އެމެރިކާއާއި އިސްރާއިލު އިސްވެ އީރާނަށް ދޭން ފަށާފައިވާ ހަމަލާތަކާ ގުޅިގެން މެދުއިރުމަތީގައި ހަމަނުޖެހުންތައް އުފެދިފައިވީ ނަމަވެސް، އޭގެ ސަބަބުން ދިވެހިރާއްޖެ ތެލަށް ނުޖެހޭނެ ކަމުގެ ޔަގީންކަން އެބަ އޮތް ކަމަށް އިކޮނަމިކް މިނިސްޓަރު މުޙައްމަދު ސަޢީދު ވިދާޅުވެއްޖެއެވެ.

މިދިޔަ ހޮނިހިރު ދުވަހުން ފެށިގެން އެމެރިކާއާއި އިސްރާއިލުން އިސްވެ އީރާނަށް ދޭން ފަށާފައިވާ ހަމަލާ ތަކުގެ ރައްދުގައި އީރާނުންވެސް އަންނަނީ މެދު އިރުމަތީގެ ގައުމު ތަކުގައި ހުންނަ އެމެރިކާގެ މިލިޓަރީ ބޭސް ތަކާއި އެމްބަސީތަކަށް އަމާޒުކޮށް ހަމަލާތައް ދެމުންނެވެ. މީގެ އިތުރުން މެދުއިރުމަތީ ގައުމު ތަކުގެ ބައެއް އެއާޕޯޓް ތަކަށްވެސް އީރާނުގެ ހަމަލާތައް އަންނަނީ އަމާޒު ކުރަމުންނެވެ. މީގެ ސަބަބުން، މެދުއިރުމަތީ ގައުމު ތަކުގެ ވައިގެ ސަރަހައްދު ބަންދުވެސް ކުރެވުނެއެވެ.

އެފަހުންވެސް، ކަނޑުމަގުންނާއި ވައިގެ މަގުން އެ ސަރަހައްދުގެ ގައުމުތަކަށް ދަތުރުފަތުރު ކުރުން ވަނީ ދަތިކަމަކަށް ވެފައެވެ.

އެއާއެކު ތެލުގެ އަގު ދުވަހުން ދުވަހަށް މިހާރުވެސް އުފުލެމުންދާއިރު މިއަދު އިކޮނަމިކް މިނިސްޓްރީން ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ވަނީ، އެކަމުގެ ސަބަބުން ރާއްޖެއަށް ތެޔޮ ލިބުމުގައި ދަތިތަޖާ ކުރިމަތިވެދާނެތޯ ސުވާލު ކޮށްފައެވެ. 

”އިއްޔެ ބައިނަލްއަގުވާމީ މާކެޓްގައި ތެލުގެ އަގަށް އިންކްރިމަންޓެއް އައި. ގާތްގަނޑަކަށް 25-30 އިންސައްތައިގެ އަގު އުފުލުމެއް މާކެޓްގައި އައި“ ސަޢީދު ވިދާޅުވިއެވެ. 

މެދު އިރުމަތީގައި ހަމަނުޖެހުމެއް އުފެދިއްޖެ ނަމަ އެކަމުގެ އަސަރު އެންމެ ފުރަތަމަ ކުރާ އެއްޗަކީ ތެޔޮ ކަމަށާ، މިފަހަރު ގޭހުގެ އަގަށްވެސް އޭގެ އަސަރު ކޮށްފައިވާ ކަމަށް ސަޢީދު ވިދާޅުވިއެވެ. 

ސައީދު ވިދާޅުވީ ރާއްޖޭގެ ތެލުގެ ކަންކަން ބަލަހައްޓަމުންދަނީ އެފަދަ ކަންކަމަށް ބަލައިގެން ކަމަށެވެ. އެގޮތުން އެންމެ ދަތިވާނެ ޙާލަތެއްގައިވެސް ތެޔޮ ލިބޭނެ އެހެން ގޮތްތައް ހަމަޖައްސަމުންދާ ކަން އޭނާ ފާހަގަކުރެއްވިއެވެ. 

މީގެ އިތުރުން، ތެޔޮ ރައްކާކުރާނެ ކެޕޭސިޓީ އިތުރު ކުރުމަށް ވެސް ސަރުކާރުން މަސައްކަތް ކުރަމުން އަންނަ ކަމަށެވެ. އެގޮތުން، ރާއްޖެއަށް މިހާރު އަހަރެއްގެ މައްޗަށް ދެ މިލިއަނަށްވުރެ ގިނަ ފަތުވެރިން ޒިޔާރަތްކުރާ ކަމަށާ، އެ ހުރިހާ އެންމެންނަށް ކޭޓާ ކުރެވޭ ވަރަށް ތެލާއި ކާބޯތަކެތީގެ ރައްކާތެރިކަން ކަށަވަރު ކުރުމަށް މަސައްކަތް ކުރާ ކަމަށް ވިދާޅުވިއެވެ.