މާލޭގައި ދިރިއުޅޭ ރައްޔިތުންނަށް ފުލެޓު ދޫކުރުމުގެ އުސޫލުގެ ދަށުން، ބޯހިޔާވަހިކަން ފޯރުކޮށްދިނުމުގައި ހާއްސަ އިސްކަންދެވޭ ކެޓަގަރީތަކުގެ ޝަރުތުތައް އިސްލާހުކޮށް އެކަން އިއުލާނުކޮށްފި އެެވެ.

މިނިސްޓްރީ އޮފް ކޮންސްޓްރަކްޝަން، ހައުސިން އެންޑް އިންފްރާސްޓްރަކްޗާއިން މިއަދު ވަނީ ޝަރުތުތަކަށް ގެނައި ބަދަލުތައް އާންމުކޮށްފަ އެވެ. އެ މިނިސްޓްރީން ބުނި ގޮތުގައި މާލޭގައި ދިރިއުޅޭ ރައްޔިތުންނަށް ފުލެޓު ދޫކުރުމުގެ އުސޫލުގެ ދަށުން ބޯހިޔާވަހިކަން ފޯރުކޮށްދިނުމުގައި ޚާއްސަ އިސްކަންދެވޭ ކެޓަގަރީތަކުގެ ލިސްޓުގައި ހިމެނޭ އިދާރާތަކާއި މުއައްސަސާތަކުގެ ކެޓަގަރީތަކަށް އެދި ހުށަހަޅާ ފަރާތްތަކުން އުސޫލުގައިވާ ޝަރުތުތަކުގެ އިތުރުން ފުރިހަމަވާންޖެހޭ ޝަރުތުތައް އިސްލާހުކޮށްފައިވާ ކަމަށެވެ.

އެގޮތުން ވަޒީފާގެ މުއްދަތު ގުނުމުގައި ބަލާ މިންގަނޑާއި ފުލެޓު ލިބުމަށްފަހު ހިދުމަތްކުރުމަށް އެއްބަސްވާ ބަޔަށް ވަަނީ ބަަދަލު ގެނެސްގަ އެވެ.

ކުރީން އޮތް ގޮތުން ހާއްސަ ކެޓަގަރީއަށް ޝަރުތު ހަމަވުމަށްޓަކައި، އެ އިދާރާއެއްގައި މަދުވެގެން ފަސް އަހަރު ދުވަހު މަސައްކަތް ކޮށްފައިވާން ޖެހެ އެވެ. ނަމަވެސް މިހާރު މި މުއްދަތު ވަނީ އެއް އަހަރު ދުވަހަށް ކުރުކޮށްފަ އެވެ. އެގޮތުން، ހާއްސަ އިސްކަންދެވޭ އިދާރާއެއްގައި މެދުނުކެނޑި ވޭތުވެދިޔަ އެއް އަހަރު ފުލް-ޓައިމް ވަޒީފާ އަދާކޮށްފައިވާ ފަރާތްތަކަށް މިހާރު އެކެޓަގަރީން ފުލެޓަށް ކުރިމަތިލެވޭނެ އެވެ

މީގެ އިތުރުން ފުލެޓު ލިބޭ ފަރާތްތަކުން އެ އިދާރާއެއްގައި މަދުވެގެން ފަސް އަހަރު ދުވަހު މަސައްކަތްކުރުމަށް އިގުރާރުވާން ޖެހޭ ގޮތަށް އޮތް ބައި ވެސް ވަނީ އިސްލާހުކޮށްފަ އެވެ. މިހާރު އޮތްގޮތުން ބޯހިޔާވަހިކަން ހަވާލުކުރާ ތާރީހުން ފެށިގެން، އެ އިދާރާއަކުން ނުވަތަ މުއައްސަސާއަކުން ކަނޑައަޅާ ގޮތެއްގެ މަތިން ވަޒީފާ އަދާކުރުމަށް އެއްބަސްވާން ޖެހޭނެ ކަމަށް ބުނެފައިވެ އެވެ.

