އެމެރިކާ އަދި އިސްރާއީލް ގުޅިގެން އީރާނަށް ދިން ހަމަލާތަކާއެކު މެދުއިރުމަތީގެ މަޝްރަހް ހޫނުވެ، އެ ސަރަހައްދުގެ ވައިގެ ދަތުރުފަތުރުތައް ހުއްޓުމަކަށް އަތުވެއްޖެއެވެ.

އީރާންގެ ތެހެރާނަށް ދިން ހަމަލާތަކާއެކު އީރާނުންވެސް ވަނީ ރައްދުގައި އެމެރިކާގެ ބޭސްތައް ޤާއިމްކޮށްފައިވާ ތަންތަނަށް މިސެއިލުން ހަމަލާ ދޭން ފަށާފައެވެ. މެދުއިރުމަތީގެ މަޝްރަހް ހޫނުވުމާ ގުޅިގެން އީރާގް އަދި އީރާނުން ވަނީ އެޤައުމުގެ ވައިގެ ސަރަހައްދުތައް ބަންދުކުިކަން ރަސްމީކޮށް އިއުލާނުކޮށްފައެވެ.

މެދުއިރުމަތީގެ މަޝްރަހް ހޫނުވުމާއެކު ބައިނަލްއަޤްވާމީ ބައެއް އެއާލައިންތަކުން ވަނީ މެދުއިރުމައްޗަށް ކުރަމުންއައި ދަތުރުތައް ވަގުތީގޮތުން ހުއްޓާލިކަން އިއުލާނުކޮށްފައެވެ. އެގޮތުން ޖަރުމަނުވިލާތުގެ ލުފްތަންސާ ޖަޕާނުގެ ޤައުމީ އެއާލައިން، ވިޒް އެއާ، އަދި އެއ ފްރާންސުން ވަނީ ދަތުރުތައް މެދުކަނޑާލާފައެވެ. މިކަމުގެ ސަބަބުން ގިނަ އަދަދެއްގެ ދަތުރުވެރިން އެއާޕޯޓްތަކުގައި ތާށިވެފައިވާއިރު، އެއާލައިންތަކުން ދަނީ އެހެން ރޫޓްތަކުން ދަތުރުތައް ފެށޭތޯ މަސައްކަތްކުރަމުންނެވެ. ތުރުކީ އެއާލައިނުންވެސް ވަނީ މެދުއިރުމަތީގެ ބައެއް ޤައުމުތަކަށް އުދުހުންތައް ވަގުތީގޮތުން ހުއްޓާލިކަން އިއުލާނުކޮށްފައެވެ.

މެދުއިރުމަތީގެ އެއާޕޯޓްތައް ހުއްޓުމަކަށް އައިސްފައިވާއރު، މިކަމުގެ ސަބަބުން އެންމެބޮޑު ގޮންޖެހުމެއް ކުރިމަތިވެފައިވަނީ، ދުބާއީ، ތުރުކީ އަދި ޤަތަރުގެ އެއާޕޯޓްތަކަށެވެ. ފްލައިޓް ރާޑަރުން ދައްކާގޮތުގައި މިހާރު މުޅި މެދުއިރުމަތީގެ ވައިގެ ސަރަހައްދު ފެންނަނީ ހުސްކޮށެވެ.