އިސްރާއީލުން އަނެއްކާވެސް ޣައްޒާގެ އެކި ސަރަހައްދުތަކަށް ދިން ވަރުގަދަ ވައިގެ ހަމަލާތަކެއްގައި 11 ފަލަސްތީނު ރައްޔިތުން ޝަހީދުވެ، އެތައް ބަޔަކު ޒަހަމްވެއްޖެއެވެ.

ޣައްޒާގެ ސަލާމަތީ ބާރުތަކުންނާއި ސިއްހީ އިދާރާތަކުން ބުނާ ގޮތުގައި، ސުލްހައިގެ މަޝްވަރާތައް ފެށުމަށް ތައްޔާރުވަމުންދާ ދަނޑިވަޅެއްގައި، މި ހަމަލާތަކުގެ ސަބަބުން މަސްރަހު ވަނީ ނުހަނު ބޮޑަށް ގޯސްވެފައެވެ.

އިސްރާއީލުން މި ހަމަލާތައް އަމާޒުކޮށްފައިވަނީ ފަލަސްތީނުގެ މީހުން ގިނަ ސަރަހައްދުތަކަށެވެ. އޭގެ ތެރޭގައި ޖަބަލިއާ ކައިރީގައި ހުރި ރެފިއުޖީ ފޭލިގެތަކަށާއި، ހާން ޔޫނިސް އަދި ޣައްޒާ ސިޓީގެ ހުޅަނގު ދެކުނު ސަރަހައްދުތައް ހިމެނެއެވެ. އިސްރާއީލު ސިފައިން ބުނަނީ މިއީ ހަމަލާބަދަލުކުރުން ހުއްޓާލުމުގެ އެއްބަސްވުމާ ހިލާފުވި ހަނގުރާމަވެރިންނަށް އަމާޒުކޮށް ދިން ހަމަލާތަކެއް ކަމަށެވެ. ނަމަވެސް މިއީ އޮކްޓޯބަރު 10 ގައި ގާއިމުކުރި ސުލްހައިގެ އެއްބަސްވުމާ ހިލާފަށް ހިންގި ބޮޑު ގަތުލުއާންމެކެވެ. 

މި ހަމަލާތައްވެސް ދީފައިވަނި އިސްރާއިލް އާއި ފަލަސްތީނާ ދެމެދުގައި ސުލްހައިގެ އެއްބަސްވުމެއް ގާއިމު ކުރެވިފައި ވަނިކޮށެވެ.

ޣައްޒާގެ ހެލްތު މިނިސްޓްރީގެ ތަފާސްހިސާބުތަކަށް ބަލާއިރު، މިދިޔަ އޮކްޓޯބަރު މަހުން ފެށިގެން މިހާތަނަށް އިސްރާއީލުން ދިން ހަމަލާތަކުގައި 600 އަށްވުރެ ގިނަ ފަލަސްތީނު ރައްޔިތުން ޝަހީދުވެ، 1,600 އަށްވުރެ ގިނަ މީހުން ވަނީ ޒަހަމްވެފައެވެ. 2023 ވަނަ އަހަރުގެ އޮކްޓޯބަރު މަހުން ފެށިގެން ކުރިއަށްދާ މި ގަތުލުއާއްމުގައި ޝަހީދުވި ފަލަސްތީނު ރައްޔިތުންގެ ޖުމްލަ އަދަދު މިހާރު ވަނީ އެތައް ހާހަކަށް އަރާފައެވެ. އިސްރާއީލުން މިއީ ދިފާއީ ހަމަލާތަކެއް ކަމަށް ބުނި ނަމަވެސް، ބައިނަލްއަގުވާމީ މުޖުތަމައުން ދެކޭ ގޮތުގައި މި ހަމަލާތަކުގެ ސަބަބުން ސުލްހައިގެ މަސައްކަތްތަކަށް ހުރަސް އެޅި، ޣައްޒާގެ ހާލަތު އިތުރަށް ދަނީ ގޯސްވަމުންނެވެ.