ބަންގްލަދޭޝް ހައިކޮމިޝަނާއި އެމްއެންޔޫ ގުޅިގެން ބައިނަލްއަގުވާމީ މާދަރީ ބަހުގެ ދުވަސް ފާހަގަކޮށްފި
ބައިނަލްއަގުވާމީ މާދަރީ ބަހުގެ ދުވަސް ފާހަގަކުރުމުގެ ގޮތުން ދިވެހިރާއްޖޭގައި ހުންނަ ބަންގްލަދޭޝްގެ ހައިކޮމިޝަނާއި، ދިވެހިރާއްޖޭގެ ގައުމީ ޔުނިވަރސިޓީގެ ފެކަލްޓީ އޮފް އާޓްސް ގުޅިގެން އެމް.އެންޔޫ. ބިޒްނަސް ސްކޫލް އޮޑިޓޯރިއަމްގައި ޚާއްޞަ ރަސްމިއްޔާތެއް ބާއްވައިފިއެވެ.
އެމްއެންޔޫއިން މައުލޫމާތު ދޭގޮތުން، މި ރަސްމިއްޔާތުގެ ބޭނުމަކީ މާދަރީ ބަސް ހިމާޔަތްކުރުމުގެ މުހިންމުކަމާ މެދު ޒުވާނުންގެ ހޭލުންތެރިކަން އިތުރުކުރުމާއި، މި އަހަރުގެ މާދަރީ ބަހުގެ ދުވަހުގެ ޝިއާރު "ގިނަ ބަހުން ތަޢުލީމުގައި ޒުވާނުންގެ ދައުރު" މި ޝިއާރާ މެދު ފުންކޮށް މަޝްވަރާކުރުމެވެ.
މި ރަސްމިއްޔާތުގައި، މަރުޙަބާ ދެންނެވުމުގެ ގޮތުން ވާހަކަދައްކަވަމުން ފެކަލްޓީ އޮފް އާޓްސްގެ ޑީން އަލްފާޟިލް ޢާޞިމް ޢަބްދުއްސައްތާރު ވަނީ ބަހުގެ ޒަރީއާއިން ސަގާފީ އަމިއްލަވަންތަކަން ދެމެހެއްޓުމުގެ މުހިންމުކަމުގެ މައްޗަށް އަލިއަޅުވައިލައްވާފައެވެ.
މި ރަސްމިއްޔާތުގައި ބަންގްލަދޭޝްއިން ދިވެހިރާއްޖެއަށް ކަނޑައަޅުއްވާފައި ހުންނަވާ ހައިކޮމިޝަނަރ، ޑރ. އެމް. ނަޒްމުލް އިސްލާމް ވާހަކަދައްކަވަމުން ވަނީ، ބައިނަލްއަގުވާމީ މާދަރީ ބަހުގެ ދުވަހާއި ބަންގްލަދޭޝް އުފެދުމާ އޮތް ގުޅުމުގެ މައްޗަށް ބައްލަވައިލައްވައި ދުވަހުގެ ތާރީޚު އޮޅުންފިލުވައިދެއްވާފައެވެ. މީގެއިތުރުން މާދަރީ ބަހުގެ މުހިންމުކަމާއި މާދަރީ ބަސްތައް ރައްކާތެރިކުރުމަށް ބައިނަލްއަގުވާމީ ފެންވަރުގައި ކުރެވޭ މަސައްކަތްތަކުގެ މައްޗަށްވެސް އަލިއަޅުވާލެއްވިއެވެ.
އެއަށްފަހު، ބަންގްލަދޭޝް ބަހުން ބަންގްލަދޭޝްގެ އެމް.ޑީ މޮއިނަލް ހޮސަން އަދި މަހުވީން ޕަރުވޭޒް ސަގާފީ ހުށަހެޅުންތައް ހުށަހަޅުއްވައިދެއްވިއެވެ.
މި ރަސްމިއްޔާތުގެ އެންމެ މުހިންމު ކަމަކަށް އޮތީ، "މާދަރީ ބަސް ހިމާޔަތްކުރުމުގައި ޒުވާނުންގެ ދައުރު" މި މައުޟޫއަށް ބޭއްވުނު ޕެނަލް ޑިސްކަޝަންއެވެ. ތަޖުރިބާކާރު 4 ޕެނަލިސްޓުންނާ އެކު މި ސެޝަން ހުށަހަޅުއްވައިދެއްވީ ފެކަލްޓީ އޮފް އާޓްސްގެ ސީނިއަރ ލެކްޗަރަރ ޢާއިދާ ޙައްމާދެވެ. ޕެނަލިސްޓުންގެ ތެރޭގައި ދިވެހިބަހުގެ އެކެޑަމީގެ ނައިބު ރައީސް ޒުމްދާ އިސްމާއިލާއި، އެމް.އެންޔޫ ގެ ޑޮކްޓަރ، ޑރ. ސާދިއާ ހައްގު ހިމެނިވަޑައިގަންނަވައެވެ.
އެއަށް ފަހު، ގައުމީ ތަރައްގީއާއި އިޖުތިމާއީ އެއްބައިވަންތަކަމުގައި ބަހުގެ ދައުރާ ގުޅޭގޮތުން ރަސްމިއްޔާތުގެ ޝަރަފުވެރި މެހުމާން ދިވެހިބަހުގެ އެކެޑަމީގެ ރައީސް ތަގުރީރެއް ދެއްވެވިއެވެ. އަދި ދިވެހިބަހުގެ އެކެޑަމީގެ މާޒީގެ ކާމިޔާބީތަކަށް ބައްލަވައި، ކުރިމަގަށް ކުރެވޭ އުންމީދުތައް ވެސް ހުށަހަޅުއްވައިދެއްވިއެވެ.
ރަސްމިއްޔާތު ނިމުނީ، ރައިވަރުން އެކުލަވައިލައިފައިވާ ޝުކުރުގެ ބަސްތަކުންނެވެ.
ބަންގްލަދޭޝް ހައިކޮމިޝަނާއި، ގައުމީ ޔުނިވަރސިޓީ ގުޅިގެން ބަހަވީ އަދި ސަގާފީ ހޭލުންތެރިކަން އިތުރުކުރުމަށް ކުރިއަށް އޮތް ތަނުގައި ވެސް މަސައްކަތްކުރައްވާނެކަން އެ ދެ މުއައްސަސާގެ އިސްބޭފުޅުން ވެސް ފާހަގަކުރެއްވިއެވެ.
Advertisement
This content is created and paid for by advertisers and does not involve Voice Journalists
