ރަމަޟާންމަހުގެ 4 ވަނަ ދުވަހާއި 5 ވަނަ ދުވަހުގެ 48 ގަޑިއިރުގެ ތެރޭގައި 1 ލައްކައަށް ވުރެ ގިނަ ރުފިޔާ ވައްކަން ކޮށްފައިވާކަމަށް ފުލުހުން ހާމަކޮށްފިއެވެ. 

ފުލުހުން މިއަދު ނެރުނު ތަފާސްހިސާބުތަކުން ދައްކާގޮތުގައި މިމަހުގެ 11 އަދި 22 ވަނަ ދުވަހު ފޭރުމާއި ވައްކަމުގެ ގޮތުގައި 138،932 ރުފިޔާ ރިޕޯޓުކޮށްފައިވެއެވެ. މީގެ ތެރެއިން، 138،552 ރުފިޔާގެ ވައްކަން ރިޕޯޓުކޮށްފައިވަނީ މާފަންނުންނެވެ. އަދި ހެންވޭރުން 380 ރުފިޔާގެ ވައްކަން ރިޕޯޓުކޮށްފައިވާއިރު، ގަލޮޅުން  ވައްކަމުގެ މައްސަލައެއް ރިޕޯޓްކޮށްފައެއް ނުވެއެވެ.

އެ މުއްދަތުގައި ކުރި ވައްކަންތަކުން އަނބުރާ ހޯދުނު ފައިސާގެ އަދަދުތަކަށް ބަލާއިރު، މާފަންނުން 34،720 ރުފިޔާ، ގަލޮޅުން 365،099 ރުފިޔާ އަދި ހެންވޭރުން 65،000 ރުފިޔާ ވަނީ ހޯދާފައެވެ.

ފުލުހުންގެ މި ޕޯސްޓުގައިވާ އިތުރު މައުލޫމާތުުތަކަށް ބަލާއިރު މާފަންނުން 777، ގަލޮޅުން 738 އަދި ހެންވޭރުން 752 ތަނެއް ބަލާފާސްކޮށްފައިވެއެވެ. އަދި އެ 48 ގަޑިއިރުތެރޭގައި މާފަނުން 2 މީހަކާއި، ހެންވޭރުން 1 މީހަކު އަދި ގަލޮޅުން 3 މީހަކު ހައްޔަރުވެސް ކޮށްފައިވެއެވެ. 

އެ ދެދުވަހު ފުލުހުން ޕެޓްރޯލް ކުރި ވަގުތުތަކަށް ބަލާއިރު އެންމެ ގިނަ ވަގުތު ޕެޓްރޯލުކޮށްފައިވަނީ ގަލޮޅުގައެވެ. އެގޮތުން 40 ގަޑިއިރަށްވުރެ ގިނަ ވަގުތު އެ ސަރަހައްދުގައި ފައިމަގުގައި ފުލުހުން ޕެޓްރޯލުކޮށްފައިވާއިރު، އެއާ ޖެހިގެން މާފަންނުގައި 26 ގަޑިއިރަށްވުރެ ގިނަ ވަގުތު ވަނީ ޕެޓްރޯލްކޮށްފައެވެ. ހެންވޭރުގައި ޕެޓްރޯލުކޮށްފައިވަނީ 22 ގަޑިއިރެވެ. 

މާލޭގެ ސަލާމަތާއި ރައްކާތެރިކަން ކަށަވަރުކުރުމަށްޓަކައި ފުލުހުން އަންނަނީ ކެނޑިނޭޅި މުހިންމު މަސައްކަތްތަކެއް ކުރަމުންނެވެ. އަދި ވައްކަމުގެ މައްސަލަތަކާއި ގުޅިގެން ފުލުހުންގެ ހިންގުން އިތުރަށް ހަރުދަނާކޮށް، އާންމު ރައްޔިތުން މުދަލާއި ފައިސާއަށް ރައްކާތެރިވުމަށް ފުލުހުން ވަނީ އިލްތިމާސްކޮށްފައެވެ.