ފިތުރު ޢީދުގެ އުފާފާޅުކުރުމަށާއި ފުލުހުންނާއި ރައްޔިތުންގެ ގުޅުން ބަދަހިކުރުމުގެ މަގްސަދުގައި ދިވެހި ފުލުހުންގެ ހިދުމަތުން އިންތިޒާމުކުރާ 'ޢީދު ހަވީރު 1447' ގްރޭޓަރ މާލޭގެ ހަތަރު ސަރަހައްދެއްގައި ބޭއްވުމަށް ނިންމައިފިއެވެ.
މި ހަރަކާތް ކުރިއަށްދާނީ މާރިޗު 20 އިން 22 އަށް، ކޮންމެ ދުވަހެއްގެ ހަވީރު 16:00 އިން 18:00 އަށެވެ.
ފުލުހުންގެ ޚިދުމަތުން މައުލޫމާތުދޭ ގޮތުގައި، މި ހަރަކާތް ކުރިއަށްދާނީ މާލޭގެ އިސްލާމީ މަރުކަޒުގެ ސަރަހައްދާއި، ހުޅުމާލެ ފޭސް 1 ގެ ސެންޓްރަލް ޕާކާއި، ހުޅުމާލެ ފޭސް 2 ގެ ހިޔާ ޕާކް ސަރަހައްދުގެ އިތުރުން ވިލިމާލޭ ފުޓްބޯޅަ ދަނޑުގައެވެ. މިއީ އާއިލާތަކަށް އަމާޒުކޮށްގެން، ޢީދުގެ އުފާވެރިކަން އެންމެހާ ރައްޔިތުންނަށް ފޯރުކޮށްދިނުމަށް ބާއްވާ ހަރަކާތެކެވެ.
މި "ޢީދު ހަވީރު" ގައި ކުޑަކުދިންނާއި އާއިލާތަކަށް ބައިވެރިވެވޭނެ ތަފާތު މަޖާ ހަރަކާތްތަކެއް ކުރިއަށްދާނެ ކަމަށް ފުލުހުން ބުނެއެވެ.
އަދި މި ހަރަކާތުގެ ބޭނުމަކީ ހިތްފަސޭހަ މާހައުލެއްގައި ފުލުހުންނާއި ރައްޔިތުން ބައްދަލުވެ، އެކުވެރިކަމުގެ ގުޅުން ވަރުގަދަކުރުން ކަމަށްވެސް ބުނެފައިވެއެވެ.
އެހެންކަމުން ވީހާވެސް ގިނަ އާއިލާތަކުން ކުދިންނާއެކު މި ހަރަކާތުގައި ބައިވެރިވުމަށް ފުލުހުން ވަނީ އެދިފައެވެ. މި ހަރަކާތްތައް ރޭވިފައިވަނީ ހުރިހާ އުމުރުފުރައެއްގެ މީހުންނަށްވެސް ބައިވެރިވެވޭނެ ފަދަ ގޮތަކަށެވެ.
Advertisement
This content is created and paid for by advertisers and does not involve Voice Journalists
