ވ. ފެލިދޫ ކައިރިން ދަތުރުކުރި ލޯންޗެއް ބަންޑުން ޖަހާލައި ހިނގި ނުރައްކާތެރި ހާދިސާގައި އެކެއްގެ އަތް ބުރިވެފައިވާކަމަށް ފުލުހުން ބުނެފިއެވެ.

ފެލިދޫ ކައިރިން ރޭގަނޑު ދަންވަރު ދުއްވަނިކޮށް އެކްސިޑެންޓްވި ނުރައްކާތެރި ހާދިސާ ގައި ހަތް މީހަކު ދަތުރުކުރިއެވެ. މިހާތަނަށް ތިލަވި މައުލޫމާތުތަކަށް ބަލާއިރު އެ އުޅަނދު ދުއްވަން އިނީ އިންޑިއާގެ މަހުޖަނު އަދި ރޭމަންޑް ގްރޫޕްގެ ވެރިޔާ ގޯތަމް ސިންގާނިއާ އެވެ. އޭރު އޭނާ އިނީ މަސްތުގެ ޙާލަތުގައެވެ. މި ހާދިސާގައި ދެ މީހަކު ވަނީ ގެއްލިފައެވެ.

ފުލުހުން މިއަދު އާއްމުކުރި މި މައްސަލައިގެ އެންމެ ފަހުގެ މައުލޫމާތަށް ބަލާއިރު، އެކްސިޑެންޓްގައި އަނިޔާވި މީހުންނަށް އެންމެ ފުރަތަމަ ފަރުވާދީފައިވަނީ ވ.އަތޮޅު ހޮސްޕިޓަލުގައެވެ. އެކްސިޑެންޓްގައި ލޯންޗްގައި ތިބި މީހުންނަށް އެކިވަރުގެ އަނިޔާތައް ލިބުނެވެ. އޭގެ ތެރެއިން ރަޝިއާގެ އަންހެނަކަށާއި އިންޑިއާގެ ފިރިހެނަކަށް މިހާރުވެސް ހުޅުމާލޭ ޓްރީ ޓޮޕް ހޮސްޕިޓަލުގައި އިތުރު ފަރުވާ ދެމުންދާކަމަށް ފުލުހުން ބުންޏެވެ. އަދި މި ހާދިސާގައި އެކެއްގެ އަތް ބުރިވެ، ސީރިއަސް އަނިޔާތަކެއް ލިބުނު އިންޑިއާގެ ފިރިހެނަކު، އިތުރު ފަރުވާ ހޯދުމަށްޓަކައި މިއަދުގެ ވަގުތެއްގައި ވަނީ އިންޑިއާއަށް ފުރުވާލާފައިވާކަމަށް ފުލުހުން ވަނީ ބުނެފައެވެ.

ފުލުހުން ބުނީ މި ހާދިސާގައި ކަނޑަށް ގެއްލުނު އިންޑިއާގެ ދެ މީހަކު ހޯދުމުގެ މަސައްކަތް ކަމާބެހޭ އިދާރާތަކުން އަދިވެސް ކުރަމުންދާކަމަށެވެ. މި ހާދިސާ ފުލުހުން ތަހުގީގު ކުރަމުންދާކަމަށްވެސް ބުންޏެވެ.