ރާއްޖެއަށް އެންމެ ރަނގަޅުވާނީ އެމެރިކާ ޑޮލަރު ރޭޓް ކަނޑައަޅަން ބާޒާރުގެ އަގަށް ދޫކޮށްލުންކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.

ބާޒާރުގައި ޑޮލަރުގެ އަގުހުރިގޮތާ ގުޅޭގޮތުން އެކްސްގައި މިއަދު ކުރެއްވި ޕޯސްޓެއްގައި ރައީސް ނަޝީދު ވިދާޅުވީ، ދިވެހި ފައިސާގެ އަގުދަށްކޮށް، ޑޮލަރެއްގެ އަގު 20 ރުފިޔާއަށް ބަދަލުކުރިނަމަވެސް އެ ރޭޓްގައި ބޭންކުތަކުން ޑޮލަރު ނުލިބޭނަމަ ކަޅުބާޒާރުގައި ޑޮލަރު ގަދައަށް ހިނގާނޭކަމަށެވެ.

ނަޝީދު ވިދާޅުވީ ރާއްޖެއަށް ރަނގަޅު ގޮތަކީ ޑޮލަރު ގަނެވިއްކާ ރޭޓް މުޅިން ފްލޯޓްކޮށް ދޫކޮށްލުން ކަމަށެވެ. އެގޮތުން ޑޮލަރުގެ ހަމަ އަގަކީ ބާޒާރުގެ ތަބީއަތުން ކަނޑައެޅޭ ހަމަ އަގަށް ހެދުމަކީ އެންމެ ރަނގަޅު ގޮތްކަމަށްވެސް އެމަނިކްފާނުގެ ޕޯސްޓްގައި ވަނީ ފާހަގަކުރައްވާފައެވެ.

ފަހުގެ ތާރީހެއްގައި ޑޮލަރު ގަނެވިއްކާ ރަސްމީ ރޭޓަށް އެންމެ ފުރަތަމަ ބަދަލުގެނެސްފައިވަނީ ރައީސް ނަޝީދުގެ ވެރިކަމުގައި 2011 ވަނަ އަހަރުގެ އޭޕްރިލްމަހުގެ ފުރަތަމަ ހަފްތާގައެވެ. އޭރު ޑޮލަރުގެ ރަސްމީ ރޭޓް ކަމަށްވާ 12.80 ގައި ހުރި އަގު ވަނީ 15.42 އާއި 10.28 އާ ދެމެދުގެ އަގަކަށް ދޫކޮށްލާފައެވެ. 

އޭގެ ފަހުން ޑޮލަރު ރޭޓް 18 އަށް އަރައިގެން ގޮސް، ޑޮލަރު ލިބުމުގެ ދަތިކަން ދެމިއޮތްއިރު، ބޭރުފައިސާގެ މުއާމަލާތްތައް ހަރުދަނާ ސިޔާސަތެއްގެ ދަށުން ކުރިއަށް ގެންދިއުމަށް އެންމެބޮޑު ފިޔަވަޅެއް އަޅާފައިވަނީ މިދިޔަ އަހަރުގެ ތެރޭގައެވެ. 

ރާއްޖެއަށް ކުރިމަތިވެފައިވާ ބޭރު ފައިސާގެ ދަތިކަމަށް ހައްލު ހޯދުމަށް އެމްއެމްއޭއިން މިދިޔަ އަހަރު ވަނީ ބޭރު ފައިސާގެ ގާނޫނެއް ވުޖޫދަށް ގެނެސް އެއަށް އަމަލުކުރަން ފަށާފައެވެ. އެ ޤާނޫނުގެ ދަށުން ބޭރު ފައިސާއިން އާމްދަނީ ލިބޭ ވިޔަފާރިތަކުގެ އާމްދަނީ ރާއްޖޭގެ ބޭންކުތަކަށް ޖަމާކުރުން ލާޒިމުކޮށް އެ އާމްދަނީން ވަކި މިންވަރެއް ބޭންކުތަކަށް މާރުކުރުން ވަނީ ލާޒިމްކޮށްފައެވެ.

ބޭރުފައިސާގެ ޤާނޫނަށް ގެނައި ބަދަލުތައް ތަންފީޒުކުރަން ފެށުމާއެކު މިހާރު ބޭންކުތަކަށް ޑޮލަރު ލިބޭ މިންވަރު އިތުރުވަމުން އަންނަކަމަށް މަރުކަޒީ ބޭންކުން ވަނީ ބުނެފައެވެ.

އެގޮތުން ބީއެމްއެލުން ވަނީ ޑެބިޓް ކާޑާއި ކްރެޑިޓް ކާޑުގެ ލިމިޓްތައް މިފަހަކުން އިތުރުވެސްކޮށްފައެވެ. ދިވެހި ރުފިޔާގެ ޑެބިޓް ކާޑު ބޭނުންކޮށްގެން ބޭރުގައި ޕޮއިންޓް އޮފް ސޭލް (ޕީއޯއެސް) މުޢާމަލާތްތަކަށް މަހެއްގެ މައްޗަށް 1،000 އެމެރިކާ ޑޮލަރަށް އިތުރުކޮށްފައިވާއިރު، ދަތުރުފަތުރުގެ އަދި ސިއްހީ ބޭނުންތަކަށް ކެޑޭ ލިމިޓް މަހަކަށް 3،000 ޑޮލަރަށް ވަނީ އިތުރުކޮށްފައެވެ.'

މީގެ އިތުރުން ބީއެމްއެލްއިން ވަނީ މިދިޔަ ޖެނުއަރީމަހުގެ ތެރޭގައި އެ ބޭންކުގެ ކްރެޑިޓް ކާޑުތަކުގެ ލިމިޓްތައްވެސް އިތުރުކޮށްފައެވެ. 'ކްލެސިކް' ކްރެޑިޓް ކާޑުތަކުން މަހެއްގެ މައްޗަށް ކުރެވޭ ބޭރުގެ މުއާމަލާތްތަކުގެ ލިމިޓް 750 ޑޮލަރުން 1,400 ޑޮލަރަށް އިތުރުކޮށްފައިވާއިރު، 'ގޯލްޑް' ކާޑުތަކުގެ ލިމިޓް 750 ޑޮލަރުން 1,500 ޑޮލަރަށް ވަނީ އިތުރުކޮށްފައެވެ. އަދި 'ޕްލެޓިނަމް' ކާޑުތަކުގެ ލިމިޓް ވަނީ 1,500 ޑޮލަރުން 3,000 ޑޮލަރަށް އިތުރުކޮށްފައެވެ.