އެމެރިކާއާއި އިސްރާއިލުން އިސްވެ އީރާނާ ދެކޮޅަށް ފެށި ހަނގުރާމަ ހުއްޓާލުމަށްޓަކައި "ރަނގަޅު މީހުންނާ" ވާހަކަދައްކަމުންދާ ކަމަށާއި، އީރާނުން އޮތީ އެއްބަސްވުމަކަށް އައުމަށް ވަރަށް ބޮޑަށް ބޭނުންވެފައި ކަމަށް އެމެރިކާގެ ރައީސް ޑޮނަލްޑް ޓްރަމްޕް ބުނެފިއެވެ.

ވައިޓް ހައުސްގައި ނޫސްވެރިންނާ ވާހަކަދައްކަމުން ޓްރަމްޕް މިހެން ބުނިއިރު، އީރާނުން ކުރިން ވަނީ މަޝްވަރާތައް ކުރިއަށްދާ ކަމަށް ބުނާ ވާހަކަތައް ދޮގުކޮށްފައެވެ.

ޓްރަމްޕް ބުނި ގޮތުގައި، މިދިޔަ މަހު އިސްރާއީލާއެކު ބައިވެރިވެގެން އެމެރިކާއިން އީރާނަށް ދޭން ފެށި ހަމަލާތަކަށްފަހު، މިހާރު ކުރިއަށްދާ މަޝްވަރާތަކުގައި އީރާނުގެ ފަރާތުން "ތެލާއި ގޭހާ" ގުޅޭ ވަރަށް ބޮޑު ހަދިޔާއެއް ދިނުމަށް ވަނީ ހުށަހަޅާފައެވެ. ނަމަވެސް، އީރާނުގެ މަޖިލީހުގެ ރައީސް މުޙައްމަދު ބާޤިރު ޤާލީބާފް ވަނީ މިއީ "ފޭކް ނިއުސް" ނުވަތަ ދޮގު ޚަބަރުގެ ގޮތުގައި ސިފަކުރައްވާފައެވެ.

މީޑިއާ ރިޕޯޓްތައް ބުނާގޮތުން، އެމެރިކާއިން ވަނީ ހަނގުރާމަ ހުއްޓާލުމަށް 15 ނުކުތާގެ މައްޗަށް އެކުލެވޭ ޕްލޭނެއް ޕާކިސްތާން މެދުވެރިކޮށް އީރާނަށް ހުށަހަޅާފައެވެ. މި ޕްލޭނުގައި އީރާނުގެ ނިއުކްލިއަރ ޕްރޮގްރާމް ހުއްޓާލުމާއި، ހަނގުރާމައިގެ ތެރޭގައި ބަންދުކޮށްފައިވާ ހޯރްމޫޒް ކަނޑުއޮޅި އަލުން ހުޅުވާލުން ހިމެނެއެވެ.

އެމެރިކާގެ މި ހުށަހެޅުން އައިސްފައިވަނީ އެގައުމުގައި މި ހަނގުރާމައަށް އޮތް ތާއީދު ކުޑަވަމުންދާ ދަނޑިވަޅެއްގައެވެ. ރޮއިޓާސްއިން ކުރި ސާވޭއަކުން ދައްކާގޮތުގައި އެމެރިކާގެ 61 އިންސައްތަ މީހުން އީރާނަށް ދޭ ހަމަލާތަކާ ދެކޮޅެވެ.

މިކަމާ ގުޅޭގޮތުން އީރާނުގެ ފޮރިން މިނިސްޓްރީން ބުނެފައިވަނީ "އެކުވެރި ގައުމުތަކެއް" މެދުވެރިކޮށް އެމެރިކާގެ މެސެޖުތަކެއް ލިބިފައިވާ ކަމަށެވެ. އެނަލިސްޓުން ވިދާޅުވާ ގޮތުގައި އީރާނުން ބޭނުންވަނީ އެގައުމުގެ އަމިއްލަ ޝަރުތުތަކެއްގެ މަތިން ހަނގުރާމަ ހުއްޓާލުމަށެވެ. އޭގެ ތެރޭގައި އެގައުމަށް ލިބުނު ގެއްލުންތަކުގެ ބަދަލު ހޯދުމާއި، އިގްތިސާދީ ދަތިކުރުމުގެ ފިޔަވަޅުތައް އުވާލުން ހިމެނެއެވެ.

މަޝްވަރާގެ ވާހަކަތައް ދެކެވުނު ނަމަވެސް، ހަނގުރާމަ ދަނީ ވަރުގަދަވަމުންނެވެ. އީރާނުގެ ބޫޝެހްރު ނިއުކްލިއަރ ޕްލާންޓަށް އަންގާރަ ދުވަހުގެ ރޭ ހަމަލާއެއް އަމާޒުވެފައިވާއިރު، އީރާނުން އިސްރާއީލަށް ދެމުންދާ ހަމަލާތަކުގައި 7 މީހަކު ވަނީ ޒަޚަމްވެފައެވެ. އަދި އިސްރާއީލުގެ އަސްކަރިއްޔާއިން ބުނެފައިވަނީ އެމީހުންގެ ހަނގުރާމައިގެ ޕްލޭނަށް އެއްވެސް ބަދަލެއް ނާންނަ ކަމަށެވެ.

މީގެ އިތުރުން، އެމެރިކާއިން ދަނީ މެދުއިރުމައްޗަށް އިތުރު އެތައް ހާސް ސިފައިންނެއް ފޮނުވުމަށް ތައްޔާރުވަމުންނެވެ. މިއީ މިހާރު އެ ސަރަހައްދުގައި ތިބި 50،000 ސިފައިންގެ އިތުރަށް ފޮނުވާ ސިފައިންނެވެ. މިއާއެކު، ސަރަހައްދީ ހަނގުރާމައެއްގެ ބިރުވެރިކަން ވަނީ އިތުރަށް ބޮޑުވެފައެވެ.