އީރާނާއެކު ވަރަށް ކާމިޔާބު މަޝްވަރާތަކެއް ކުރިއަށްދާ ކަމަށް އެމެރިކާގެ ރައީސް ޑޮނަލްޑް ޓްރަމްޕް ބުނި ވާހަކަތައް އީރާނުގެ މަތީ ފަންތީގެ އޮފިޝަލުން ދޮގުކުރައްވައިފިއެވެ.

އީރާނުގެ ޕާލަމެންޓުގެ ރައީސް މުޙައްމަދު ބާގިރު ގާލިބާފް ރޭ އެކްސްގައި ކުރެއްވި ޕޯސްޓެއްގައި ވިދާޅުވީ، އެމެރިކާއާއެކު އެއްވެސް މަޝްވަރާއެއް ކުރިއަށް ނުދާ ކަމަށެވެ. އަދި ޓްރަމްޕް ފަތުރަމުންދަނީ ދޮގު ޚަބަރު ކަމަށާއި، އެއީ ތެލުގެ ބާޒާރަށް ނުފޫޒު ފޯރުވުމަށާއި އެމެރިކާއާއި އިސްރާއީލު ތާށިވެފައިވާ މަޅިން ސަލާމަތްވުމަށް ކުރާ ކަމެއް ކަމަށް އޭނާ ތުހުމަތު ކުރެއްވިއެވެ.

އީރާނުގެ ޚާރިޖީ ވުޒާރާގެ ތަރުޖަމާނު އިސްމާޢީލް ބަގާއީ ވެސް ވަނީ އެމެރިކާގެ ދައުވަތު ބައެއް ރަޙުމަތްތެރި ޤައުމުތަކުން އީރާނަށް ހުށަހަޅާފައިވާ ކަމަށް ވިދާޅުވެ، އެއްވެސް ސީދާ މަޝްވަރާއެއް ހިނގަމުން ނުދާކަން ކަށަވަރުކޮށްދެއްވާފައެވެ.

މި ދެބަސްވުންތައް އުފެދިފައި މިވަނީ، އިސްރާއީލާއި އެމެރިކާއިން އީރާނަށް ދެމުންދާ ޙަމަލާތަކަށް ހަތަރު ހަފުތާ ވެފައިވަނިކޮށެވެ. އިއްޔެވެސް އިސްރާއީލުން ވަނީ އީރާނުގެ ވެރިރަށް ތެހެރާނަށް އާ ޙަމަލާތަކެއް ދީފައެވެ. މީގެ ރައްދުގައި އީރާނުން ދަނީ މިސައިލާއި ޑްރޯންގެ ޙަމަލާތައް ދެމުންނެވެ.

މީގެ އިތުރުން ދުނިޔޭގެ ތެލުގެ ފަސްބައިކުޅަ އެއްބައި ދަތުރުކުރާ ހޯރްމޫޒް ކަނޑުއޮޅި ބަންދުކުރުމާ ގުޅިގެން، ދުނިޔޭގެ ބާޒާރުގައި ތެލުގެ އަގު ވަނީ ވަރަށް ބޮޑަށް އުފުލިފައެވެ.

އާދިއްތަ ދުވަހު ޓްރަމްޕް ވަނީ 48 ގަޑިއިރުގެ ތެރޭގައި ކަނޑުއޮޅި ހުޅުވާނުލައިފިނަމަ އީރާނުގެ އިންޖީނުގެތައް ފުނޑުފުނޑުކޮށްލާނެ ކަމަށް ބުނެ އިންޒާރުދީފައެވެ. ނަމަވެސް، އިއްޔެ އޭނާ ބުނީ މަޝްވަރާތަކަށް ފުރުޞަތު ދިނުމުގެ ގޮތުން ފަސް ދުވަހުގެ މުއްދަތަށް އެއްވެސް ޙަމަލާއެއް ނުދިނުމަށް އެމެރިކާގެ ދިފާޢީ ވުޒާރާއަށް އަންގާފައިވާ ކަމަށެވެ.

ހަނގުރާމައާގުޅިގެން ނިރުބަވެރި އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ބުނީ، އޭނާ ޓްރަމްޕާ ވާހަކަދެއްކި ކަމަށާއި، އެއްބަސްވުމަކަށް އާދެވިދާނެ ކަމަށް ޓްރަމްޕް ޤަބޫލުކުރާ ކަމަށެވެ. ނަމަވެސް، އީރާނާއި ލުބުނާނަށް ދޭ ޙަމަލާތައް ކުރިއަށްދާނެ ކަމަށް ނަތަންޔާހޫ ބުންޏެވެ.

މަސްރަޙު ދިރާސާކުރާ ފަރާތްތަކުން ބުނާ ގޮތުގައި، ޓްރަމްޕް މަޝްވަރާގެ ވާހަކަ ދައްކަނީ އޭނާ ދިން އިންޒާރާ އެއްގޮތަށް ކަންތައް ނުކުރެވިގެން، އެކަމުން ރެކުމުގެ ގޮތުންނެވެ.