އެމެރިކާގެ ރައީސް ޑޮނަލްޑް ޓްރަމްޕް ކުރިން ކަނޑައަޅާފައިފާ ޓެރިފްތައް އެމެރިކާގެ ސުޕްރީމް ކޯޓުން ބާތިލުކޮށްފައިވަނިކޮށް، ދުނިޔޭގެ ހުރިހާ ގައުމުތަކަކުން އެމެރިކާއަށް އެތެރެކުރާ މުދަލުން 15 އިންސައްތައިގެ ޓެރިފެއް ނެގުމަށް ނިންމައިފިއެވެ.

މިދިޔަ ހުކުރު ދުވަހު ޓްރަމްޕް ފުރަތަމަ އިޢުލާން ކުރީ ކޯޓުން ބާތިލުކުރި ޓެރިފްތަކުގެ ބަދަލުގައި 10 އިންސައްތައިގެ ލެވީއެއް ނެގުމަށެވެ. ނަމަވެސް، ހޮނިހިރު ދުވަހު 'ޓްރުތް ސޯޝަލް' މެދުވެރިކޮށް ކުރި ޕޯސްޓެއްގައި ޓްރަމްޕް ވަނީ، މި ޓެކްސް ބޮޑުކުރާނެ ކަމަށް ބުނެފައެވެ.

މި އައު ޓެރިފްތައް ތަންފީޒުކުރުމަށް ބޭނުންކުރަނީ 1974 ވަނަ އަހަރުގެ ޓްރޭޑް އެކްޓްގެ 122 ވަނަ މާއްދާއެވެ. މި ގާނޫނުގެ ދަށުން ކޮންގްރެސްގެ ހުއްދައާ ނުލައި ފަސް މަސް ދުވަހުގެ މުއްދަތަށް މި ޓެރިފްތައް ދެމެހެއްޓޭނެއެވެ. 10 އިންސައްތައިގެ ޓެރިފް އަންނަ ފެބްރުއަރީ 24 ވާ އަންގާރަ ދުވަހުން ފެށިގެން ނަގަން ކުރިން ނިންމާފައިވީ ނަމަވެސް، 15 އިންސައްތައިގެ ޓެކްސް ނަގަން ފަށާނެ ސީދާ ތާރީޚެއް އަދި ސާފެއް ނުވެއެވެ.

ޓްރަމްޕް މި ނިންމުން ނިންމީ ސުޕްރީމް ކޯޓުގެ 6-3 ގެ އަޣުލަބިއްޔަތުން ނެރުނު ހުކުމާ ގުޅިގެންނެވެ. އެ ކޯޓުން ނިންމާފައިވަނީ 1977 ވަނަ އަހަރުގެ 'އިންޓަރނޭޝަނަލް އިމަރޖެންސީ އިކޮނޮމިކް ޕަވަރސް އެކްޓް' (IEEPA) ބޭނުންކޮށްގެން ޓްރަމްޕް ޓެރިފް ނަގާފައިވަނީ ރައީސަށް ލިބިދޭ ބާރުގެ ބޭރުން ކަމަށެވެ.

މި ގާނޫނުގެ ދަށުން އެމެރިކާ ސަރުކާރުން މިހާތަނަށް 130 ބިލިއަން ޑޮލަރުގެ ޓެކްސް ވަނީ އެއްކޮށްފައެވެ.

ކޯޓުގެ މި ނިންމުމާ ގުޅިގެން ޓްރަމްޕް ވަނީ ކޯޓުގެ ބައެއް ފަނޑިޔާރުންނަކީ "މޮޔައިން" ކަމަށް ސިފަކޮށް، އެއީ އެމެރިކާއާ ދެކޮޅަށް ނެރުނު ނިންމުމެއް ކަމަށް ބުނެފައެވެ. ނަމަވެސް ސުޕްރީމް ކޯޓުގެ ނިންމުމަށް ތާއީދުކުރި ފަނޑިޔާރުންގެ ތެރޭގައި ޓްރަމްޕް އައްޔަންކުރި ދެ ފަނޑިޔާރުން ކަމަށްވާ އެމީ ކޯނީ ބެރެޓް އަދި ނީލް ގޯސަޗް ހިމެނެއެވެ.