އީރާނާއެކު އެއްވެސް މަޝްވަރާއެއް ކުރުމަށް ދެކޮޅު ހަދައި، އެ ގައުމުގެ އަސްކަރިއްޔާ އާއި ހުރިހާ ލީޑަރުން ނައްތާލައިގެން މެނުވީ ހަނގުރާމަ ނިމުމަކަށް ނާންނާނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ބުނެފިއެވެ. 

މިދިޔަ ހޮނިހިރު ދުވަހު ރިޔާސީ މަތިންދާބޯޓު "އެއާފޯސް ވަން" ގައި ނޫސްވެރިންނާ ވާހަކަދައްކަމުން ޓްރަމްޕް ބުނީ، އީރާނުގެ ހުރިހާ ލީޑަރުން މަރާލައި، އެ ގައުމުގެ އަސްކަރިއްޔާ މުޅިން ސުންނާފަތި ކޮށްލުމުން މަޝްވަރާ ކުރުމުގެ ބޭނުމެއް ނޯންނާނެ ކަމަށެވެ.

ޓްރަމްޕް އިތުރަށް ބުނީ، "އަހަރެމެން އަމާންދީފީމޭ ބުނާނެ މީހަކުވެސް ބާކީ ނުހުންނާނެ ހިސާބަކަށް ކަންތައްތައް ގޮސްދާނެ" ކަމަށެވެ.

އެމެރިކާ އާއި އިސްރާއީލުން އީރާނާ ދެކޮޅަށް ކުރަމުންދާ ހަނގުރާމައަށް ދެ ހަފްތާވާއިރު، އީރާނުގެ ރައީސް މަސްއޫދު ޕެޒެޝްކިއަން ވަނީ އަވަށްޓެރި ގައުމުތަކުގައި ހުރި އެމެރިކާގެ އަސްކަރީ މަރުކަޒުތަކަށް އީރާނުން ދިން ހަމަލާތަކަށްޓަކައި އެ ގައުމުތަކުގެ ކިބައިން މާފަށް އެދިވަޑައިގަންނަވާފައެވެ.

އޭނާ ވިދާޅުވީ އީރާނުގެ ހަމަލާތަކުގެ ސަބަބުން އަސަރުކުރި އަވަށްޓެރި ގައުމުތަކުގެ ކިބައިން އަމިއްލަފުޅަށް މާފަށް އެދިވަޑައިގަންނަވާ ކަމަށާއި، އެމެރިކާ އާއި އިސްރާއީލުން އީރާނަށް ދޭ ހަމަލާތަކުގައި ބައިވެރިނުވުމަށް އެދިވަޑައިގަންނަވާ ކަމަށެވެ.

ނަމަވެސް، ޓްރަމްޕް އެދޭ ގޮތަށް އަމާންދިނުމަކީ "ހުވަފެނެއް" ކަމަށް ރައީސް ޕެޒެޝްކިއަން ސިފަކުރެއްވިއެވެ. އޭނާ ވިދާޅުވީ އީރާނުގެ ވަގުތީ ލީޑަރޝިޕް ކައުންސިލުން އަވަށްޓެރި ގައުމުތަކަށް ހަމަލާދިނުން ހުއްޓާލުމަށް އެއްބަސްވެފައިވާ ކަމަށެވެ. އެކަމަކު އެ ގައުމުތަކުގެ ބިމުން އީރާނަށް ހަމަލާއެއް އަތުވެއްޖެނަމަ ރައްދު ދޭނެ ކަމަށްވެސް ވިދާޅުވިއެވެ.

ޕެޒެޝްކިއަންގެ މި ވާހަކަތަކާ ގުޅިގެން އީރާނުގެ އެތެރޭގައި ސިޔާސީ ހަލަބޮލިކަމެއް އުފެދިފައިވީ ނަމަވެސް، އީރާނުގެ ސުޕްރީމް ނޭޝަނަލް ސެކިއުރިޓީ ކައުންސިލްގެ ސެކްރެޓަރީ އަލީ ލަރީޖާނީ ވިދާޅުވީ ހަނގުރާމައިގެ ކަންކަމުގައި އީރާނުގެ އޮފިޝަލުންގެ މެދުގައި އެއްވެސް ޚިޔާލުތަފާތުވުމެއް ނެތް ކަމަށެވެ.

މިދިޔަ ހޮނިހިރު އަދި އާދީއްތަ ދުވަހު ސައުދީ އަރަބިއްޔާ، ކުވައިތު އަދި ޔޫއޭއީ އަށް އީރާނުގެ ޑްރޯން ހަމަލާތަކެއް އަމާޒުވެފައިވާ ކަމަށް އެ ގައުމުތަކުން ރިޕޯޓުކޮށްފައިވެއެވެ. ސައުދީ އަރަބިއްޔާއިން ވަނީ އީރާނުގެ ހަމަލާތައް ކުރިއަށްދާނަމަ އެއަށް އެކަށީގެންވާ ރައްދެއް ދޭނެ ކަމުގެ އިންޒާރު ތެހެރާނަށް ދީފައެވެ. މީގެ އިތުރުން ބަހުރޭންގައި ހުރި އެމެރިކާގެ އަސްކަރީ މަރުކަޒަކަށްވެސް އީރާނުން ހަމަލާދީފައިވާ ކަމަށް އެ ގައުމުގެ ދައުލަތުގެ މީޑިއާއިން ބުނެފައިވެއެވެ.