މާލޭގެ މާފަންނު އަވަށުގައި ހުރި ކެމިކަލް ގުދަނެއްގައި ރޭ ހިނގި ނުރައްކާތެރި އަލިފާނުގެ ހާދިސާއާ ގުޅިގެން، އެކަން ހިނގަން މެދުވެރިވި ސަބަބު ދެނެގަތުމަށް ފުލުހުން ޚާއްސަ ތަހުގީގެއް ފަށައިފިއެވެ.

ފުލުހުންގެ ބަޔާނެއްގައި ވިދާޅުވެފައިވާ ގޮތުގައި، މާފަންނު އިއްޒުއްދީންމަގާއި ފުލޫނިޔާމަގު ގުޅުނު ކަންމަތީގައި ހުންނަ "ޕްރައިމް ފާޓިލައިޒާ މޯލްޑިވްސް ޕްރައިވެޓް ލިމިޓެޑް" ގެ ގުދަނުގައި އަލިފާން ރޯވިކަމުގެ ރިޕޯޓު ލިބިފައިވަނީ ރޭ 21:57 އެހައިކަންހާއިރުއެވެ.

މި ހާދިސާގެ ރިޕޯޓު ލިބުމާއެކު، ފުލުހުންނާއި އެމް.އެން.ޑީ.އެފް ފަޔަރ އެންޑް ރެސްކިއު ސަރވިސްގެ ޓީމުތަކުން ވަނީ ވަގުތުން އެ ސަރަހައްދަށް ގޮސް އަލިފާން ނިއްވުމުގެ މަސައްކަތް ފަށާފައެވެ. ގިނަ މަސައްކަތްތަކަކަށްފަހު، އަލިފާންގަނޑު ނިއްވާލެވުނީ ފަތިހު 5 ޖަހަންވެފައިވަނިކޮށެވެ.

ފުލުހުން މައުލޫމާތު ދިންގޮތުގައި އަލިފާން ރޯވި ގުދަނަކީ އެކި ބާވަތްތަކުގެ ގަސްކާނާއާއި ޕެސްޓިސައިޑްސްގެ އިތުރުން ދަނޑުވެރިކަމަށް ބޭނުންކުރާ ސާމާނާއި ޖަނަރޭޓަރެއްވެސް ހުރި ތަނެކެވެ.

މި ހާދިސާގައި އަލިފާން ނިއްވުމުގައި ހަރަކާތްތެރިވި އެމް.އެން.ޑީ.އެފްގެ ސިފައިންގެ މީހަކަށް އަނިޔާވެގެން ހޮސްޕިޓަލަށް ގެންގޮސް ފަރުވާދީފައިވެއެވެ.

މި ހާދިސާގައި ގުދަނަށާއި އެތަނުގައި ހުރި މުދަލަށް ބޮޑެތި ގެއްލުންތަކެއް ލިބިފައިވާއިރު، އެ ސަރަހައްދުގައި ހުރި އުޅަނދުފަހަރަށްވެސް ވަނީ ގެއްލުން ވެފައެވެ. އެގޮތުން 13 ސައިކަލަކަށާއި، ޕިކަޕަކަށާއި، ކުންފުނީގެ ވޭނަކަށް އެކި ވަރުގެ ގެއްލުންތައް ލިބިފައިވާ ކަމަށް ފުލުހުން މައުލޫމާތު ދެއްވައެވެ.

ގުދަނުގައި ހުރި ކެމިކަލްތަކުގެ ސަބަބުން އުފެދުނު ނުރައްކާތެރި ދުމުގެ އަސަރު ކޮށްފާނެތީ، ރައްކާތެރިކަމުގެ ފިޔަވަޅެއްގެ ގޮތުން އެ ސަރަހައްދުގައި ދިރިއުޅޭ 77 މީހަކު ވަނީ އެ ސަރަހައްދުން ބަދަލުކޮށްފައެވެ.

ކަމާބެހޭ އިދާރާތަކުގެ އެހީތެރިކަމާއެކު މި ހުރިހާ ފަރާތްތަކަށްވެސް މިހާރު ވަނީ ވަގުތީ ބޯހިޔާވަހިކަން ފޯރުކޮށްދީފައެވެ.

ފުލުހުން މިހާރު ގެންދަނީ ހާދިސާ ހިނގި ސަރަހައްދު ޕްރޮސެސް ކުރުމުގެ މަސައްކަތް ކުރަމުން ކަމަށާ މި ނުރައްކާތެރި ހާދިސާ ހިނގަން މެދުވެރިވި އަސްލު ސަބަބު ދެނެގަތުމަށްޓަކައި ކުރަންޖެހޭ އެންމެހައި ތަހުގީގުތައް ފުލުހުން ކުރިއަށް ގެންދާ ކަމަށް އެ އުދާރާއިން ބުނެއެވެ.