އީރާނަށް ހަމަލާދޭން ޑިއޭގޯ ގާސިއާ ބޭނުންކުރުމުގެ ހުއްދަ ދިނުން ލަސްވުމުން އެމެރިކާގެ ރައީސް ޑޮނާލްޑް ޓްރަމްޕް އިނގިރޭސި ސަރުކާރަށް ވަރަށްބޮޑަށް ފާޑުވިދާޅުވެއްޖެއެވެ.

ޑެއިލީ ޓެލެގްރާފަށް ދިން އިންޓަވިއުއެއްގައި ޓްރަމްޕް ވިދާޅުވެފައިވަނީ އިރާނުގެ އަމާޒުތަކަށް ހަމަލާ ދިނުމަށް ޑިއޭގޯ ގާސިއާ ބޭނުންކުރުމުގެ ހުއްދައަށް އެދުމުން އިނގިރޭސި ބޮޑުވަޒީރު ކިއަރ ސްޓާމަރ އެންމެ ފުރަތަމަ ދެކޮޅު ހެއްދެވިކަމަށެވެ. ނަމަވެސް ފަހުން އެކަމަށް އެއްބަސްވެ ވަޑައިގެން އީރާނަށް ހަމަލާދިނުމަށް އިޒުނަ ދެއްވިކަމަށެވެ. 

ޓްރަމްޕް ވިދާޅުވީ، އާދިއްތަ ދުވަހު އިނގިރޭސިންގެ ފަރާތުން ހުއްދަ ލިބިފައިވާ ކަމަށާއި، މިހާރު އީރާނަށް ހަމަލާދިނުމުގައި އިނގިރޭސިންގެ އަސްކަރީ މަރުކަޒުތައް ބޭނުންކުރުމަށް އެމެރިކާއަށް ހުރަހެއްނެތްކަމަށެވެ. ނަމަވެސް އިނގިރޭސިވިލާތުން އެމެރިކާއަށް ޑިއޭގޯ ގާސިއާގެ މިލިޓަރީ ބޭސް ބޭނުންކުރުމަށް ދިން ހުއްދައިގެ އިންތައް ވަނީ ހަނިކޮށްފައެވެ. މިހާރު ހުއްދަ ދީފައިވާ ގޮތަށް ބަލާއިރު، އީރާނަށް ހަމަލާދިނުމަށް ބޭނުންކުރެވޭނީ ހަމައެކަނި މިސައިލް ފޮނުވާ ތަންތަނަށް އެކަންޏެވެ. ޑިއޭގޯ ގާސިއާ ދިނުން ލަސްވުމުން ޓްރަމްޕްގެ ނުރުހުން އަމާޒުވިނަމަވެސް އޭނާ ވިދާޅުވެފައިވަނީ، މިކަމުގައި އިނގިރޭސިން ފަސްޖެހުނު ސަބަބަކަށް ޤާނޫނީގޮތުން އެއީ ކުރެވިދާނެ ކަމެއް ނޫންކަން ހީވުމަކީ ވަރަށް އެކަށީގެންވާ ކަމެއްކަމަށެވެ.

އެމެރިކާއިން ވަނީ މީގެ ކުރިންވެސް އަސްކަރީ ކަންކަމުގައި ޑިއޭގޯ ގާސިއާ ބޭނުންކޮށްފައެވެ. މިފަހަރު އެތަނުން އީރާނަށް ހަމަލާދީނުމުގެ ހުއްދަ އިނގިރޭސިން ދީފައިވާއިރު، އީރާނުން ވަނީ ސައިޕްރަސްގައި ހުންނަ އިނގިރޭސިންގެ އަސްކަރީ ބޭސްތަކަށް އަމާޒުކޮށް ހަމަލާތައްދީފައެވެ. ބެލެވޭގޮތުގައި އެމެރިކާއިން އީރާނަށް ހަމަލާދިނުމުގައި ޑިއޭގޯ ގާސިއާ ބޭނުންކުރުމުގެ ހުއްދަ ދީފައިމިވަނީ އެހެންވުމުގެ ސަބަބުންކަމަށް ދިރާސާކުރާ ފަރާތްތަކުން ބުނެފައެވެ. 

އީރާނަށް ހަމަލާދިނުމަށް ޑިއޭގޯ ގާސިއާ ދިން ނަމަވެސް އިނގިރޭސި ބޮޑުވަޒީރު ވަނީ އީރާނަށް ހަމަލާ ދިނުމަށް އަމަލީގޮތުން އިނގިރޭސިންގެ އެއްވެސް ދައުރެއް ނޯންނާނެކަމަށް ވިދާޅުވެފައެވެ.