ރައީސުލްޖުމްހޫރިއްޔާ، އިސްލާމީ ޤައުމުތަކަށާއި، އިސްލާމީ ޖަމާޢަތްތަކަށް ރަމަޟާންމަހުގެ ތަހުނިޔާ އަރިސްކުރައްވައިފި
1447 ވަނަ އަހަރުގެ ބަރަކާތްތެރި ރަމަޟާންމަހުގެ ބަރަކާތްތެރި މުނާސަބަތުގައި، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، އިސްލާމީ ޤައުމުތަކުގެ ލީޑަރުންނަށާއި ބައިނަލްއަޤުވާމީ އިސްލާމީ ޖަމާޢަތްތަކަށް ތަހުނިޔާ ފޮނުއްވައިފިއެވެ.
ދިވެހި ސަރުކާރާއި ދިވެހި ރައްޔިތުންގެ ނަމުގައި ރައީސުލްޖުމްހޫރިއްޔާ ފޮނުއްވި މި މެސެޖުތަކުގައި، އިސްލާމީ ޤައުމުތަކުގެ ވެރިންނަށާއި ސަރުކާރުތަކަށް ރަމަޟާންމަހުގެ ހެޔޮއެދުންތައް ވަނީ ރައްދުކުރައްވާފައެވެ.
އިސްލާމީ ޤައުމުތަކުގެ ލީޑަރުންނަށް ވަކިވަކީން ފޮނުއްވި މި މެސެޖުތަކުގައި، ރައީސުލްޖުމްހޫރިއްޔާ ވަނީ މި ބަރަކާތްތެރި މައްސަރަކީ އިސްލާމީ އުންމަތުގެ ބަދަހިކަން އިތުރުވެ، އެއްބައިވަންތަކަން އާލާވެގެންދާނޭ މައްސަރަކަށް ވާނޭކަމަށް އުންމީދުކުރައްވާކަމަށް ވިދާޅުވެފައެވެ.
މީގެއިތުރުން، އިސްލާމީ އުންމަތް ގުޅިގެން ކުރާ މަސައްކަތުގެ މުހިންމުކަމުގެ މައްޗަށް އަލިއަޅުއްވާލައްވަމުން ރައީސުލްޖުމްހޫރިއްޔާ ވިދާޅުވީ، މުސްލިމުންގެ އަޑު އުފުލައި، އުންމަތުގެ ކުރިއެރުމާއި ފުދުންތެރިކަމުގެ އުދަރެސް ތަނަވަސްކުރެވޭނީ އެންމެހައި މުސްލިމުން އެކަތިގަނޑަކަށް ވެގެން ކަމަށެވެ.
ރައީސުލްޖުމްހޫރިއްޔާގެ މެސެޖުގައި، ދުނިޔޭގެ އެކި ކަންކޮޅުތަކުގައި ނާއިންސާފާއި އަނިޔާވެރިކަމުގެ ކެކުޅުންތައް ތަހައްމަލުކުރަމުންދާ މުސްލިމު އަޚުންނާއި އުޚުތުންގެ މަތިން ހަނދުމަކުރައްވައި، އެ ފަރާތްތަކަށް އަމާންކަން މިންވަރުކުރެއްވުމަށް އެދިވަޑައިގެން ދުޢާ ކުރެއްވިއެވެ.
އަދި އެފަދަ ވޭންތަކުން މުސްލިމުން ސަލާމަތްކުރައްވައި، އެފަރާތްތަކުގެ އަޒުމު ވަރުގަދަކުރެއްވުމަށް އެދި މާތްاللهގެ ހަޟްރަތުގައި ދުޢާ ދަންނަވާފައިވެއެވެ.
Advertisement
This content is created and paid for by advertisers and does not involve Voice Journalists
