އީރާނުގެ ދެކުނުގައި ހުރި އަންހެން ކުދިންގެ ޕްރައިމަރީ ސްކޫލަކަށް އަމާޒުކޮށް ދިން ވައިގެ ހަމަލާއެއްގައި 175 ކުދިން މަރުވި ހާދިސާގެ ޒިންމާއިން ރެކެން އެމެރިކާގެ ރައީސް ޑޮނަލްޑް ޓްރަމްޕް މަސައްކަތްކޮށްފިއެވެ.
ހަނގުރާމައިގެ ފުރަތަމަ ދުވަހު ދިން މި ހަމަލާއަކީ އީރާނުން އަމިއްލައަށް ދިން ހަމަލާއެއް ކަމަށް ޓްރަމްޕް ވަނީ ތުހުމަތުކޮށްފައެވެ.
ރިޔާސީ މަތިންދާބޯޓު "އެއާފޯސް ވަން" ގައި ނޫސްވެރިންނާ ވާހަކަދައްކަމުން ޓްރަމްޕް ބުނީ، މިހާތަނަށް ފެނުނު ހެކިތަކަށް ބަލާއިރު އެ ހަމަލާ ދީފައިވަނީ އީރާނުން ކަމަށެވެ.
"އަހަންނަށް ފެނުނު އެއްޗިއްސަށް ބަލާއިރު އެކަން ކުރީ އީރާނުން. އެމީހުންގެ ހަތިޔާރުތަކަކީ އެހާ އަމާޒު ސީދާ އެއްޗިއްސެއް ނޫން. އެއީ އީރާނުން ކުރި ކަމެއް،" ޓްރަމްޕް ބުންޏެވެ.
މިކަމާ ގުޅިގެން އެމެރިކާގެ ޑިފެންސް ސެކްރެޓަރީ ޕީޓް ހެގްސެތު ވެސް ވަނީ އެމެރިކާގެ ބައިވެރިވުން މި ހަމަލާގައި ނެތްކަމަށް ބުނެފައެވެ. އޭނާ ބުނި ގޮތުގައި އާންމުންނަށް އަމާޒުކޮށް ހަމަލާދޭ ހަމައެކަނި ބަޔަކީ އީރާނެވެ.
ނަމަވެސް، "ނިއުޔޯކް ޓައިމްސް" އިން ކުރިއަށް ގެންދިޔަ ދިރާސާއަކުން ދައްކާ ގޮތުގައި، އެ ސްކޫލަށް ހަމަލާ އަރާފައިވަނީ އެ ސަރަހައްދުގައި ހުރި އީރާނުގެ އަސްކަރީ މަރުކަޒަކަށް އެމެރިކާ އިން ދިން ހަމަލާއެއްގެ ތެރޭގައެވެ.
މީގެ އިތުރުން، އީރާނުގެ ފެން ސާފުކުރާ ޕްލާންޓަކަށް އެމެރިކާ އިން ހަމަލާދިން ކަމަށް ކުރާ ތުހުމަތުތަކަށް ސީދާ ޖަވާބެއް ނުދީ، ޓްރަމްޕް ވަނީ އީރާނުން ހިންގާ ކަމަށް ބުނާ އަނިޔާވެރި އަމަލުތަކުގެ ވާހަކަ ދައްކާފައެވެ.
"އެއީ ދުނިޔޭގައި އުޅޭ އެންމެ ނުބައި މީހުން. އެމީހުން ތުއްތު ކުދިންގެ ބޯ ބުރިކޮށް، އަންހެނުން ދެބައިކޮށް ކޮށާ ހަދާ،" ޓްރަމްޕްގެ ލާއިންސާނީ ޢަމަލުތަކުގެ ޒިންމާއިން ރެކެން ބަހަނާތައް ދައްކަމުން އޭނާ ބުނެފައިވެއެވެ.
މި ހާދިސާއާ ގުޅިގެން ބައިނަލްއަގުވާމީ މުޖުތަމައުގެ ފާޑުކިޔުން އެމެރިކާއަށް އަމާޒުވަމުންދާއިރު، ހަގީގަތް ހޯދުމަށް މިނިވަން ތަހުގީގަކަށް ދަނީ ގޮވާލަމުންނެވެ.
Advertisement
This content is created and paid for by advertisers and does not involve Voice Journalists
