މާލޭގެ މަގުތަކުގައި ޤަވާއިދާ ހިލާފަށް ބަހައްޓާފައިހުރި އުޅަނދުތައް ނެގުމަށް ފުލުހުން ތައްޔާރުވެއްޖެއެވެ.

މިކަމާ ގުޅިގެން ފުލުހުން އާއްމުކުރި ބަޔާނެއްގައި ބުނެފައިވަނީ، މާލެސިޓީގައި ގަވާއިދާ ހިލާފަށް ޕާކްކޮށްފައި ހުރި އުޅަނދުތަކާއި، ރަޖިސްޓްރީނުކޮށް ބަހައްޓާފައިހުރި އުޅަނދުތަކާއި، އަދި އޭ ޒޯން ފިޔަވައި އެހެން ޒޯންތަކަށް ރަޖިސްޓްރީކޮށްފައި ހުރި އުޅަނދުތައް ނެގުމަށް ނިންމާފައިވާ ކަމަށެވެ.

އެގޮތުން އެ އުޅަނދުތައް މިހިނގާ ފެބުރުއަރީަމަހުގެ 23 ވަނަ ދުވަހުން ފެށިގެން ނަގަމުންދާނޭކަމަށާއި، އުޅަނދުތައް މިމަހުގެ 22 ވަނަ ދުވަހުގެ ކުރިން ނަގައި ނިންމުމަށް އިލްތިމާސްކުރާކަމަށެވެ. ފުލުހުން ބުނީ އުލަނދުތައް ނެގުމަށްފަހު ފުލުހުން ކަނޑައަޅާތަނަކަށް ގެންދެވޭނޭ ކަމަށާއި، އުޅަނދު އުފުލައި ގެންދިއުމުގެ ތެރޭގައި ލިބޭ އެއްވެސް ގެއްލުމަކަށް، އަދި ގެންގޮސް ބަހައްޓާފައި ހުންނަ ހުރުމުގައި ލިބޭ ގެއްލުމަކަށް އެ އިދާރާއިން ޒިންމާވެވެން ނޯންނާނެ ކަމަށެވެ.

ފުލުހުން ބުނީ ޓޯ ކުރުމަށްފަހު ބަހައްޓާފައި ހުންނަ ތަނުން އެހެން ތަނަކަށް ގެންދިއުމަކީ އުޅަނދުގެ ވެރިފަރާތުގެ ޒިންމާއެއް ކަމަށެވެ.

މަގުތަކުގައި ގަވާއިދާ ހިލާފަށް ޕާކްކުރުމުގެ މައްސަލައަކީ މާލޭގައި ބޮޑުވެފައިވާއިރު، ހުޅުމާލޭގައިވެސް މި މައްސަލަ އަންނަނީ ބޮޑުވަމުންނެވެ. ހާއްސަ ގޮތެއްގައި ހުޅުމާލޭ ފޭސް ދޭއްގެ މަގުތަކުގައި ބޭނުންނުކުރާ އުޅަނދުތަކާއި ރަޖިސްޓްރީ ބޯޑު ނެތް އުޅަނދުތައް ގިނައެވެ.