ޗައިނާއިން ދުނިޔޭގެ ފުރަތަމަ "އުދުހޭ"، ވައިން ހަކަތަ އުފައްދާ ނިޒާމެއް ކާމިޔާބުކަމާއެކު އުފައްދާ ޓެސްޓުކޮށްފިއެވެ. ކަމާބެހޭ ފަރާތްތަކާއި މީޑިއާތަކުން ސިފަކުރާ ގޮތުގައި، މިއީ މިގޮތަށް ކަރަންޓު ގްރިޑާ ގުޅާލެވުނު ދުނިޔޭގެ ފުރަތަމަ "އުދުހޭ އިންޖީނުގެ" އެވެ.

"އެސް2000 ސްޓްރެޓޯސްފިއަރ އެއަރބޯން ވިންޑް އެނާޖީ ސިސްޓަމް" (އެސް.އޭ.ޑަބްލިއު.އީ.އެސް) ގެ ނަމުން ނަންދީފައިވާ މި ނިޒާމަކީ ހީލިއަމް ގޭސް ބޭނުންކޮށްގެން މައްޗަށް އުފުލޭ ގޮތަށް ފަރުމާކޮށްފައިވާ އުޅަނދެކެވެ. ސީޗުއާން ޕްރޮވިންސްގެ ޔީބިންގައި ކުރިއަށްދިޔަ މި ފުރަތަމަ ތަޖުރިބާ ދަތުރުގައި، މި އުޅަނދު ވަނީ ބިމުން ފެށިގެން ގާތްގަނޑަކަށް 2,000 މީޓަރު (6,560 ފޫޓު) މައްޗަށް އަރައި، ކަރަންޓު އުފައްދައި އެ ސަރަޙައްދުގެ ކަރަންޓު ގްރިޑާ ވަނީ ކާމިޔާބުކަމާއެކު ގުޅާލާފައެވެ.

މި ޓެސްޓު ދަތުރުގައި، މި އުޅަނދުން ގާތްގަނޑަކަށް 385 ކިލޯވޮޓް-އަވަރގެ ކަރަންޓު އުފައްދައި ގްރިޑަށް ފޮނުވާފައިވެއެވެ. މިއީ މި ނިޒާމުގެ އަސާސީ މަސައްކަތްތައް ހުރީ ރަނގަޅަށްކަން ސާބިތުކޮށްދިން މުހިންމު ކާމިޔާބީއެކެވެ.

ބެއިޖިންގްގެ "ލިނިީ ޔުންޗުއާން އެނާޖީ ޓެކްނޮލޮޖީ" އިން އުފައްދާފައިވާ މި އުޅަނދަކީ ބިމާ ކައިރީގައި ދައުރުވާ ވަޔަށްވުރެ ބާރުގަދަ އަދި އެއްވަރެއްގައި ހުންނަ ވައިގެ ބޭނުން ހިފުމަށް ތައްޔާރުކޮށްފައިވާ އުޅަނދެކެވެ. މީގައި ހަރުކޮށޤފައިވާ ހީލިއަމް ބެލޫނެއްގެ އެހީގައި ވައިގެ ޓަރބައިންތައް ޖައްވުގެ ތެރެއަށް އުފުލައި، އެއިން އުފައްދާ ކަރަންޓު ބިމާ ގުޅިފައިވާ ކޭބަލެއްގެ ޒަރީއާއިން ތިރިއަށް ފޮނުވައިދެއެވެ.

ޗައިނާގެ އުދުހޭ އިންޖީނުގެ-- ފޮޓޯ/ ޔޫރޯނިއުސް

ގާތްގަނޑަކަށް 60 × 40 × 40 މީޓަރުގެ މި ބޮޑު އުޅަނދު ވައްތަރީ ވައިގެ ތެރޭގައި އޮންނަ ބޮޑު ބޯޓަކާއެވެ. މީގައި ގިނަ އަދަދެއްގެ ވައިގެ ޓަރބައިންތައް ހަރުކޮށްފައިވެއެވެ. މި ޓެކްނޮލޮޖީގެ މައިގަނޑު ބޭނުމަކީ ބިމާ ކައިރީގައި ވައި މަޑުވުމުގެ ސަބަބުން ދިމާވާ ދަތިތަކަށް ހައްލެއް ހޯދައި، މަތީގައި ހުންނަ ބާރުގަދަ ވައިން ގިނަ އަދަދަކަށް ހަކަތަ އުފެއްދުމެވެ.

ޗައިނާގެ މި ކުންފުނިން ހާމަކުރާ ގޮތުގައި މި ނިޒާމަކީ ގާތްގަނޑަކަށް 3 މެގަވޮޓްގެ ކަރަންޓު އުފެއްދުމުގެ ގާބިލުކަން ހުރި ނިޒާމެކެވެ. ނަމަވެސް މިހާރު ކުރިއަށްދާ ތަޖުރިބާތަކަކީ މައިގަނޑު ގޮތެއްގައި ނިޒާމު މަސައްކަތްކުރާ ގޮތް ބެލުމަށް ކުރެވޭ ތަޖުރިބާތަކެކެވެ.

ސައިންސްވެރިންނާއި ހަކަތައާ ބެހޭ މާހިރުން ދެކޭ ގޮތުގައި، މިގޮތަށް ވައިގެ ތެރެއިން ހަކަތަ އުފެއްދުމަކީ ބިން ބޭނުންކުރަންޖެހޭ މިންވަރު ކުޑަވުމާއި، ބާރުގަދަ، އެއްފަހަރާ ގިނައިން ހަކަތަ އުފެއްދޭނެ ވަރުގެ ވައި ލިބުން ފަދަ އެތައް ފައިދާތަކެއް ހުރި ކަމެކެވެ. ނަމަވެސް، މި ޓެކްނޮލޮޖީ އަދި މި އޮތީ އުފެއްދުމުގެ ކުރީ މަރުހަލާއެއްގައި ކަމުން، މިއީ ވިޔަފާރީގެ އުސޫލުން ދިގު މުއްދަތަކަށް ބޭނުންކުރެވިދާނެ އެއްޗެއްތޯ ބެލުމަށްޓަކައި، މޫސުމީ ބަދަލުތަކަށް ހޭނުވުމަށާއި، ސަލާމަތީ ކަންކަމުގެ އިތުރުން ގާނޫނީ އޮނިގަނޑުތަކަށް ބަލަންޖެހޭނެކަމަށް ކަމާބެހޭ ފަރާތްތަކުން ބުނެއެވެ. 

ސޯޝަލް މީޑިއާގައި ދައުރުވަމުންދާ ފޮޓޯތަކާއި ވީޑިއޯތަކުން މި ބޮޑު އުޅަނދު ސިޓީގެ މަތީގައި އުދުހޭ މަންޒަރު ފެނުމުން ގިނަ ބައެއްގެ ސަމާލުކަން ވަނީ ލިބިފައެވެ. އަދި ބައެއް މީހުން މިއީ ކުރިމަގުގެ އުޅަނދެއްގެ ގޮތުގައި ވެސް ސިފަކޮށްފައިވެއެވެ.