އިނގިރޭސިވިލާތުގެ އޮކްސްފޯޑް ޔޫނިއަން އަދި ކޭމްބްރިޖް ޔޫނިއަންގައި ތަޤުރީރު ކުރެއްވުމަށް ހަމަޖެހިފައިވަނިކޮށް، އެ ހަރަކާތްތައް ކެންސަލްކުރުމާ ގުޅިގެން ސްރީލަންކާގެ ޕޮޑުޖަނާ ޕެރަމުނާ (އެސް.އެލް.ޕީ.ޕީ) ގެ މަޖިލިސް މެންބަރު ނާމާލް ރާޖަޕަކްސަ ފާޑުވިދާޅުވެއްޖެއެވެ.
ނަމާލް ތަގުރީރުކިރެއްވުން ކެންސަލްކޮށްފައިވަނީ އިނގިރޭސިވިލާތުގައި އުޅޭ ތަމަޅަ ދަރިވަރުންގެ ޖަމިއްޔާތަކާއި ކެމްޕޭން ގްރޫޕްތަކުން ކުރިމަތިކުރި ފިއްތުންތަކާ ގުޅިގެންނެވެ.
މިކަމާ ގުޅިގެން އެކްސްގައި ކުރެއްވި ޕޯސްޓެއްގައި ނާމާލް ވިދާޅުވީ، އޮކްސްފޯޑް އަދި ކޭމްބްރިޖް ޔޫނިއަންއަކީ ޒަމާނުއްސުރެ މިނިވަންކަމާއެކު ޚިޔާލުތައް ބަދަލުކުރުމާއި، ވަރުގަދަ ބަހުސްތައް ކުރިއަށް ގެންދިޔުމުގައި ނަމޫނާ ދައްކަމުން އައި ތަންތަން ކަމަށެވެ. އަދި އެފަދަ ބަހުސްތަކުގައި ބައިވެރިވެވަޑައިގަތުމަށް ވަރަށް ބޮޑަށް އުންމީދުކުރެއްވި ކަމަށްވެސް އޭނާ ވިދާޅުވިއެވެ.
ނާމާލް އިތުރަށް ފާހަގަކުރެއްވި ގޮތުގައި، މިފަދަ މާހައުލުތަކުގައި ވާހަކަދައްކާ ފަރާތްތަކަށް އުނދަގޫ ސުވާލުތަކާ ކުރިމަތިލާން ޖެހޭނެ ކަމަށާއި، ތަފާތު މައުޟޫތަކަށް ބަހުސްކޮށް އަމިއްލަ ނަޒަރިއްޔާތު ދިފާޢުކުރަން ޖެހޭނެ ކަމަށް ގަބޫލުކުރައްވާ ކަމަށެވެ.
"ނަމަވެސް، ރޭވިގެން ކުރިމަތިކުރި ފިއްތުންތަކެއްގެ ސަބަބުން މި ހަރަކާތްތައް ކުރިއަށް ނުގެންދެވޭ ގޮތްވުމަކީ ވަރަށް ބޮޑު ހިތާމައެއް،" ނާމާލް ލިޔުއްވާފައިވެއެވެ.
ޔުނިވާސިޓީތަކާއި ބަހުސްކުރާ މަޖިލިސްތަކަކީ ތަފާތު ޚިޔާލުތަކާ މެދު ބަހުސްކޮށްގެން ހައްލު ހޯދާ ތަންތަން ކަމަށާއި، ބިރުދެއްކުމުގެ ސަބަބުން އަޑުތައް ކަނޑުވާލުމަކީ ބަލައިގަނެވޭނެ ކަމެއް ނޫން ކަމަށްވެސް އޭނާ ވިދާޅުވިއެވެ. އޭނާއާ ދެކޮޅު ފަރާތްތަކާ ސީދާ ބައްދަލުކޮށް ވާހަކަދެއްކުމުގެ ފުރުސަތަށް މަރުހަބާ ކިޔާނެ ކަމަށް ވިދާޅުވަމުން ނާމާލް ވިދާޅުވީ، މާނަހުރި ސުލްހަވެރިކަމާއި ކުރިއެރުން ލިބޭނީ ހުޅުވާލެވިފައިވާ މަޝްވަރާތަކުގެ ތެރެއިން ކަމަށެވެ. އަދި ބަހުސް ކުރުމުގެ ބަދަލުގައި ބައިބައިވުން އިސްކުރުމަކީ ޑިމޮކްރަސީ ބަލިކަށިވާނެ ކަމެއް ކަމަށް އޭނާ ފާހަގަކުރެއްވިއެވެ.
އޮކްސްފޯޑް ޔޫނިއަންގައި ނާމާލް ތަޤުރީރު ކުރެއްވުމަށް ތާވަލުކޮށްފައި އޮތީ މި ފެބްރުއަރީ މަހުގެ 23 ވަނަ ދުވަހަށެވެ. ނަމަވެސް އެ ހަރަކާތް ވަނީ ކެންސަލްކޮށްފައެވެ.
ނާމާލް ވަނީ ދެ ޔޫނިއަނުން އޭނާއަށް ދެއްވި ދައުވަތަށް ޝުކުރު އަދާކުރައްވައި، ކުރިއަށް އޮތް ތަނުގައި މިނިވަންކަމާއެކު މަޝްވަރާކުރެވޭނެ ފުރުސަތެއް ލިބޭނެ ކަމަށް އުންމީދުކުރައްވާ ކަމަށް ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
