ކުއްލި ނުރައްކަލުގެ ހާލަތުގެ ގާނޫނެއް ބޭނުންކޮށްގެން އާންމުކޮށް ހުރިހާ މުދަލަކުން ޑިއުޓީ ނެގުމަކީ ރައީސަށް ލިބިގެންވާ ބާރެއް ނޫން ކަމަށް އެމެރިކާގެ ސުޕްރީމް ކޯޓުން ނިންމައިފިއެވެ. 

އިއްޔެ ނެރުނު މި ހުކުމް، ކޯޓުގެ 6 ފަނޑިޔާރުންގެ އަޣުލަބިއްޔަތުން ނިންމާފައިވަނީ، "އިންޓަރނޭޝަނަލް އެމަޖެންސީ އިކޮނޮމިކް ޕަވަރސް އެކްޓް" ގެ ދަށުން، ކޮންގްރެސްގެ ހުއްދަ ނެތި ބޮޑެތި ޓެރިފްތައް ކަނޑައެޅުމުގެ ބާރު ރައީސަށް ލިބިގެންނުވާކަމަށެވެ. އަދި ގާނޫނުއަސާސީގެ ދަށުން ޓެކްސްއާއި ޑިއުޓީ ކަނޑައެޅުމުގެ މައިގަނޑު ބާރު އޮންނަނީ ގާނޫނު ހަދާ މަޖިލީހަށްކަން ވެސް ކޯޓުގެ މި ހުކުމުގައި ބަޔާންކޮށްފައިވެއެވެ. 

މި ހުކުމުގެ ސަބަބުން ޓްރަމްޕްގެ ވިޔަފާރީގެ ސިޔާސަތށް ވަރަށްބޮޑު ލޮޅުމެއް އަންނާނޭކަމަށް ބައިނަލްއަޤްވާމީ ބައެއް ބޮޑެތި މީޑިއާތަކުން ވަނީ ފާހަގަކޮށްފައެވެ. 

ކޯޓުގެ މި ނިންމުމާއެކު މިހާތަނަށް ގާނޫނާ ހިލާފަށް ނަގާފައިވާ ބިލިއަނުން ގުނޭ ޑިއުޓީ ފައިސާއަށް ވާނެ ގޮތަކާ މެދު މިހާރު ވަނީ ސުވާލު އުފެދިފައެވެ. ރޮއިޓާސްއިން ރިޕޯޓްކޮށްފައިވާ ގޮތުގައި، މިކަމުގެ ސަބަބުން، 175 ބިލިއަން ޑޮލަރަށްވުރެ ގިނަ ފައިސާ އަނބުރާ ހޯދުމަށް ނުވަތަ އެކަމާ ގުޅޭ ގާނޫނީ މައްސަލަތައް ކުރިމަތިވުމުގެ ފުރުސަތު އެބައޮތެވެ.

ނަމަވެސް، ކޯޓުގެ ނިންމުމަށްފަހު މާ ގިނަ އިރުތަކެއް ނުވަނީސް ޓްރަމްޕް ވަނީ އެކަމާ ގުޅޭގޮތުން ރައްދެއް ދީފައެވެ. މިކަމާ ގުޅޭގޮތުން ޓްރަމްޕް ވިދާޅުވެފައިވަނީ، 1974 ވަނަ އަހަރުގެ ޓްރޭޑް އެކްޓްގެ 122 ވަނަ މާއްދާ ބޭނުންކޮށްގެން، އެމެރިކާއަށް އެތެރެކުރާ ގިނަ މުދަލުން %10 ގެ އައު ޑިއުޓީއެއް ނަގަން ފެށުމަށް ނިންމާފައިވާކަމަށެވެ. މި ގާނޫނީ މާއްދާއަކީ ވިޔަފާރީގެ ބެލެންސް ހިފެހެއްޓުމަށްޓަކައި 150 ދުވަހުގެ މުއްދަތަށް ވަގުތީ ޑިއުޓީއެއް ނެގުމަށް ރައީސަށް ބާރުދޭ މާއްދާއެކެވެ. ނަމަވެސް މިއީ ކުރިން ބޭނުންކުރި ކުއްލި ނުރައްކަލުގެ ބާރުތަކަށްވުރެ ހަނި ބާރެކެވެ. ޓްރަމްޕް ފާހަގަކޮށްފައިވާގޮތުން ކޯޓުގެ ނިންމުމާ މެދު ހިތްހަމަނުޖެހުނު ނަމަވެސް، މި އައު ފިޔަވަޅަކީ ވިޔަފާރީގެ މަޝްވަރާތަކުގައި އެމެރިކާގެ ބާރު ދެމެހެއްޓުމަށާއި އެމެރިކާގެ ސިނާއަތްތައް ހިމާޔަތްކުރުމަށް އަޅާ ފިޔަވަޅެކެވެ. 

މިކަމާ ގުޅިގެން އެމެރިކާ ސަރުކާރުގެ އިސް އޮފިޝަލުން ވިދާޅުވެފައިވަނީ، ގައުމީ ސަލާމަތަށްޓަކައި ނުވަތަ ގާނޫނާ ހިލާފު ވިޔަފާރީގެ އުސޫލުތަކަށް  ނަގަމުންދާ ޑިއުޓީތަކަށް މި ހުކުމުގެ ސަބަބުން އެއްވެސް ބަދަލެއް ނާންނާނޭކަން ފާހަގަކުރައްވާފައެވެ. އެގައުމުގެ ޓްރެޜަރީ ސެކްރެޓަރީ ސްކޮޓް ބެސެންޓް ވިދާޅުވެފައިވަނީ، ކޯޓުގެ ނިންމުގެ ސަބަބުން އެއްކަމެއް ބަންދުވި ނަމަވެސް، ސަރުކާރުގެ ވިޔަފާރީގެ ލަނޑުދަނޑިތައް ހާސިލުކުރުމަށްޓަކައި ބޭނުންކުރެވިދާނެ އެހެން ވަސީލަތްތައް އަދިވެސް އެބަހުރިކަމަށެވެ.