ފަހަކަށް އައިސް ސޯޝަލް މީޑިއާގެ އެކި މަންސަތަކުގައި، ޚާއްޞަކޮށް ފޭސްބުކްގައި، ބަލިމީހުންގެ ފޮޓޯ ބޭނުންކޮށްގެން މެޑިކަލް އެހީއަށް އެދި ކުރާ ޕޯސްޓްތައް ވަރަށް ބޮޑަށް އިތުރުވެފައިވާތީ އެކަމަށް ސަމާލުވުމަށް ފުލުހުން އެދިއްޖެއެވެ. 

ފުލުހުންގެ އެންޓި ސްކޭމް ސެންޓަރުން ބުނީ، މިފަދަ ގިނަ ޕޯސްޓްތަކަކީ މަކަރާއި ހީލަތުން ފައިސާ ހޯދުމަށް ހިންގާ "ސްކޭމް" ތަކެއްކަން ފާހަގަކުރެވުފައުވާ ކަމަށެވެ.

އެގޮތުން ސްކޭމަރުން އާންމުކޮށް ބޭނުންކުރާ އުކުޅުތަކުގެ ތެރޭގައި، ރާއްޖޭން ބޭރުގެ ވެބްސައިޓްތަކުންނާއި އިންޓަނެޓުން ބަލިމީހުންގެ ފޮޓޯ ވަގަށް ނަގައިގެން ބޭނުންކުރާ ކަމަށާ އަދި ކުޑަކުދިންނާއި ބޮޑެތި ބަލިތަކުގެ ވާހަކަ ދައްކައިގެން މީހުންގެ ހަމްދަރުދީ ހޯދުމަށް މަސައްކަތް ކުރާކަން ފާހަގަކޮށްފައިވެއެވެ.

ސްކޭމް ހިންގާ އައިޑީއެއް

މީގެ އިތުރުން، ޕޯސްޓްގައިވާ ނަންބަރަށް ގުޅުމުން ފޯނު ނުނަގައި ބްލޮކް ކުރި ނަމަވެސް، މެސެޖަށް ޖަވާބުދީ ފައިސާ ހޯދުމަށް މަސައްކަތް ކުރާކަންވެސް ވަނީ ފާހަގަކުރެވިފައިވާ ކަމަށް ފުލުހުން ބުންޏެވެ.

މިފަދަ މަކަރުވެރި ރޭވުންތަކުން ރައްކާތެރިވުމަށްޓަކައި، އެޅިދާނެ ފިޔަވަޅުތައް ފުލުހުން ވަނީ ކިޔައިދީފައެވެ. އެގޮތުން؛

- ފައިސާ ފޮނުވުމުގެ ކުރިން އެ ނަންބަރަކަށް ގުޅައި މަޢުލޫމާތުގެ ސައްހަކަން ކަށަވަރުކުރުން.

- 'ގޫގުލް ރިވާސް އިމޭޖް ސާޗް' ފަދަ ވަސީލަތްތައް ބޭނުންކޮށްގެން އެ ފޮޓޯއަކީ ސައްހަ ފޮޓޯއެއްތޯ ބެލުން.

- ސައްހަކަން ޔަގީންނުވާ ޕޯސްޓްތައް ސޯޝަލް މީޑިއާގައި ޝެއަރ ނުކުރުން. ސަބަބަކީ އެފަދަ ޕޯސްޓްތައް ޝެއަރ ކުރުމަކީ އިތުރު ބަޔަކު މި މަޅީގައި ޖެހުމަށް ދެވޭ ދައުވަތަކަށް ވާތީއެވެ.

އާއްމުކޮށް މިފަދަ ސްކޭމް ޕޯސްޓްތަކުގައި ހުންނަނީ މީހުންނަށް ކޮމެންޓްވެސް ނުކުރެވޭގޮތަށް ކޮމެންޓްސް އޮފް ކޮށްފައިކަން ފާހަގަކޮށްލަންޖެހެއެވެ. 

އާންމުންގެ ދީލަތި އެހީ، ކުށްވެރިންގެ އަތަށް ދިޔަ ނުދިނުމަށްޓަކައި މިއަށްވުރެ ބޮޑަށް ސަމާލުވެ، ހޭލުންތެރިވުމަށް ފުލުހުން އެދެއެވެ.