އެމެރިކާ އާއި ދެކުނު ކޮރެއާއިން އަސްކަރީ ތަމްރީނުތަކެއް ފަށާފައިވަނިކޮށް އުތުރު ކޮރެއާއިން ބެލަސްޓިކް މިސައިލްތަކެއް ފޮނުވާލައިފިއެވެ.

ޖަޕާނުގެ ދިފާޢީ ވުޒާރާއިން ބުނި ގޮތުގައި އެ މިސައިލްތައް ފޮނުވާލާފައިވަނީ ޖަޕާން ގަޑިން މެންދުރު ފަހު 1:34 ހާއިރު އިރުއުތުރު ދިމާއަށެވެ. އެ ވުޒާރާއިން ލަފާކުރާ ގޮތުގައި މިސައިލްތައް 80 ކިލޯމީޓަރުގެ އުސްމިނަށް އެރުމަށް ފަހު ގާތްގަނޑަކަށް 340 ކިލޯމީޓަރަށް ދަތުރުކޮށް، މިސައިލްތައް ވަނީ ކޮރެއާ ޕެނިންސިއުލާގެ އިރުމަތީ އައްސޭރި ކަނޑުތެރެއަށް ވެއްޓިފައެވެ. މިސައިލްތައް ވެއްޓިފައިވަނީ ޖަޕާނުގެ ޚާއްޞަ އިޤުތިޞާދީ ސަރަޙައްދުން ބޭރަށެވެ.

އަލްޖަޒީރާއިން ބުނިގޮތުގައި މިކަމާ ގުޅިގެން މަތިންދާބޯޓުތަކާއި އުޅަނދުތަކަށް ގެއްލުމެއް ލިބުނު ކަމުގެ ރިޕޯޓެއް އަދި މިހާތަނަށް ލިބިފައެއް ނުވެއެވެ.

ދެކުނު ކޮރެއާގެ ޖޮއިންޓް ޗީފްސް އޮފް ސްޓާފުން ޔޮންހެޕް ނިއުސް އެޖެންސީއާ ހަވާލާދީ ބުނީ ޕިއޮންޔެންގުން ގާތްގަނޑަކަށް 10 ބެލިސްޓިކް މިސައިލް ޖަޕާން ކަނޑާ ދިމާއަށް ފޮނުވާލި ކަމަށެވެ. މިއީ މި އަހަރު ފެށުނު ފަހުން އުތުރު ކޮރެއާއިން ބެލިސްޓިކް މިސައިލް ފޮނުވާލި ތިންވަނަ ފަހަރު ކަމަށް ވެސް އެ އިދާރާއިން ބުންޏެވެ. އުތުރު ކޮރެއާއިން މި މިސެއިލްތައް ފޮނުވާލުމާ ގުޅިގެން ދެކުނު ކޮރެއާ، ޖަޕާން އަދި އެމެރިކާގެ ފައުޖުތައް އެލާޓަށް ގެނެސްފައިވާކަމަށް މީޑިއާގެ ރިޕޯޓްތައް ބުނެއެވެ.

އުތުރު ކޮރެއާއިން ބެލަސްޓިކް މިސައިލްތައް ފޮނުވާލާފައި މިވަނީ ދެކުނު ކޮރެއާއާއި އެމެރިކާ ގުޅިގެން 10 ދުވަހުގެ މުއްދަތަށް ކުރިއަށް ގެންދާ "ފްރީޑަމް ޝީލްޑް" އަސްކަރީ ތަމްރީނުތައް ފެށުމާ ދިމާކޮށެވެ. މި ތަމްރީނުތައް ކުރިއަށް ދަނީ މާޗް 19 ވަނަ ދުވަހާ ހަމައަށެވެ.