ކުރިއަށް އޮތް 10 ނުވަތަ 15 ދުވަހުގެ ތެރޭގައި ވޮޝިންޓަނާއެކު އެއްބަސްވުމަކަށް ނާދެވިއްޖެނަމަ އީރާނަށް އަސްކަރީ ހަމަލާތަކެއް ދޭނެ ކަމަށް ބުނެ، އެމެރިކާގެ ރައީސް ޑޮނަލްޑް ޓްރަމްޕް އީރާނަށް އިންޒާރު ދީފިއެވެ.

ވޮޝިންޓަން ޑީސީގައި ބޭއްވި "ބޯޑް އޮފް ޕީސް" ގެ އިފްތިތާހީ ބައްދަލުވުމުގައި ވާހަކަދައްކަމުން ޓްރަމްޕް ބުނީ، މިދިޔަ އަހަރުގެ ޖޫން މަހު އިސްރާއީލާއި އެމެރިކާ ގުޅިގެން އީރާނަށް ދިން ހަމަލާތަކަކީ ގާޒާގެ ސުލްހައަށް މަގުފަހިވި ކަމެއް ކަމަށެވެ. އަދި އީރާނުގެ ނިއުކްލިއާ މަރުކަޒުތަކަށް ހަމަލާ ނުދިންނަމަ، މެދުއިރުމަތީގެ ގައުމުތަކުން ސުލްހައަށް އެއްބަސްވުމަށް އީރާނުގެ "ބިރުވެރިކަން" ހުރަހަކަށް ވީސް ކަމަށްވެސް އޭނާ ބުންޏެވެ. 

"ދެން އަހަރެމެންނަށް ޖެހިދާނެ އިތުރު ފިޔަވަޅެއް އަޅަން، އީރާނާއެކު އެއްބަސްވުމަކަށް އާދެވިދާނެ. ކުރިއަށް އޮތް 10 ވަރަކަށް ދުވަހުގެ ތެރޭގައި އެކަން އެނގޭނެ." ޓްރަމްޕް ބުންޏެވެ. 

ޓްރަމްޕް މިހެން ބުނެފައި މިވަނީ އެމެރިކާއާއި އީރާނާ ދެމެދު ނުސީދާކޮށް ބޭއްވި ދެވަނަ މަޝްވަރާތަކަށް ފަހުގައެވެ.

އީރާނުގެ ފޮރިން މިނިސްޓަރު އައްބާސް އަރަގްޗީ ވިދާޅުވީ ޖެނީވާގައި ބޭއްވި މަޝްވަރާތަކުގައި ބޮޑެތި ކުރިއެރުންތަކެއް ލިބިފައިވާ ކަމަށެވެ. ނަމަވެސް، އެމެރިކާއިން ދަނީ ގަލްފް ސަރަހައްދަށް މަތިންދާބޯޓު އުފުލާ ދެ މަނަވަރާއި ގިނަ އަދަދެއްގެ ހަނގުރާމަމަތީ ބޯޓުތައް ފޮނުވަމުންނެވެ.

އީރާނުން ބުނަމުންދަނީ އެގައުމުގެ ޔުރޭނިއަމް މުއްސަނދިކުރުން މަދުކޮށް، ބައިނަލްއަގުވާމީ ފަރާތްތަކުގެ ބެލުމުގެ ދަށަށް ގެނައުމަށް އެއްބަސްވެވިދާނެ ކަމަށެވެ. ނަމަވެސް ޓްރަމްޕްގެ ސަރުކާރުން ބޭނުންވަނީ އީރާނުން ޔުރޭނިއަމް މުއްސަނދިކުރުން މުޅިން ހުއްޓާލުމަށާއި، އެގައުމުގެ މިސައިލް ޕްރޮގްރާމަށް ހުދޫދުތަކެއް ކަނޑައެޅުމަށެވެ. މިއީ ދިފާއީ ކަމެއް ކަމަށް ބުނެ އީރާނުން ވަނީ މިސައިލްގެ މައްސަލާގައި ދޫދިނުމަށް ދެކޮޅު ހަދާފައެވެ.