މާލޭގެ މަގުތަކުގައި ގަވާއިދާ ހިލާފަށް ޕާކުކޮށްފައި ހުރި އުޅަނދުތައް މާދަމާ އިން ފެށިގެން ޓޯކުރުމުގެ މަސައްކަތް ފަށާނެ ކަމަށް ފުލުހުން ބުނެފިއެވެ.

ދިވެހި ފުލުހުންގެ ޚިދުމަތުން ހާމަކުރި ގޮތުގައި، މާލޭގެ އެކި ސަރަހައްދުތަކުގައި ގަވާއިދާ ހިލާފަށް ޕާކުކޮށްފައި ހުރި އުޅަނދުތަކާއި، ރަޖިސްޓްރީ ނުކޮށް ހުރި އުޅަނދުތަކުގެ އިތުރުން "އޭ ޒޯން" ފިޔަވައި އެހެން ޒޯންތަކަށް ރަޖިސްޓްރީ ކޮށްފައިވާ އުޅަނދުތައް ނެގުމުގެ މަސައްކަތް ކަމާގުޅުންހުރި އިދާރާތަކާ ގުޅިގެން މާދަމާ ކުރިއަށް ގެންދާނެއެވެ.

މި މަސައްކަތަކީ އެއްގަމު ދަތުރުފަތުރުގެ ގާނޫނުގެ ދަށުން ފުލުހުންނަށް މަތިކޮށްފައިވާ ގާނޫނީ ޒިންމާގެ ދަށުން ކުރިއަށް ގެންދާ ހަރަކާތެކެވެ. އެގޮތުން މާދަމާއިން ފެށިގެން މިފަދަ އުޅަނދުތައް ފުލުހުން ކަނޑައަޅާ ވަކި ސަރަހައްދަކަށް ޓޯކޮށްގެން ގެންދާނެ ކަމަށް ފުލުހުން ބުނެފައިވެއެވެ.

މިކަމާއިގުޅިގެން ފުލުހުން ވަނީ މާލޭގެ އެކި ތަންތަނުގައި ގަވާއިދާ ހިލާފަށް ބަހައްޓާފައި ހުރި އުޅަނދުތައް، 22 ފެބުރުވަރީ 2026 ވާ ހޮނިހިރު ދުވަހުގެ ރޭގަނޑު 23:30 ގެ ކުރިން ނެގުމަށް އުޅަނދުތަކުގެ ވެރިފަރާތްތަކަށް އަންގާފައެވެ. އަދި މި މުއްދަތު ހަމަވުމަށްފަހު މަގުމަތީގައި ހުންނަ އުޅަނދުތައް ފުލުހުންގެ ބެލުމުގެ ދަށަށް ގެންދާނެ ކަމަށް އިންޒާރުދީފައެވެ. 

މީގެ އިތުރުން ފުލުހުން ބުނެފައިވަނީ، އުޅަނދުތައް ޓޯކޮށްގެން ގެންދިއުމުގެ ތެރޭގައާއި އަދި ފުލުހުން ކަނޑައަޅާ ތަނެއްގައި ބަހައްޓާފައި ހުންނަ ހުރުމުގައި އުޅަނދަށް ލިބޭ އެއްވެސް ގެއްލުމަކަށް ފުލުހުންގެ ޚިދުމަތުން ޒިންމާނުވާނެ ކަމަށެވެ. އަދި ޓޯކުރާ އުޅަނދުތައް އަނބުރާ ގެންދިއުމުގެ ޒިންމާވެސް އުފުލަންޖެހޭނީ އުޅަނދުގެ ވެރިފަރާތުން ކަމަށެވެ. 

މި ފިޔަވަޅަކީ މާލޭގެ މަގުތަކަކީ ހިނގާބިނގާވެ އުޅޭ މީހުންނަށާއި ދަތުރުފަތުރު ކުރާ ފަރާތްތަކަށް އަމާން އަދި ފަސޭހަ ތަނަކަށް ހެދުމުގެ ގޮތުން އަޅާ ފިޔަވަޅެކެވެ.