އޮޅުހިޔާއަށް މިހާތަނަށް 350 ބުޅާ ގެންދެވިއްޖެ: ވަޒީރު މާރިޔާ
މާލޭގައި ދިރިއުޅޭ ބުޅަލުގެ މައްސަލަ ހައްލު ކުރުމަށް އެޅި ބުޅާ ފެސިލިޓީ، އޮޅު ހިޔާއަށް މިހާތަނަށް 350 ބުޅާ ގެންދެވިފައިވާ ކަމަށް ދިރޭތަކެއްޗާ ބެހޭ ވުޒާރާގެ ވަޒީރު ޑރ. މަރިޔަމް މާރިޔާ ވިދާޅުވެއްޖެއެވެ.
ދަނޑުވެރިކަމާ ދިރޭތަކެއްޗާ ބެހޭ ވުޒާރާއިން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ވަޒީރު ވިދާޅުވީ، އޮޅުހިޔާގައި ވެޓް ކްލިނިކްގެ މަސައްކަތް ފަށައި އެތަނަށް ގެންދެވޭ ބުޅާ ނިޔުޓާ ކުރުމުގެ މަސައްކަތް ފެށިފައިވާ ކަމަށެވެ.
އެގޮތުން މިހާތަނަށް 60 ބުޅާ ނިޔުޓާ ކުރެވިފައިވާއިރު، 5 އަންހެން ބުޅާ ވާނީ ސްޕޭ ކުރެވިފައި. އަދި ފެސިލިޓީއަށް މިހާތަނަށް 350 ބުޅާ ވަނީ ގެންދެވިފައި. އަދި އަންނަ ހަފްތާގައި އިތުރު ބުޅާތައް ގެންދިޔުމަށް ވަނީ ޕްލޭން ކުރެވިފައި
ވަޒީރު ޑރ. މަރިޔަމް މާރިޔާ
އޮޅު ހިޔާ ފެސިލިޓީ އަކީ މާލެ ސަރަހައްދަށް ދިމާވެފައިވާ ބުޅަލުގެ މައްސަލައަށް ހައްލެއް ގެނައުމަށް ސަރުކާރުން މާލެ ސިޓީ ކައުންސިލާ ހަވާލުކޮށްގެން ތައްޔާރުކުރި ފެސިލިޓީއެކެވެ.
އެތަނުގައި ބުޅާތައް ކަރަންޓީނު ކުރާނެ ސަރަޙައްދަކާއި ކްލިނިކަކާއި ލެބޯޓްރީއެއްގެ އިތުރުން ފާމަސީއެއް ވަނީ ގާއިމްކޮށްފަ އެވެ.
އޮޅު ހިޔާ ހެދުމަށްފަހު އެތަނަށް ބުޅާތައް ގެންދަންފެށީ މިދިޔަ އަހަރުގެ ފެބްރުއަރީ މަހުގެ 28 ވަނަ ދުވަހުއެވެ.
Advertisement
This content is created and paid for by advertisers and does not involve Voice Journalists
