އެމެރިކާއިން އީރާނަށް ދޭން ފެށި ވަރުގަދަ ހަމަލާތަކުގެ ކުރިން، އީރާނުން އެމެރިކާގެ ސިފައިންނަށް އިސްވެ ހަމަލާދޭން އުޅޭކަމުގެ އެއްވެސް ޖާސޫސީ މައުލޫމާތެއް ލިބިފައިނުވާ ކަމަށް ޓްރަމްޕް ސަރުކާރުގެ އޮފިޝަލުން އެއްބަސްވެއްޖެއެވެ.

މިކަން ހާމަކޮށްފައިވަނީ އާދީއްތަ ދުވަހު އެމެރިކާގެ ކޮންގްރެސްގެ މުވައްޒަފުންނާއެކު ބޭއްވި ސިއްރު ބައްދަލުވުމެއްގައެވެ. މި ބައްދަލުވުމާ ބެހޭ މައުލޫމާތު އެނގޭ ދެ ފަރާތަކުން ރޮއިޓާސްއަށް ބުނި ގޮތުގައި، އީރާނުން އެމެރިކާގެ ސިފައިންނަށް ހަމަލާދޭން ރާވާފައިވާ ކަމުގެ އެއްވެސް ހެއްކެއް ލިބިފައިނުވާ ކަމަށް ސަރުކާރުގެ އޮފިޝަލުން ވަނީ އެއްބަސްވެފައެވެ.

މިދިޔަ ހޮނިހިރު ދުވަހު އެމެރިކާއާއި އިސްރާއީލުން ގުޅިގެން ވަނީ ފަހުގެ ތާރީޚެއްގައި އީރާނަށް ދިން އެންމެ ވަރުގަދަ ހަމަލާތައް ދީފައެވެ. މި ހަމަލާތަކުގައި އީރާނުގެ ރޫހާނީ ލީޑަރު އަލީ ޚާމަނާއީ އަވަހާރަކޮށްލައި، އެގައުމުގެ ހަނގުރާމަމަތީ މަނަވަރުތައް ފައްތާލައި، މިހާތަނަށް 1،000 އަށްވުރެ ގިނަ އަމާޒުތަކަށް ވަނީ ހަމަލާދީފައެވެ.

ނަމަވެސް، އާދީއްތަ ދުވަހު ކޮންގްރެސްގައި ދެއްކި ވާހަކަތަކަކީ، މި ހަނގުރާމަ ފެށުމަށް އެމެރިކާ ސަރުކާރުން މީގެ ކުރިން ދެއްކި މައިގަނޑު ސަބަބާ ފުށުއަރާ ވާހަކަތަކެކެވެ.

އޭގެ އެއް ދުވަސް ކުރިން ސަރުކާރުގެ އިސް އޮފިޝަލުން ނޫސްވެރިންނަށް މައުލޫމާތު ދެމުން ބުނެފައިވަނީ، ރައީސް ޑޮނަލްޑް ޓްރަމްޕް ހަމަލާދޭން ނިންމީ އީރާނުން އެމެރިކާގެ ސިފައިންނަށް ކުއްލި ހަމަލާއެއް ދީފާނެ ކަމުގެ ނިޝާންތަކެއް ފެނުމުން، އެކަމުގެ ދިފާއުގައި ކަމަށެވެ. އަދި އެމެރިކާގެ ސިފައިންނަށް ހަމަލާތަކެއް އަންނަންދެން ބަލަން ޓްރަމްޕް ހުންނަން ބޭނުން ނުވާ ކަމަށްވެސް އޮފިޝަލުން ބުނެފައިވެއެވެ.

ވައިޓް ހައުސްގެ ތަރުޖަމާނު ޑައިލަން ޖޯންސަން ބުނި ގޮތުގައި، ޕެންޓަގަންގެ އޮފިޝަލުން ވަނީ ސެނެޓާއި ހައުސް އޮފް ރިޕްރެޒެންޓެޓިވްސްގެ ގައުމީ ސަލާމަތާ ބެހޭ ކޮމިޓީތަކުގެ މުވައްޒަފުންނަށް 90 މިނެޓަށްވުރެ ގިނަ އިރު ވަންދެން މި ހަމަލާތަކާ ގުޅޭގޮތުން މައުލޫމާތު ދީފައެވެ.

މި ބައްދަލުވުންތަކުގައި އޮފިޝަލުން ބުނެފައިވަނީ އީރާނުގެ ބެލިސްޓިކް މިސައިލްތަކާއި އެ ސަރަހައްދުގައި ތިބި އީރާނަށް ތާއީދުކުރާ ހަނގުރާމަވެރި ޖަމާއަތްތަކަކީ އެމެރިކާގެ މަސްލަހަތުތަކަށް އޮތް ބޮޑު ނުރައްކަލެއް ކަމަށެވެ. ނަމަވެސް، ތެހެރާނުން އެމެރިކާއަށް އިސްވެ ހަމަލާއެއް ދޭން އުޅޭކަމުގެ ސީދާ ޖާސޫސީ މައުލޫމާތެއް އޭރު ލިބިފައިނުވާ ކަމަށް އޮފިޝަލުން ވަނީ ތަކުރާރުކޮށްފައެވެ.

ރައީސް ޓްރަމްޕް ބުނި ގޮތުގައި، މި ހަމަލާތަކުގެ މަގްސަދަކީ އީރާނަށް ނިއުކްލިއާ ހަތިޔާރު އުފެއްދުމުގެ ފުރުސަތު ނުދިނުމާއި، އެގައުމުގެ މިސައިލް ޕްރޮގްރާމް ހުއްޓުވުމެވެ. މީގެ އިތުރުން، އީރާނުގެ ރައްޔިތުން ނުކުމެ އެގައުމުގެ ސަރުކާރު ވައްޓާލުމަށްވެސް ޓްރަމްޕް ވަނީ ގޮވާލާފައެވެ.