އަވައްޓެރި އިންޑިއާގެ ޤައުމީ އެއާލައިން، އެއާ އިންޑިއާއިން ދިވެހިރާއްޖެއަށް އުދުހުން ފެށިތާ 50 އަހަރުފުރުން މިއަދު ވެލާނާ އިންޓަރނޭޝަނަލް އެއާޕޯޓްގައި ފާހަގަކޮށްފިއެވެ.

މިކަމަށްޓަކައި ވީއައިއޭގައި ބޭއްވި ރަސްމިއްޔާތުގައި ވަނީ ހާއްސަ ހަރަކާތެއް ކުރިއަށްގެންގޮސްފައެވެ. އެގޮތުން މި މުނާސަބާ ފާހަގަކުރުމުގެ ގޮތުން މިއަދު ރާއްޖެ އައި އެއަރ އިންޑިއާގެ ފްލައިޓަށް ވަނީ ވޯޓަރ ސަލިއުޓެއް އަރުވައި ހޫނު މަރުޙަބާއެއް ކިޔާފައެވެ. މި ފްލައިޓުން މިއަދު ޖުމްލަ 139 ފަސިންޖަރުން ރާއްޖެއަށް ޒިޔާރަތްކޮށްފައެވެ.

އެއާ އިންޑިއާއިން ރާއްޖެއަށް ޒިޔާރަތްކުރި ދަތުރުވެރިންނަށް ވީއައިއޭއިން މަރުހަބާކިޔުން.. ފޮޓޯ: އެމްއޭސީއެލް

މި ފްލައިޓުން ރާއްޖެ އައި ހުރިހާ ފަސިންޖަރުންނަށް މަރުޙަބާ ކިޔުމުގެ ގޮތުން ފިނިފެންމަލާއި ކުކީޒް ވަނީ ހަދިޔާކޮށްފައެވެ.

މި ހަރަކާތް ކުރިއަށްގެންގޮސްފައިވަނީ، އެއަރ އިންޑިއާ އާއި ރާއްޖެއާ ދެމެދު އޮތް ގާތް ގުޅުން ރަމްޒުކޮށްދިނުމުގެ ގޮތުންނެވެ.

އިންޑިއާއިން ދިވެހިރާއްޖެއަށް ދަތުރުތައް ފެށިތާ 50 އަހަރު ފުރުން މިއަދު ފާހަގަކޮށްފައިވާއިރު، މިއީ ދިވެހިރާއްޖެއަށް ބައިނަލްއަގުވާމީ ވައިގެ ދަތުރުފަތުރުގެ ގުޅުން ގާއިމުކުރި އިންޑިއާގެ ފުރަތަމަ އެއަރލައިންއެވެ. އެއަރ އިންޑިއާއިން ރާއްޖެއަށް އެންމެ ފުރަތަމަ ދަތުރުތައް ފަށާފައިވަނީ 1976 ވަނަ އަހަރުގެ ފެބުރުއަރީމަހުގެ 21 ވަނަ ދުވަހުއެވެ.