ބޯހިޔާވަހިކަން ފޯރުކޮށްދިނުމުގައި ހާއްސަ އިސްކަންދެވޭ ކެޓަގަރީގައި ހިމަނާފައިވާ އިދާރާތަކުގެ ލިސްޓަށް ކެޕިޓަލް މާކެޓް ޑިވެލޮޕްމަންޓް އޮތޯރިޓީ ވެސް ވަނީ އިތުރުކޮށްފަ އެވެ. ސަރުކާރުން ކަނޑައަޅާފައިވާ ގޮތުން ހާއްސަ އިސްކަންދެވޭ ކެޓަގަރީގައި ހިމަނާފައިވާ އިދާރާތަކުގެ ތެރެއިން ޖުޑިޝިއަރީގެ މުވައްޒަފުންނާއި ފުލުހުންގެ ޚިދުމަތުގެ މުވައްޒަފުންނާއި މޯލްޑިވްސް ނެޝަނަލް ޑިފެންސް ފޯސްގެމުވައްޒަފުންނާއި މޯލްޑިވްސް ކަރެކްޝަނަލް ސަރވިސްގެ މުވައްޒަފުންނަށް ކޮންމެ އިދާރާއަކަށް 100 ފްލެޓް ކަނޑައަޅާފައިވެ އެވެ.

އަދި ސިވިލް ސާރވިސްގެ މުވައްޒަފުންނަށް 200 ފްލެޓް ކަނޑައަޅާފައިވެ އެވެ. ރައީސުލްޖުމްހޫރިއްޔާގެ އޮފީހާއި ރައްޔިތުންގެ މަޖިލީހުގެ އިދާރާއި އެޓަރނީ ޖެނެރަލްގެ އޮފީހާއި ފޮރިން ސަރވިސް އަާއި ޖުޑީޝަލް ސަރވިސް ކޮމިޝަނާއި އިލެކްޝަންސް ކޮމިޝަނާއި ސިވިލް ސާރވިސް ކޮމިޝަނާއި ހިއުމަން ރައިޓްސް ކޮމިޝަން އޮފް ދަ މޯލްޑިވްސް އާއި އެންޓި ކޮރަޕްޝަން ކޮމިޝަނާއި އޮޑިޓަރ ޖެނަރަލްގެ އޮފީހާއި ޕްރޮސެކިއުޓަރ ޖެނެރަލްގެ އޮފީހާއި މޯލްޑިވިސް މަނިޓަރީ އޮތޯރިޓީ އާއި މޯލްޑިވްސް އިންލަންޑް ރެވެނިއު އޮތޯރިޓީ އާއި މޯލްޑިވްސް ޕެންޝަން އެޑްމިނިސްޓްރޭޝަން އޮފީހާއި ނެޝަނަލް އިންޓެގްރިޓީ ކޮމިޝަނާއި މޯލްޑިވްސް މީޑިއާ އެންޑް ބްރޯޑްކާސްޓިންގ ކޮމިޝަނާއި ފެމިލީ ޕްރޮޓެކްޝަން އޮތޯރިޓީ އާއި ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ އާއި ޗިލްޑްރަންސް އޮމްބަޑްސް ޕާރސަންގެ އޮފީހާއި ވަޒީފާއާބެހޭ ޓްރައިބިއުނަލް އާއި ލޯކަލް ގަވަރމަންޓް އޮތޯރިޓީ އާއި ޓެކްސް އެޕީލް ޓްރައިބިއުނަލް އާއި މޯލްޑިވްސް ސިވިލް އޭވިއޭޝަން އޮތޯރިޓީ އާއި ކެޕިޓަލް މާކެޓް ޑިވެލޮޕްމަންޓް އޮތޯރިޓީގެ މުވައްޒިފުންނަށް 400 ފްލެޓް ކަނޑައަޅާފައިވެ އެވެ.