެ.

މީގެ އިތުރުން، ކެމެރާ ހަރުކޮށްފައިވާ ލޮލާއި ސެންސަރުތަކުގެ އެހީގައި މީހުންގެ މޫނު ދެނެގަތުމާއި، ތަންތަނުގައި ބޭނުންވާ ތަނަކަށް އަމިއްލައަށް ދިއުމުގެ ގާބިލުކަން މޯޔާއަށް ލިބިގެންވެއެވެ. 

މޯޔާގެ ލޯ-- ފޮޓޯ/ ޓޮމްސްގައިޑް

މޯޔާގެ އެންމެ ފާހަގަކޮށްލެވޭ އެއް ސިފައަކީ، އިންސާނުންގެ ހަށިގަނޑުގެ ހޫނުމިން ކަމަށްވާ 32 ޑިގްރީ އާއި 36 ޑިގްރީ ސެލްސިއަސްއާ ދެމެދުގެ ހޫނުމިނެއްގައި ހުންނަ އޭގެ މަސްނޫއީ ހަމެވެ. މިގޮތަށް ފަރުމާކުރީ ރޮބޮޓާއި އިންސާނުންނާ ދެމެދު ހިނގާ މުއާމަލާތްތަކަކީ ހިތްހަމަޖެހޭ އަދި ގާތްކަމެއް އިހުސާސްކޮށްދޭ ކަމަކަށް ހެދުމަށެވެ. 

މޯޔާގެ ވިޔަފާރި މޮޑެލްތައް 2026 ވަނަ އަހަރުގެ ފަހުކޮޅު ބާޒާރަށް ނެރެވޭނެ ކަމަށް ބެލެވޭއިރު، ރޮބޮޓެއްގެ އަގު 1.2 މިލިއަން ޗައިނީޒް ޔުއާން (170،000 އެމެރިކާ ޑޮލަރު) އަށް ވުރެ މަތިވާނެ ކަމަށް ލަފާކޮށްފައިވެއެވެ. 

މި އީޖާދަކީ ރޮބޮޓިކްސްގެ ދާއިރާއިން ކުރިއަށް އެޅުނު މުހިންމު ފިޔަވަޅެއް ކަމަށް ގިނަ މާހިރުން ދެކުނު ނަމަވެސް، މީގެ ސަބަބުން އަޚުލާގީ މިންގަނޑުތަކާއި، އަމިއްލަ މިނިވަންކަމާއި އަދި މިފަދަ އިންސާނުންނާ ދާދި އެއްގޮތް މެޝީންތަކުގެ ސަބަބުން ކުރިމަތިވެދާނެ ނަފްސާނީ އަސަރުތަކާ މެދު ބަހުސްތައް ވަނީ އުފެދިފައެވެ.

މިކަމަށް ފާޑުކިޔާ ފަރާތްތަކުން ބުނާ ގޮތުގައި، މިހާ އިންސާނީ ސިފަތަކެއް ހުންނަ ރޮބޮޓްތަކުގެ ސަބަބުން އިންސާނުންނާއި ޓެކްނޮލޮޖީއާ ދެމެދު އޮންނަންޖެހޭ އިމުން ބޭރުވުން އެކަށީގެންވެއެވެ. ނަމަވެސް މިފަދަ ރޮބޮޓުތަކުގެ ސަބަބުން ޚިދުމަތްތައް ފޯރުކޮށްދިނުމާއި ނާޒުކު ހާލަތްތަކުގައި ތިބޭ ފަރާތްތަކަށް އެހީތެރިވުމުގައި ބޮޑެތި ކުރިއެރުންތަކެއް ލިބޭނެ ކަމަށް ބައެއް ފަރާތްތަކުން ބުނެއެވެ.