އައްޑޫގައި، އެކްސިޑެންޓެއްގައި އަނިޔާވި މީހުން ގޮވައިގެން ދިޔަ އެމްބިއުލާންސް ވެސް އެކްސިޑެންޓުވެއްޖެ
އައްޑޫ ސިޓީ ހިތަދޫގައި ދެ ސައިކަލު ޖެހި ހިނގި ނުރައްކާތެރި އެކްސިޑެންޓެއްގައި އަނިޔާވި މީހުން ގޮވައިގެން ހޮސްޕިޓަލަށް ދަތުރުކުރި އެމްބިއުލާންސް ވެސް އެކްސިޑެންޓުވެއްޖެއެވެ.
ފުލުހުން ބުނި ގޮތުގައި، ފުރަތަމަ އެކްސިޑެންޓު ހިނގާފައިވަނީ ހިތަދޫ ޑޭޒީމަގާއި އެޅެދީދީ މަގު ގުޅުނު ކަންމަތީގައި ދެ ސައިކަލު ޖެހިގެންނެވެ. މި ހާދިސާގެ ރިޕޯޓް ފުލުހުންނަށް ލިބިފައިވަނީ ރޭ 21:40 އެހައިކަންހާއިރުއެވެ.
މި އެކްސިޑެންޓުގައި ދެ ސައިކަލުގައި ތިބި 4 މީހުންނަށް އެކިވަރުގެ އަނިޔާ ލިބިފައިވާއިރު، މިހާރު އެ މީހުންނަށް ދަނީ ހޮސްޕިޓަލުގައި ފަރުވާ ދެމުންދާ ކަމަށް ފުލުހުން ބުންޏެވެ.
ފުލުހުން އިތުރަށް ބުނީ ތަހުގީގުން އެނގިފައިވާ ގޮތުގައި، މި އެކްސިޑެންޓުގައި ހިމެނޭ ދެ ސައިކަލު ދުއްވަން ތިބީ ވެސް އެ ކެޓަގަރީގެ އުޅަނދު ދުއްވުމުގެ ލައިސަންސް ނެތް ދެ މީހުންނެވެ.
މި ހާދިސާގައި އަނިޔާވި މީހުން ގޮވައިގެން ހިތަދޫ ބޮޑުމަގުން ދަތުރުކުރި އެމްބިއުލާންސް ވެސް ވަނީ ކާރެއްގައި ޖެހި އެކްސިޑެންޓުވެފައެވެ.
މި ދެވަނަ އެކްސިޑެންޓުގެ ރިޕޯޓް ފުލުހުންނަށް ލިބިފައިވަނީ އެރޭ 21:59 އެހައިކަންހާއިރުއެވެ. އެމްބިއުލާންސް އެކްސިޑެންޓުވި ނަމަވެސް، މި ހާދިސާގައި އެއްވެސް މީހަކަށް އަނިޔާވެފައި ނުވާ ކަމަށް ފުލުހުން ބުނެއެވެ.
މި އެކްސިޑެންޓުގައި ހިމެނޭ ކާރު ފުލުހުން މިހާރު ވަނީ ޓޯކޮށްފައެވެ.
ފުލުހުން ދަނީ މި ދެ ހާދިސާވެސް އިތުރަށް ތަހުގީގު ކުރަމުންނެވެ.
Advertisement
This content is created and paid for by advertisers and does not involve Voice Journalists
