އެމެރިކާއިން އީރާނާއެކު ކުރަމުންދާ ހަނގުރާމަ "ވަރަށް އަވަހަށް" ނިމުމަކަށް އަންނާނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް، ބުނި ފަހުންވެސް އީރާނުގެ ވެރިރަށް ތެހެރާނުގެ އާންމުން ދިރިއުޅޭ ގެތަކަށާއި ސްކޫލްތައް ހުންނަ ސަރަހައްދުތަކަށް އިޒްރޭލާއި އެމެރިކާގެ ވަރުގަދަ ހަމަލާތަކެއް ދީފިއެވެ.

ފެބްރުއަރީ 28 ވަނަ ދުވަހު "އޮޕަރޭޝަން އެޕިކް ފިއުރީ" ގެ ނަމުގައި އެމެރިކާ އާއި އިޒްރޭލުން އީރާނަށް ދޭން ފެށި ހަމަލާތަކަށް މިހާރު ވަނީ ދެ ހަފުތާ ވެފައެވެ. މި ހަމަލާތަކުގެ ފުރަތަމަ ދުވަހު އީރާނުގެ ރޫހާނީ ލީޑަރު އާޔަތުالله އަލީ ޚާމަނާއީ ވަނީ އަވަހާރަކޮށްލާފައެވެ.

ޓްރަމްޕް އިއްޔެ ވަނީ އީރާނުގެ މިސައިލް އުފައްދާ ތަންތަނާއި، ޑްރޯން ސިސްޓަމްތަކުގެ 80 އިންސައްތަ މިހާރު ނައްތާލެވިފައިވާ ކަމަށް ބުނެފައެވެ. އަދި އީރާނުގެ ކަނޑުގެ ސިފައިންގެ އެންމެ ޒަމާނީ 46 މަނަވަރު ތިން ދުވަސް ތެރޭގައި ފައްތާލާފައިވާ ކަމަށްވެސް އޭނާ ބުންޏެވެ. ހަމައެހެންމެ، އީރާނުގެ ނިޔުކްލިއާ ބާރު ކުޑަކޮށްލެވިފައިވާ ކަމަށާ ހަނގުރާމަ ނިމެން ވަރަށް ކައޮރިވެފައިވާ ކަމަށްވެސް އޭނާ ބުނެފައިވެއެވެ. 

ނަމަވެސް، މަސްރަޙުން ފެންނަ މަންޒަރުތައް މިއާ މުޅިން ތަފާތެވެ. އެގޮތުން އެމެރިކާއިން ރޭ ތެހެރާނުގެ ރިސާލަތު އިންތިޒާރު މައިދާން ކައިރިއަށް ދިން ވަރުގަދަ ހަމަލާތަކުގައި 40 އަށްވުރެ ގިނަ އާންމުން ވަނީ ޝަހީދުވެފައެވެ. ރިޕޯޓްތައް ބުނާގޮތުން މި ހަމަލާތައް އަމާޒުވެފައިވަނީ އަސްކަރީ މަރުކަޒުތަކަކަށް ނޫނެވެ. އޭގެ ބަދަލުގައި އާންމުން ދިރިއުޅޭ ގެތަކަށާއި މީހުން އެއްވެ އުޅޭ ސަރަހައްދުތަކަށެވެ.

މީގެ އިތުރުން، އީރާނުގެ ތެޔޮ ރިފޭނަރީތަކަށް ދިން ހަމަލާތަކުގެ ސަބަބުން ވައި ނުސާފުވެ، ތެހެރާނަށް މިހާރު ކުރަމުންދާ ވާރޭގެ ތެރެއަށް ނުނިކުތުމަށް ރެޑް ކްރެސެންޓުން ވަނީ އިލްތިމާސްކޮށްފައެވެ. އަދި ގިނަ ސިޓީތަކަކުން ކަރަންޓުގެ ޚިދުމަތް ކެނޑި، އާންމު ދިރިއުޅުމަށް ވަނީ ބޮޑެތި ހުރަސްތަކެއް ކުރިމަތިވެފައެވެ.

އީރާނުގެ ރިވޮލިއުޝަނަރީ ގާޑްސްއިން ވަނީ ޓްރަމްޕްގެ ވާހަކަތައް ދޮގުކޮށްފައެވެ. އެމީހުން ބުނާގޮތުގައި އީރާނުގެ މިސައިލް ގާބިލްކަން ނައްތައެއް ނުލެވެއެވެ. އަދި ބަދަލުހިފުމުގެ ގޮތުން ބަހްރޭން، ކުވެއިތު، ޔޫއޭއީ އަދި ސައުދީ އަރަބިއްޔާގައި ހުރި އެމެރިކާގެ އެމްބަސީތަކަށް އީރާނުން ދަނީ ހަމަލާ ދެމުންނެވެ. މި ހަމަލާތަކުގައި ބަހްރޭނުގެ މަނާމާ އިން އެކަކު އަދި އިޒްރޭލުގެ މެދުތެރޭގެ ސަރަހައްދުތަކުން ދެ މީހަކު ވަނީ މަރުވެފައެވެ.

ހަނގުރާމަ ވަރަށް އަވަހަށް ނިމޭނެ ކަމަށް ޓްރަމްޕް ބުނި ނަމަވެސް، ހޯރްމުޒް ކަނޑުއޮޅިން ތެޔޮ ޓޭންކަރުތައް ހުއްޓުވައިފިނަމަ، އީރާނަށް ދޭ ހަމަލާތައް 20 ގުނަ ވަރުގަދަ ކުރާނެ ކަމުގެ އިންޒާރުވެސް ޓްރަމްޕް ވަނީ ދެއްވާފައެވެ. މިއާއެކު މުޅި މެދުއިރުމަތީގެ މަސްރަޙު މިހާރު އޮތީ ނުތަނަވަސްކަމެއްގެ ތެރޭގައެވެ.