ކުރިއަށްއޮތް ލޯކަލް ކައުންސިލް އިންތިހާބުގައި ވެރިކަން ކުރާ ޕީއެންސީން ތާއީދުކުރާ މިނިވަން ކެނޑިޑޭޓެއް ނުހުންނާނޭކަމަށް އެޕާޓީގެ ފަރާތުން އިންތިހާބުގެ ކަންކަމުގައި އެންމެ އިސްކޮށް ހުންނަވާ ރައްޔިތުން މަޖިލީހުގެ އިނގުރައިދޫ ދާއިރާގެ މެމްބަރު، އިބްރާހިމް ފަލާހް ވިދާޅުވެއްޖެއެވެ.

މާފަންނު ކެމްޕެއިން ރަސްމީކޮށް ފެށުމުގެ ހަފްލާގައި ވާހަކަދައްކަވަމުން ކޮންގްރެސް ޕާޓީގެ ޕީޖީ ލީޑަރު ފަލާހް ވިދާޅުވީ، ލޯކަލް ކައުންސިލް އިންތިހާބުގައި ކައުންސިލާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީއަށް ބައެއް އަމިއްލަ ކެނޑިޑޭޓުން ކުރިމަތިލާފައިވާއިރު، އެމީހުންނާ ގުޅޭގޮތުން ސައްހަނޫން މައުލޫމާތު ފަތުރަމުންދާކަމަށެވެ.

އެގޮތުން މިނިވަން ކެނޑިޑޭޓުންނަކީ ސަރުކާރުގެ ކެނޑިޑޭޓުންގެ ގޮތުގައި ދައްކަމުންދާކަން ފާހަގަކުރައްވަމުން ފަލާހް ވިދާޅުވީ، އިންތިހާބުގައި ޕީއެންސީން ތާއީދުކުރާ އަމިއްލަ ކެނޑިޑޭޓުން ނެއް ރާއްޖޭގެ އެއްވެސް ސަރަހައްދެއްގައި ނުތިބޭނޭކަމަށެވެ.

މިނިވަން ކެނޑިޑޭޓެއްގެ ގޮތުގައި އިންތިހާބު ކާމިޔާބުކޮށް މޮޅުތަކެއް ލިބޭނެއޭ ހިތާ އެހެން ޕާޓީއަކަށް ބަދަލުވުމުގެ ވިސްނުން ގެންގުޅުމަކީ ރަނގަޅު ވިސްނުމެއް ނޫންކަން ފާަހަގަކުރައްވަމުން ފަލާހް ވިދާޅުވީ، ރައީސުލްޖުމްހޫރިއްޔާ ޑރ.މުހައްމަދު މުއިއްޒު އަދި ޕީއެންސީއަށް އެންމެ މުހުންމީ އެޕާޓީގެ ޓިކެޓްގައި ވާދަކޮށް އިންތިހާބުވުން ކަމަށެވެ. އިންތިހާބުގެ ކުރިން މިހާރުވެސް ޕީއެންސީއަށް 69 ގޮނޑިކާމިޔާބުކުރެވިފައިވާ ކަމަށާއި، މިހާރު ހިސާބުތައް ދައްކާގޮތުން އެ ޕާޓީން 800 ނުވަތަ 900 ގޮނޑި ނަގާނޭކަމަށެވެ.

ފަލާހް ވިދާޅުވީ، އެމްޑީޕީއާ ޕީއެންސީއަކީ ވަރަށް ތަފާތު ދެ ޕާޓީއެއް ކަމަށާއި، ދެޕާޓީގެ ގެންގުޅޭ ސިޔާސަތުތައް ވަރަށް ބޮޑަށް ތަފާތުވެ، ހިޔާލުވެސް ވަރަށް ތަފާތު ވާނޭކަމަށެވެ. އެގޮތުން އެމްޑީޕީން ގެންގުޅެނީ ފަނާކުރުމުގެ ފިކުރުކަން ފާހަގަކުރަމުން ފަލާހް ވިދާޅުވީ، ޕީއެންސީއަކީ ބިނާކުރަނިވި ބަޔަކު އުޅެމުންދާ ފިކުރެއްކަމަށެވެ. އެގޮތުން ޕީއެންސީގެ ވެރިކަމެއް ރާއްޖެއަށް އަންނަ ތަރައްޤީގެ ކަންކަން ފެނިގެންދާނޭކަމަށް ފަލާހް ވުދާޅުވިއެވެ.