އިސްރާއީލަށާއި އެމެރިކާގެ މަރުކަޒު ތަކަކަށް ވަރުގަދަ ހަމަލާތަކެއް ދީފައިވާ ކަމަށް އީރާނުން ބުނެފި
އިސްރާއީލާއި ޢިރާޤާއި ކުވެއިތުގައި ހުރި އެމެރިކާގެ ތިން ބޭސްއަކަށް ވަރުގަދަ ހަމަލާތަކެއް ދީފައިވާ ކަމަށް އީރާނުން ބުނެފިއެވެ.
އީރާނުގެ ރިވޮލިއުޝަނަރީ ގާޑް ކޯޕްސްޱއައިއާރުޖީސީން ނެރުނު ބަޔާނުގައި ބުނީ އިސްރާއީލުގައި "އެމްބިއުލެންސްގެ ސައިރެން މެދުނުކެނޑި އިވެމުންދާ" ކަމަށާއި، ތެލް އަވީވުގެ ސިނާޢީ ސަރަޙައްދުތަކަށް އައިއާރުޖީސީގެ "ބަރު މިސައިލްތަކުގެ އަސަރު" ފެންނަމުންދާ ކަމަށެވެ.
އައިއާރުޖީސީން އިތުރަށް ބުނީ ޢިރާޤުގެ އެރްބީލްގައި ހުންނަ ހަރީރް އެއާބޭސްއާއި ކުވޮތުގައި ހުންނަ ޢަލީ އަލް ސާލިމް އަދި ޢަރީފްޖާން ބޭސްތައް "އީރާނުގެ ބާރުގަދަ މިސައިލްތަކާއި ޑްރޯންތަކުން ހަލާކުކޮށްލާފައިވާ" ކަމަށެވެ.
ޢިރާޤުގެ ޙާލަތު ވެސް ވަނީ ވަރަށް ބޮޑަށް ގޯސްވެފައެވެ. ހޮނިހިރު ދުވަހުގެ ހެނދުނު ބަޣުދާދުގައި ހުންނަ އެމެރިކާ އެމްބަސީއަށް މިސައިލެއް އަރައި ވައިގެ ދިފާޢީ ނިޒާމުގެ ބަޔަކަށް ގެއްލުން ލިބިފައިވެއެވެ. އެމެރިކާ އެމްބަސީން ވަނީ ޢިރާޤުގައި ތިބި އެމެރިކާ ރައްޔިތުން ވަގުތުން ފައިބައިގެން ދިއުމަށް އިންޒާރު ނެރެފައެވެ.
ޢިރާޤުގެ ހަތިޔާރު އެޅި ޖަމާޢަތްތަކުން އެ ޤައުމުގައި ތިބި އެމެރިކާ މީހުންގެ މަޢުލޫމާތު ދޭ ފަރާތްތަކަށް 100،000 ޑޮލަރާ ހަމައަށް އިނާމު ހުށަހަޅާފައިވާ ކަމަށް ރިޕޯޓްތައް ބުނެއެވެ.
ބަޣުދާދުގެ އިތުރުން ޢިރާޤުގެ އެކި ކަންކޮޅުތަކުގައާއި އުތުރު ޢިރާޤުގެ ކުރުދިސްތާން ސަރަޙައްދުގައި ހުރި އެމެރިކާ ބޭސްތަކާއި އެއާޕޯޓްތަކަށް ހަމަލާ ދެމުންދާއިރު، ބޭސްއަކަށް ދިން ހަމަލާއެއްގައި ފަރަންސޭސި ސިފައިންގެ މީހަކު ވެސް މަރުވެފައިވެއެވެ.
އަނެއްކޮޅުން، އެމެރިކާއާއި އިސްރާއީލުން އީރާނަށް ހަމަލާ ދެމުންދާއިރު، ގަލްފުގެ ތެލަށް ބަރޯސާވާ ޤައުމުތަކުން ހޮރްމޫޒް ކަނޑުއޮޅި ހުޅުވާފައި ބެހެއްޓުމަށް އެހީތެރިވާންޖެހޭ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވަނީ ބުނެފައެވެ.
Advertisement
This content is created and paid for by advertisers and does not involve Voice Journalists
