އައްޑޫ ސިޓީގެ ކަރަންޓްގެ މައްސަލަ ހައްލުކުރުމަށް ބޮޑު މަޝްރޫއުއެއްގައި މިއަދު ސޮއިކޮށްފައިވާ ކަމަށް މި މަޝްރޫއުގެ ސަބަބުން ކުރިއަށް އޮތް 20 އަހަރަށް ކަރަންޓްގެ މައްސަލަ ހައްލުވެގެން ދާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެ އެވެ.

ދަ ގްރޭޓާ އައްޑޫ ވިޝަންގެ ތަފްސީލު ލޯންޗުކުރުމުގެ މިރޭ އާޓިފިޝަލް ބީޗުގައި އޮތް ހަފްލާގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ ވިދާޅުވީ އައްޑޫ ސިޓީއަށް ދިމާވެފައިވާ އެންމެ ބޮޑު މައްސަލައަށް ދާއިމީ ހައްލެއް ގެނައުމަށް ކުރަންޖެހޭ މަސައްކަތްތައް ފަށާފައިވާ ކަމަށެވެ.

އައްޑޫގެ ކަރަންޓްގެ ހާލަތު އެ ދަރަޖައަށް ދިގައީ މިދިޔަ އެތައް ދައުރެއްގައިވެސް އެކަން ހައްލުކުުރުމަށް އެކަށީގެންވާ މަސައްކަތްތަކެއް ކުރެވިފައިނުވާތީ ކަމަށް ރައީސް ވިދާޅުވި އެވެ.

ރައީސް މިރޭ ވިދާޅުވި ގޮތުގައި އައްޑޫގެ ކަރަންޓްގެ މައްސަލައަށް ދާއިމީ ހައްލު ގެނައުމަށް ބޮޑު މަޝްރޫއުއެއް ފަށަން ނިންމާ އެކަމުގެ އެއްބަސްވުމުގައި މިއަދު ހަވީރު ވަނީ ސޮއިކޮށްފަ އެެވެ. މި މަޝްރޫޢުއާއެކު 26 މެގަވޯޓްގެ ކަރަންޓް ފޯރުކޮށްދޭނެ ނިޒާމު ގާއިމުކުރާނެ ކަމަށާ އެ މަޝްރޫޢު އަންނަ އަހަރުގެ ޖުލައިމަސް އަންނައިރުގައި ނިމިގެން ދިއުމާއެކު އައްޑޫގެ ކަރަންޓް މައްސަލައަށް ދާއިމީ ހައްލެއް ލިބިގެންދާނެ ކަމަށް ރައީސް ވިދާޅުވި އެވެ.

"ކުރިއަށް އޮތް 20 އަހަރަށް އައްޑޫ ސިޓީގެ ކަރަންޓްގެ މައްސަލަ ހައްލުވެގެންދާނެ މިކަމުގެ ސަބަބުން," ރައީސް ވިދާޅުވި އެވެ.

ރައީސް ވަނީ މިފަދަ މަޝްރޫއުއަކަށް ކައުންސިލަށް ހުރަސް އެޅޭނެ ކަމަށާ އެހެން ކަމުން އެފަދަ ބަޔަކު އިންތިހާބު ނުކޮށް ކޮންގްރެސްގެ ކެންޑިޑޭޓުން އިންތިހާބު ކޮށްދެއްވުމަށް އެދިވަޑައިގެންފަ އެވެ.