ޗައިނާގެ އާއި ރާއްޖޭގެ ގުޅުން ބިނާވެފައިވަނީ ކުރާ އިޙްތިރާމާއި އިތުބާރުގެ މައްޗަށް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ، ޗައިނާގެ އައު އަހަރުގެ މުނާސަބަތުގައި، ރައީސުލްޖުމްހޫރިއްޔާ މުޙައްމަދު މުޢިއްޒު، ޗައިނާގެ ރައީސް ޝީ ޖިންޕިންގް އާއި އެޤައުމުގެ ބޮޑުވަޒީރު ލީ ކިއަންގްއަށް ތަހުނިޔާ އާއި ހެޔޮއެދުންތައް ފޮނުއްވައި ފޮނުއްވި މެސެޖުގައެވެ.
ޗައިނާގެ ރައީސަށް ރައީސުލްޖުމްހޫރިއްޔާ ފޮނުއްވި މެސެޖުގައި، ވަނީ ދެ ޤައުމުގެ ދެމެދުގައި އޮތް "ކޮމްޕްރިހެންސިވް ސްޓްރެޓީޖިކް ކޯޕަރޭޓިވް ޕާޓްނަރޝިޕް" އިތުރަށް ވަރުގަދަވެ، އިތުބާރުހުރި ބައިވެރިންގެ ގޮތުގައި ތަރައްޤީގެ މަގުގައި ދެ ޤައުމުން އެކުގައި މަސައްކަތްކުރާނެ ކަމުގެ ފުރިހަމަ ޔަޤީންކަން ދެއްވާފައެވެ.
މީގެ އިތުރުން، ޗައިނާގެ ބޮޑުވަޒީރު ލީ ކިއަންގްއަށް ފޮނުއްވި މެސެޖުގައި، ދިވެހިރާއްޖެއާއި ޗައިނާއާ ދެމެދު އޮތް ގާތް ރަޙުމަތްތެރިކަމުގެ ގުޅުމުގެ މައްޗަށް ރައީސުލްޖުމްހޫރިއްޔާ އަލިއަޅުއްވާލެއްވިއެވެ. އަދި ކުރިއަށް އޮތް އަހަރަކީ ދެ ޤައުމަށްވެސް ފައިދާހުރި، އައު ފުރުޞަތުތަކެއް ހުޅުވިގެންދާނެ އަހަރަކަށް ވާނެކަމަށް އުއްމީދުކުރައްވާ ކަމަށް ވިދާޅުވިއެވެ.
ދެ ލީޑަރުންނަށް ފޮނުއްވި މެސެޖުގައިވެސް، ރައީސުލްޖުމްހޫރިއްޔާ ވަނީ ދިވެހިރާއްޖެއިން އަބަދުވެސް "ވަން-ޗައިނާ" (އެއް ޗައިނާގެ ސިޔާސަތު) އަށް ފުރިހަމައަށް ތާއީދުކުރާކަން ތަކުރާރުކުރައްވާފައެވެ. އަދި ދެ ޤައުމުގެ ގުޅުން ބިނާވެފައިވަނީ އެއްގައުމު އަނެއް ގައުމަށް ކުރާ އިޙްތިރާމާއި އިތުބާރުގެ މައްޗަށްކަން އެމަނިކުފާނު ފާހަގަކުރެއްވިއެވެ.
މީގެއިތުރުން، ރައީސުލްޖުމްހޫރިއްޔާ ވަނީ ޗައިނާގެ ދެ ލީޑަރުންނަށް ދުޅަހެޔޮ ސިއްޙަތަކަށް އެދިވަޑައިގެން، ޗައިނާގެ ރައްޔިތުންނަށް ފާގަތި އަދި އުފާވެރި މުސްތަޤުބަލަކަށް އެދިވަޑައިގަންނަވާފައެވެ.
މި މުނާސަބަތާ ގުޅިގެން ރައީސުލްޖުމްހޫރިއްޔާ އެކްސްގައި ކުރެއްވި ޕޯސްޓެއްގައި، ޗައިނާއިން ހޯދާފައިވާ ތަރައްޤީގެ ބޮޑެތި ކާމިޔާބީތައް ފާހަގަކުރައްވައި، އެޤައުމުގެ ރައްޔިތުންނަށް އުޖާލާ ދުވަސްތަކަކަށް އެދިވަޑައިގެންފައިވެއެވެ.
Advertisement
This content is created and paid for by advertisers and does not involve Voice Journalists
