ގަލްފް ޤައުމުތަކުގެ ވައިގެ ސަރަހައްދު ބަންދުކުރުމާ ގުޅިގެން މެދުއިރުމަތިން މިއަދުވެސް ރާއްޖެ އަންނަން ގިނަ އަދަދެއްގެ ފްލައިޓްތައް ކެންސަލްވެއްޖެއެވެ.
މެދުއިރުމަތިން މިއަދު ރާއްޖެ އަންނަން އޮތް 14 ފްލައިޓެއް ކެންސަލްކޮށްފައިވާއިރު، ގިނަ އަދަދެއްގެ ފްލައިޓްތައް ވަނީ ޑިލޭވެފައެވެ. ވެލާނާ އިންޓަރނޭޝަނަލް އެއާޕޯޓްގެ ފްލައިޓް ޝެޑިއުލަށް ބަލާއިރު، މެންދުރުފަހާއި މިރޭ މެދުއިރުމަތިން އަންނަން އޮތް 9 ފްލައިޓެއް ވަނީ ކެންސަލްކޮށްފައެވެ. މީގެ އިތުރުން ހަތަރު ފްލައިޓެއް ވަނީ ޑިލޭވެފައެވެ.
ގަލްފް ޤައުމުތަކުގެ ވައިގެ ސަރަހައްދު ބަންދުކުރަންޖެހުނީ، އެމެރިކާ އަދި އިސްރާއީލް ގުޅިގެން އިއްޔެ އީރާނަށް ދޭންފެށި ހަމަލާތަކާ ގުޅިގެން އީރާނުން ޔޫއޭއީ، ބަހްރެއިން، އޮމާން، ޤަތަރު އަދި ސައުދީގައިވާ އެމެރިކާގެ އަސްކަރީ މަރުކަޒުތަކަށް ރައްދު ހަމަލާތައްދޭން ފެށުމުންނެވެ. އެއާއެކު އެޤައުމުތަކުން ވަނީ ވައިގެ ސަރަހައްދު ބަންދުކޮށް އެއާޕޯޓްތަކުގެ ފްލައިޓް އޮޕަރޭޝަންތައްވެސް މެދުކަނޑާލާފައެވެ.
މެދުއިރުމަތިން އަންނަ ފްލައިޓްތައް ކެންސަލްވެ ޔޫރަޕުން އަންނަ ފްލައިޓްތައް ޑިލޭވި ނަމަވެސް، ޔޫރަޕްގެ ޤައުމުތަކުން އަންނަ ޑައިރެކްޓް ފްލައިޓްތަކާއި، އޭޝިއާ އަދި އެނޫންވެސް ސަރަހައްދުތަކުން އަންނަ ފްލައިޓްތައް ޝެޑިއުލަށް އަންނަމުންދާކަމަށް ވެލާނާ އިންޓަރނޭޝަނަލް އެއާޕޯޓް ހިންގާ އެމްއޭސީއެލުން ވަނީ ބުނެފައެވެ.
މެދުއިރުމަތީގެ ޤައުމުތަކަށް ކުރާ ދަތުރުތައް ހުއްޓާލުމާއެކު އިއްޔެ އާއި ރޭ ގިނަ އަދަދެއްގެ ދަތުރުވެރިން ވީއައިއޭގައި ނުފުރިފައި ތިބެންޖެހުނުއިރު، ކަމާބެހޭ ފަރާތްތަކުން ވަނީ އެއާޕޯޓްގައި ތާށިވި ފަރާތްތަކަށް ބޭނުންވާނެ ކަންކަން ފަހިކޮށްދީފައެވެ.
Advertisement
This content is created and paid for by advertisers and does not involve Voice Journalists
